¹9

                 ¹ Tuir mai, Pilatos haruka ema lori Jesus hodi baku Nia. ² Soldadu  sira halo koroa ai‑tarak nian ida, no tau iha Jesus nia ulun. Sira tau ba Nia hatais unuk mean boot ida. ³ Hafoin, hakbesik ba Nia, sira hasara Nia, dehan: “Viva Judeu sira nia liurai!” hodi basa tan Nia. ⁴ Pilatos sai fali, hodi hateten ba sira: “Hare ba. Ha’u hatudu Nia ba imi atu imi hatene katak Ha’u la hetan sala ida iha Nia.” ⁵ Nune’e Jesus sai mai iha liur, ho koroa ai‑tarak no unuk mean. Pilatos dehan: “Ema mak ne’e!” ⁶ Hare tiha Nia, am’lulik ulun no guarda sira hakilar, dehan: “Hedi Nia ba krus! Hedi Nia ba krus!” Pilatos hateten: “Imi rasik lori Nia ba, hodi hedi Nia ba krus, tan ha’u la hetan sala ida iha Nia.” ⁷ Judeu sira simu: “Ami iha ukunfuan ida: tuir ukunfuan ne’e Nia sei mate, tan Nia foti an nudar Maromak Oan!” ⁸ Rona tiha lia ida ne’e, Pilatos tauk liu tan. ⁹ Tama fali ba uma laran, nia husu ba Jesus: “O mai housi nebe?” Maibe Jesus la hatan ida. ¹⁰ Tan ne’e Pilatos dehan ba Nia: “O la hatan mai? O la hatene katak ha’u iha kbiit atu hasai o, no mos iha kbiit atu hedi o ba krus?” ¹¹ Jesus lia tun, dehan: “O la simu karik kbiit housi leten, o sei la iha kbiit ida hasouru Ha’u. Tan ne’e, ema nebe saran Ha’u ba o nia liman, nia sala boot liu fali o nian.”

Sira tesi lia atu oho Jesus

                 ¹² Tan ne’e Pilatos buka atu husik sai Jesus, maibe Judeu sira hakilar: “O husik nia sai karik, o la’os Cesar nia belun, tan ida nebe foti an nudar liurai, nia foti liman hasouru Cesar.” ¹³ Rona tiha lia hirak ne’e, Pilatos lori fali Jesus mai iha liur, hodi tur iha justisa tur fatin, naran “fatin fatuk belar,” nebe iha lia Ebreu “Gabbata.” ¹⁴ Loron ne’e, loron hadia Paskua nian, besik meio-dia. Pilatos hateten ba Judeu sira: “Imi nia liurai mak ne’e!” ¹⁵ Sira hatan hodi hakilar: “Lori Nia ba, lori Nia ba; hedi Nia ba krus!” Pilatos husu ba sira: “Ha’u sei hedi imi nia liurai ba krus?” Am’lulik boot sira dehan: “Ami nia liurai mak Cesar deit.” ¹⁶ Ne’e duni, Pilatos saran Jesus ba sira atu sira hedi Nia ba krus.

