10

Maromak bolu Cornelio

                ¹ Iha Sesareia, iha ema ida naran Cornelio. Nia komandante bataliaun ida nian naran Italika. ² Nia ema diak no hamtauk Maromak hamutuk ho nia uma-kain tomak. Nia fo esmola ba ema Judeu sira no harohan bei-beik ba Maromak. Loraik ida, besik tuku tolu, nia hare mo-mos Maromak nia anju mosu mai hodi dehan ba nia, “Cornelio.” ⁴ Nia hateke ba nia, no ho laran tauk teb-tebes, dehan, “Sa ida, Na’i?” Anju dehan ba nia, “O nia harohan no esmola sa’e nudar buat karan kmanek iha Maromak futar oin. ⁵ Ohin ne’e, haruka ema ba Jope no bolu mai Simao nebe hanaran Pedro. ⁶ Nia hela hamutuk no Simao, badaen kulit nian; nia uma besik tasi.” ⁷ Wainhira anju nebe koalia ho nia ba tiha ona, nia bolu nia atan na’in rua no hamutuk ho soldadu diak ida housi nia emar sira, ⁸ nia hateten buat hotu ba sira no haruka sira ba Jope.

Pedro nia visaun

                ⁹ Loron tuir mai, wainhira sira sei la’o dau-daun no besik ona ba sidade, Pedro ba uma nia kakuluk atu harohan iha meio-dia. ¹⁰ Nia hamlaha no hakarak han, no sira sei tein dau-daun, nia hanesan dukur. ¹¹ Nia hare lalehan nakloke no buat ruma hanesan lensol boot tun mai, hanesan ema hatun nia hodi kaer nia lidun haat. ¹² Iha nia laran mak balada hotu rai ninian nebe iha ain haat, no mos lafahik no samea sira no manu hotu iha lalehan. ¹³ Lia ida dehan ba nia, “Pedro, hamriik ba. Oho no han.” ¹⁴ Maibe Pedro dehan, “La bele, Na’i. Basa ha’u nunka han buat ruma nebe bandu ka foer.” ¹⁵ Lia ne’e dehan fali ba nia, “Buat nebe Maromak hamos tiha ona, o la bele bolu fali foer.” Buat ida ne’e mosu dala tolu. Tuir mai lensol lori sa’e fali ba lalehan.

                ¹⁷ Wainhira Pedro hanoin barak dau-daun buat nebe nia foin hare ne’e katak sa, ema sira nebe Cornelio haruka husu kona ba Simao nia uma no to’o ba odamatan. ¹⁸ Sira koalia maka’as hodi husu Simao, nebe hanaran Pedro horik iha neba. ¹⁹ Pedro sei hanoin dau-daun kona ba visaun ne’e, Espiritu dehan ba nia, “Iha ema na’in tolu iha ne’e buka o. ²⁰ Ne’e duni, hamriik ba, tun ba kraik no ba hamutuk ho sira la hodi tauk buat ida, basa Ha’u mak haruka sira.” ²¹ Tuir mai Pedro tun ba ema sira ne’e hodi dehan, “Ha’u mak ida nebe imi buka. Tansa imi mai?” ²² Sira hatan, “Anju santu ida haruka Cornelio, komandante ida, ema diak no hamtauk Maromak, ema nebe ema Judeu sira hotu hamtauk, atu bolu ita ba nia uma no rona buat nebe ita sei hato’o.” ²³ Pedro husu sira atu tama iha uma laran hodi simu sira di-diak.

