APOSTOLU SIRA NIA HAHALOK

1

Espiritu Santu atu mai

                ¹ Doben Teofilo, iha ha’u nia livru uluk, ha’u hakerek ona kona ba Jesus nia hahalok no nia hanorin, ² to’o loron nebe, hodi Espiritu Santu, hanorin tiha apostolu sira nebe Nia fihir nanis, Maromak foti Nia ba lalehan. ³ Terus tiha, Nia mosu ba sira nudar ema moris ho sinal barak; Nia mosu iha loron haat nulu nia laran hodi koalia ba sira kona ba Maromak nia reinu. ⁴ Sei horik dau-daun ho sira, Nia husu sira atu la bele sai housi Jerusalem, maibe hein Aman nia promessa nebe “imi rona tiha ona housi Ha’u; ⁵ basa Joao sarani ho be, maibe iha loron balun tan, imi sei simu baptismu ho Espiritu Santu.”

Jesus sa’e ba lalehan

                ⁶ Wainhira sira halibur an hamutuk ona, sira husu ba Nia. “Na’i, oras ne’e mak Ita Boot sei foti sa’e fali reinu Israel nian?” ⁷ Nia  hatan ba sira: “La’os imi mak hatene tempu eh oras nebe Aman Maromak hakarak ho nia kbiit rasik. ⁸ Maibe, wainhira Espiritu Santu tun ba imi, imi sei simu kbiit; imi sei sai Ha’u nia sasin iha Jerusalem, iha Judeu no Samaria tomak to’o rai nia rohan”. ⁹ Dehan tiha ne’e, no sira hateke hela, Jesus sa’e ba lalehan, no kalohan ida taka Nia housi sira nia matan. ¹⁰ Sira sei hateke hela ba leten no Nia sa’e dau-daun, mane na’in rua ho hatais mutin hamriik iha sira nia sorin. ¹¹ Sira dehan, “Ema Galileia sira, tan sa imi hamriik hodi hateke ba leten? Jesus ne’e nebe hasai tiha housi imi sei fila fali mai nudar imi hare Nia sa’e ba lalehan.” ¹² Tuir mai, sira fila fali ba Jerusalem housi foho naran Oliveira, nebe besik Jerusalem la’o deit tuir loron Sabadu ida.

Komunidade sarani uluk nian

                ¹³ Wainhira sira tama tiha iha sidade laran, sira sa’e ba kuartu iha andar leten iha nebe sira horik ba, Pedro no Joao no Tiago no Andre, Filipe no Tome, Bartolomeu no Mateus, Tiago, Alfeu nia oan, Simao Zelota no Judas, Tiago nia oan. ¹⁴ Sira ne’e hotu, ho neon ida deit, badinas atu harohan, hamutuk ho feto balun no Maria, Jesus nia inan, no Nia maun alin sira.

Ema atu taka Judas nia fatin

                                                  ¹⁵ Iha loron hirak neba, Pedro hamriik iha maun alin sira leet; sira besik na’in atus ida rua nulu iha fatin ida deit. Nia dehan, ¹⁶ “Ha’u nia maun alin sira, Eskritura ten ke halo tuir iha nebe Espiritu Santu koalia nanis housi David nia ibun, kona ba Judas, nebe sai matadalan ba sira nebe kaer Jesus. ¹⁷ Nia mos sura hamutuk ho ita no hetan mos parte iha serbisu ne’e. ¹⁸ Nia sosa rai ida ho osan housi nia hahalok aat, no hodi monu todan, nia isin fera iha klaran no nia isin lolon nia laran nakfakar hotu. ¹⁹ Ema hotu nebe horik iha Jerusalem hatene buat ne’e, nune’e ema hanaran rai ne’e ‘Hakeldama’ iha sira nia lia, katak ‘rai ran nian’. ²⁰ Basa hakerek nanis ona, ‘Rai sei sai fuik, no ema ida sei la horik iha nia.’ No: ‘Ema seluk sei kaer nia knaar.’ ²¹ Ne’e duni, ema ida nebe hela ho ita iha tempu tomak nebe Jesus la’o mai la’o ba iha ita nia leet, ²² hahu Joao nia baptismu to’o loron nebe Nia sai housi ita leet, sei sai sasin ba Nia moris hi’as hamutuk ho ami.” ²³ Ne’e duni, sira bolu ema na’in rua, Jose nebe ema hanaran Barsabas, nebe ema bolu mos Justo, no Matias. ²⁴ Tuir mai, sira harohan: “Na’i, Ita nebe hatene ema nia fuan, hatudu housi ema na’in rua ne’e se mak Ita fihir ²⁵ atu kaer knaar apostoliku nebe Judas husik tiha hodi taka nia fatin. ²⁶ Hafoin sira dada sorte, no sorte monu ba Matias, no sira sura nia hamutuk ho apostolu sanulu resin ida.