7

Estevao nia liafuan               

                ¹ Tuir mai, am’lulik boot husu, “Tebes duni ka?” ² No nia hatan, “Maun alin sira no aman sira, rona ba. Maromak gloria nian mosu ba ita aman Abraao wainhira nia sei hela iha rai Mesopotamia, molok nia tur iha Haran, ³ no Nia dehan ba nia, ‘Sai housi o nia rai no o nia uma-kain ba rai nebe ha’u sei hatudu ba o.’ ⁴ Ne’e duni, nia sai housi rai ema Kaldeia nian hodi tur iha Haran. No housi neba, wainhira nia aman mate ona, Nia halo nia la’o ba rai ne’e nebe imi ohin hela ba.  ⁵ Maibe Na’i la fo ba nia liman rohan ruma iha rai ne’e, ain nia sukat mos lae, maibe Na’i hakotu lia atu fo rai ne’e ba nia no ba nia bei-oan sira nudar rikusoi, maski nia oan la iha. ⁶ No Na’i koalia nune’e, “Nia bei-oan sira sei sai ema malae iha rai nebe la’os sira nian; iha neba sira sei sai atan no ema sei hanehan sira ba tinan atus haat; ⁷ maibe Ha’u sei tesi lia ba nasaun nebe sira serbi,’ Maromak dehan, ‘no ne’e hotu tiha, sira sei sai hodi adora Ha’u iha fatin ne’e.’ ⁸ Tuir mai, Nia haraik ba nia moruk sirkunsisaun nian, nune’e nia sai Isaac nia aman, no liu tiha loron ualu Abraao fo sirkunsisaun ba Isaac, nudar Isaac halo ba Jacob, no Jacob ba avo boot na’in sanulu resin rua. ⁹ No avo boot sira, laran moras ho Jose, fa’an nia atu sai atan ida iha Egiptu; maibe Maromak hela ho nia, ¹⁰ no soi nia housi nia susar laran hotu. Maromak haraik kmanek wa’in no matenek ba nia iha faraun, liurai Egiptu nia oin, nebe foti nia atu tau matan ba Egiptu no nia uma-kain  tomak.  ¹¹ Tuir mai, rai hamlaha boot no susar barak mosu iha rai Egiptu no Kanaan tomak, no ita nia bei-ala sira la hetan aihan; ¹² maibe wainhira Jacob rona katak iha aihan iha Egiptu, nia haruka ita nia bei-ala sira ba neba ba dala uluk. ¹³ Wainhira sira ba fali Egiptu ba dala rua, Jose fo hatene nia an ba nia maun alin sira, no faraun hatene Jose nia familia. ¹⁴ Tuir mai Jose haruka bolu nia aman Jacob, hodi husu nia no nia uma-kain tomak, ema na’in hitu nulu, atu ba neba, ¹⁵ no Jacob tun ba Egiptu.  Nia ho ita nia bei-ala sira mate ona ¹⁶ no ema lori sira fali ba Sikem hodi tau sira iha rate nebe Abraao sosa nanis ho osan folin ruma housi Hamor nia oan sira iha Sikem. ¹⁷ Wainhira tempu besik ona atu lia nebe Maromak hakotu ba Abraao sei halo tuir lo-los ona, povu sai barak no sai wa’in teb-tebes iha Egiptu, ¹⁸ to’o liurai seluk nebe la hatene buat ida kona ba Jose ukun iha Egiptu.  ¹⁹ Nia trata aat ita nia povu no hanehan ita nia bei-ala sira hodi haruka sira atu husik oan nurak sira iha liur nune’e sira la bele moris. ²⁰ Iha tempu ne’e mak Moises moris, no nia bonitu teb-tebes. Ba fulan tolu, nia inan tau matan ba nia iha nia aman nia uma; ²¹ maibe wainhira la bele subar tan, faraun nia oan feto foti nia nudar nia oan rasik.    ²² Moises sai boot tuir ema Egiptu nia matenek no sai kbiit na’in ho nia liafuan no ho nia hahalok. ²³ Wainhira nia iha ona tinan haat nulu, nia hanoin atu ba hare nia maluk, ema Israel sira. ²⁴ Wainhira nia hare ema Egiptu ida trata aat ema Judeu ida, nia tulun ema Israel ne’e hodi tuku mate ema Egiptu. ²⁵ Nia hanoin katak nia maluk sira sei hatene katak Maromak hakarak soi sira liu housi nia liman, maibe sira ne’e la hatene liu. ²⁶ Iha loron nebe tuir mai, wainhira nia mosu fali, ema Israel na’in rua istori malu. Nia buka atu halo sira dame malu hodi hateten, ‘imi maun alin. Tansa imi halo aat malu?’  ²⁷ Tuir mai, sira ida, nebe halo aat ba ida seluk dudu nia hodi dehan, ‘Se mak foti o atu ukun no tesi lia mai ami? ²⁸ O hanoin atu oho ha’u nudar o oho ema Egiptu hourse’ik?’ ²⁹ Moises halai wainhira nia rona lia hirak ne’e hodi tur nudar ema malae iha rai Midian; iha neba nia sai aman ba oan mane na’in rua. ³⁰ Liu tiha tinan haat nulu, anju ida mosu ba nia iha rai fuik maran besik foho Sinai iha ai-hun nebe lakan nia laran. ³¹ Wainhira Moises hare nia, nia hakfodak no wainhira nia hakbesik atu hare, Na’i nia lia dehan, ‘Ha’u mak Abraao, Isaac no Jacob nia Maromak.’ Tuir mai, Moises, ho laran nakdedar la berani atu hare nia. ³³ Maibe Na’i dehan ba nia, ‘Hasai sandalis housi o nia ain, basa fatin nebe o sama lulik. ³⁴ Ha’u hare Ha’u nia povu nia terus iha Egiptu no rona sira nia tanis, no Ha’u mai atu soi sira. Ne’e duni, mai besik ba basa Ha’u sei haruka o ba Egiptu. ³⁵ Moises ne’e, nebe sira hewai ho liafuan ‘Se mak foti o atu ukun no tesi lia ba ami?’ oras ne’e Maromak haruka nudar ukun na’in no maksoin, housi anju ida nebe mosu ba nia iha ai-klobur. ³⁶ Ema ne’e lori sira sai housi neba, hodi halo buat kmanek no sinal sira iha rai Egiptu, iha Tasi Mean, no iha rai fuik maran iha tinan haat nulu nia laran. ³⁷ Moises ida ne’e mak dehan ba povu Israel, ‘Maromak sei foti ba imi, housi imi nia uma-kain, profeta ida hanesan ha’u.’ ³⁸ Moises mak, wainhira sira halibur an hamutuk iha rai fuik maran, hela hamutuk ho anju nebe koalia ho nia iha foho Sinai no ho bei-ala sira, no nia mak simu lia menon moris nian nebe nia hato’o mai ita. ³⁹ Ita nia bei-ala sira lakohi halo tuir nia; maibe sira hakarak soe nia, no iha sira nia fuan laran, sira fila fali ba rai Egiptu, hodi dehan ba Aarao, ⁴⁰ ’Halo lulik sira mai ami nudar ami nia ukun na’in.’ Kona ba Moises nebe lori ita housi rai Egiptu, ita la hatene sa ida mak mosu ba nia,’ ⁴¹ Nune’e, sira halo karau oan ida nia ilas iha loron sira neba, hasa’e buat karan ba nia hodi haksolok iha buat nebe sira rasik halo ho liman. ⁴² Tuir mai, Maromak fila hodi halo sira adora funu na’in lalehan nian nudar hakerek tiha iha livru profeta sira nian, ‘Imi lori mai ha’u sakrifisiu no buat karan iha tinan hitu nulu iha rai fuik maran, o uma-kain Israel nian? ⁴³ Imi foti Moloc nia uma tenda, no Refan nia fitun, imi nia lulik, ilas sira nebe imi halo atu adora. Tan ne’e, Ha’u sei lori imi hanesan ema soi ba dook housi imi nia rai ba rai Babilonia nia sorin ba.’ ⁴⁴  Ita nia bei-ala sira rai hela uma tenda sasin nian iha rai fuik maran hanesan Ida nebe koalia ho Moises haruka nia halo tuir buat nebe nia hare.