                Iha loron nebe tuir mai, nia hamriik no la’o hamutuk ho sira, no maun alin seluk housi Jope la’o hamutuk ho nia. ²⁴ Iha loron nebe tuir mai, nia tama iha Sesareia. Cornelio hein nia hamutuk ho nia parenti sira no belun doben sira. ²⁵ Wainhira Pedro tama iha uma, Cornelio ba hasouru nia, monu ain hodi hanai nia. ²⁶ Maibe Pedro foti nia dehan, “Hamriik ba. Ha’u mos ema ida deit.” ²⁷ Sira koalia no tama tan iha uma laran, no wainhira nia hare ema barak halibur an hamutuk iha neba; ²⁸ nia dehan ba sira, “Imi hatene katak bandu ba ema Judeu ida halibur an hamutuk ka ba hare ema gentiu ida iha nia uma, maibe Maromak hatudu ona mai ha’u katak ha’u la bele bolu ema bandu ka foer. ²⁹ Tan ne’e ha’u mai hodi la tauk buat ida wainhira imi haruka ema atu bolu ha’u. Ne’e duni, ha’u husu imi tan sa imi haruka bolu ha’u?”

                ³⁰ Cornelio hatan, “Loron haat liu tiha iha oras ne’e, besik tuku tolu loraik, ha’u harohan iha ha’u nia uma wainhira teki-teki ema ida ho hatais nabilan hamriik iha ha’u nia oin no dehan mai ha’u, ³¹ “Cornelio, Maromak rona tiha o nia harohan no hanoin hetan o nia esmola. ³² Ne’e duni haruka ema ba Jope no bolu Simao nebe hanaran Pedro mai. Nia hela iha Simao, badaen kulit nia uma. ³³ Ne’e duni ha’u haruka kedas ema atu bolu ita, no ita mos laran diak tebes atu mai. Oras ne’e, ami hotu iha ne’e iha Maromak futar oin atu rona buat hotu nebe Na’i haruka ita atu hato’o.”

Pedro nia liafuan

                ³⁴ Tuir mai, Pedro hahu koalia nune’e: “Tebes duni, ha’u hare katak Maromak la fihir ema. ³⁵ Maibe, iha nasaun hotu, Maromak simu hotu ema sira nebe tauk Nia no halo hahalok nebe los. ³⁶ Imi hatene lia nebe Nia haruka ba ema Israel sira wainhira Nia haklaken dame housi Jesus Kristu, nebe ema hot-hotu nia Na’i, ³⁷ buat nebe mosu iha Judeia, hahu iha Galileia liu tiha baptismu nebe Joao haklaken, ³⁸ oin sa Maromak kose Jesus Nazare ho Espiritu Santu no kbiit. Nia la’o lemo rai hodi halo diak no fo isin diak ba sira hotu nebe diabu fo terus, basa Maromak hela ho Nia. ³⁹ Ami sasin ba buat hotu nebe Nia halo iha ema Judeu sira nia rai no iha Jerusalem. Sira oho nia hodi tara Nia iha ai-hun ida. ⁴⁰ Maibe Maromak halo Nia moris hi’as fali liu tiha loron tolu no husik ema hare Nia, ⁴¹ la’os ema hotu, maibe ami sasin sira nebe Maromak hili nanis, nebe han no hemu ho Nia wainhira Nia moris hi’as ona housi mate. ⁴² Jesus haruka ami atu haklaken ba povu no fo sasin katak Maromak mak foti Nia atu tesi lia ba ema moris no ema mate. ⁴³ Profeta sira hotu fo sasin ba Nia, katak ema hotu nebe fiar iha Nia sei hetan perdua ba sira nia sala housi Nia naran.”

Cornelio nia baptismu

                ⁴⁴ Pedro sei koalia dau-daun, Espiritu Santu tun ba sira hotu nebe rona lia foun. ⁴⁵ Sarani Judeu sira nebe mai hamutuk ho Pedro hakfodak tan sira hare presente Espiritu Santu nian tun mos ba ema gentiu sira. ⁴⁶ Basa sira rona sira koalia lia oi-oin hodi hahi Maromak. Pedro hahu dehan: ⁴⁷ “Ema ruma bele taka be baptismu nian ba sira ne’e nebe simu tiha ona Espiritu Santu, hanesan ita? ⁴⁸ Nia haruka sira atu simu baptismu iha Jesus Kristu nia naran. ⁴⁹ Tuir mai sira husu nia atu hela loron ruma ho sira.