Jesus mate iha krus

                ¹⁷ Tuir mai Judeu sira lori Jesus no Nia sai ba liur hodi Nia lori nia krus iha nia kbaas ba fatin ida naran “ulun ruin,” nebe dehan iha lia Ebreu “Golgota.” ¹⁸ Iha neba sira hedi Nia iha krus tutun, hamutuk ho ema na’in rua, ida iha sorin ida-ida, no Jesus iha klaran. ¹⁹ Pilatos haruka hakerek ai-kabelak ida atu tara iha krus tutun. Hakerek nune’e: “Jesus Nazare, Judeu sira nia liurai.” ²⁰ Judeu barak lee liafuan sira ne’e, tan fatin nebe sira hedi Jesus besik sidade, no hakerek ho lia Ebreu, Gregu no Latin. ²¹ Ne’e duni, am’lulik ulun sira hateten ba Pilatos: “Keta hakerek: ‘Judeu sira nia liurai’, maibe ‘Ema ne’e dehan: Ha’u mak Judeu sira nia liurai.’” Pilatos simu: “Buat nebe ha’u hakerek ona, ha'u hakerek ona!” ²³ Hedi tiha Jesus ba krus, soldadu sira hola nia unuk hodi fahe ba sira na’in hat. no mos nia hatais. Hatais ne’e la suku ida, ema soru naruk deit. ²⁴ Tan ne’e sira dehan ba malu : “Ita keta les hatais ne’e: Ita koko deit sorte atu hare nia monu los ba se.” Nune’e sai tuir los lia eskritura nebe dehan: “Sira fahe Ha’u nia hena ba malu, sira koko sorte ba Ha’u nia hatais.” Soldadu sira  halo duni nune’e. ²⁵ Besik Jesus nia krus hamriik nia inan, nia inan nia alin, katak Maria, Cleofas nia fen, ho tan Maria Madalena. ²⁶ Hare tiha  nia inan ho eskolante nebe nia hadomi iha nia sorin, Jesus lia tun ba nia inan: “Na’in feto, o nia oan mak ida ne’e!” ²⁷ Hafoin Nia lia tun ba eskolante: “O nia Inan mak ida ne’e!” No houri oras neba, eskolante ne’e simu nia iha nia uma. ²⁸ Tuir mai, tan hatene ona katak buat hotu la’o tuir ona, atu halo tuir lo-los eskritura, Jesus dehan: “Ha’u hamrook!” ²⁹ Iha neba iha kusi oan ida ho tua sin, tan ne’e, sira habokon hena ida iha tua sin ne’e, tau iha fafulu tutun, hodi lolo ba Jesus nia ibun. ³⁰ Koko tiha tua sin ne’e, Jesus dehan: “Buat hotu tuir los ona,” hafoin, Nia halis nia ulun hodi saran nia klamar.

Soldadu ida sona borus Jesus nia sorin

                        ³¹ Tamba loron neba, loron hadia an nian, atu ema mate sira nia isin la bele hela iha krus iha loron Sabadu, tan Sabadu ne’e loron boot ida, Judeu sira husu Pilatos atu hatohar tiha sira nia ain, hodi hasai sira nia isin mate housi krus. ³² Ne’e duni, soldadu sira mai baku tohar tiha ema uluk nia ain, hafoin ida seluk nian, sira nebe sira hedi hamutuk ho Jesus. ³³ To’o tiha Jesus, tan hare Nia mate tiha ona, sira la hatohar nia ain; ³⁴ maibe soldadu ida sona borus nia sorin ho diman, hodi halo be kahur ho ran suli sai. ³⁵ Ema nebe hare, nia rasik mak fo sasin ida ne’e; nia lia sasin los tebes; nia hatene katak nia koalia los  atu imi mos bele fiar. ³⁶ Ne’e mosu tuir los eskritura nia lia, nebe dehan: “Nia ruin ida mos ema sei la hatohar.” ³⁷ Escritura seluk dehan tan: “Sira sei fihir ema nebe sira sona borus.”

Ema hakoi Jesus

                 ³⁸ Tuir mai, Jose housi Arimateia, Jesus nia eskolante ida, maski subar deit tan tauk Judeu sira, husu lisensa ba Pilatos atu hasai Jesus nia isin mate no Pilatos fo tiha lisensa. Sira ba hodi hasai Nia isin mate. ³⁹ Nicodemos, ema nebe ba hasouru Jesus iha kalan,  mai ho mina kahur ho naan horun no alo besik libra atus ida. ⁴⁰ Sira hola Jesus nia isin mate, falun tiha ho hena mutin ida, hodi fakar tiha mina morin, tuir Judeu sira nia lisan atu hakoi mate. ⁴¹ Iha fatin nebe sira hedi Jesus iha krus, iha to’os oan ida no iha to’os ne’e iha rate foun ida iha nebe seidauk hakoi ema ida. ⁴² Tamba Loron Hadia Paskua nian, no mos tan rate ne’e besik hela, sira hakoi Jesus iha neba.