⁴⁵ Ita nia bei-ala sira nebe simu nia nudar liman rohan ida lori nia hamutuk ho Josue wainhira sira hadau rai housi nasaun sira nebe Maromak duni sai housi ita bei-ala sira nia oin, to’o tempu David nian, ⁴⁶  nebe monu los ba Maromak nia laran no husu atu nia, bele karik, buka horik fatin ba Maromak uma-kain Jacob nian. ⁴⁷ Maibe Salomao mak halo uma ba Na’i. ⁴⁸ Maibe Maromak la horik iha uma laran ida nebe ema nia liman mak halo, nudar profeta dehan, ⁴⁹ ‘Lalehan mak Ha’u nia kadunan, rai mak fatin nebe Ha’u tau Ha’u nia ain; uma ida nebe mak o sei halo mai Ha’u?’  Na’i dehan, ‘Sa ida mak Ha’u nia hakmatek fatin? ⁵⁰ Ha’u nia liman la halo buat sira ne’e hotu?’”

                ⁵¹ “Imi, nebe loko an, la simu sirkunsisaun fuan no tilun nian, imi halo funu nafatin hasouru Espiritu Santu. Imi hotu hanesan deit ita nia bei-ala sira. ⁵² Profeta ida nebe mak imi nia bei-ala sira la hanehan? Imi nia bei-ala sira oho sira nebe fo hatene nanis ema santu nebe atu hiit an mai. Imi mak saran no oho Nia. ⁵³ Imi simu ukunfuan nebe Maromak hato’o housi anju sira, maibe imi la halo tuir lo-los.”

                ⁵⁴ Rona tiha liafuan hirak ne’e, sira hirus teb-tebes hodi run nehan hasouru nia. ⁵⁵ Maibe Estevao, nakonu ho Espiritu Santu, foti matan ba lalehan no hare Maromak nia kmanek hamutuk ho Jesus nebe hamriik iha Maromak nia sorin kuana; ⁵⁶ nia dehan: “Ha’u hare lalehan nakloke, no Maromak Oan Mane hamriik iha Nia sorin kuana.” ⁵⁷ Maibe sira hotu hakilar maka’as, taka sira nia tilun, halai hamutuk ba nia. ⁵⁸ Sira lori nia sai housi sidade, no hahu tuda nia. Sasin sira tau sira nia unuk iha foinsa’e naran Saul nia ain. ⁵⁹ Sira tuda nia dau-daun, Estevao harohan nune’e: “Na’i Jesus, simu ha’u klamar ba.” ⁶⁰ Hafoin, nia hakneak hodi hakilar: “Na’i, keta hatodan sira ho sala ne’e,” ⁶¹ dehan tiha ne’e, nia toba.