12

Herodes fo susar ba sarani sira

                ¹ Iha tempu neba liurai Herodes foti liman hasouru sarani balun atu fo susar ba sira. ² Nia haruka oho ho surik Tiago, Joao nia maun, ³ no wainhira nia hare katak Judeu sira haksolok tamba ne’e, nia kaer mos Pedro. Iha tempu neba ema Judeu sira halo festa paun fermentu laek nian. ⁴ Nia haruka ema atu tau matan ba nia hodi hatama nia iha dadur laran ho guarda sanulu resin neen. Nia hakarak lori nia ba povu wainhira festa Paskua liu tiha ona. ⁵ Nune’e Pedro hela iha dadur laran, maibe kreda harohan ho laran manas ba Maromak ba Pedro nia diak.

                ⁶ Iha kalan molok Herodes atu tesi lia ba Pedro, nia toba hela iha soldadu rua nia leet, kesi metin ho sira ho korente rua; iha liur guarda seluk tan tau matan ba dadur. ⁷ Teki-teki, Na’i nia anju hamriik iha nia sorin no naroman nabilan mosu iha nia kuartu. Nia book Pedro iha nia sorin hodi fanu nia, dehan, “Hamriik lalais.” Korente sira monu housi nia liman. ⁸ Anju dehan ba nia, “Tau o nia sintu no o nia sandalis.” Pedro halo  tuir. Tuir mai, nia dehan ba Pedro, “Tau o nia unuk no tuir ha’u mai.” ⁹ Ne’e duni, Pedro la’o tuir nia hodi la hatene  katak buat hotu ne’e los duni; nia hanoin nia mehi deit. ¹⁰ Sira la’o liu guarda uluk, tuir mai ida seluk tan, ikus mai  sira to’o ona odamatan besi nian nebe lori ba sidade laran. Odamatan ne’e loke an mesa-mesak  Sira sai hodi la’o tuir dalan ida, no teki-teki anju husik nia. ¹¹ Tuir mai, Pedro matan mos ona hodi dehan, “Oras ne’e ha’u hatene lo-los katak Na’i haruka nia anju no soi ha’u housi Herodes nia liman no housi buat hotu nebe ema Judeu sira hein dau-daun.” ¹² Wainhira nia hare ona ida ne’e, nia la’o ba Maria nia uma, Joao nebe hanaran an Marcos, nia uma, iha nebe ema barak halibur an hamutuk atu harohan. ¹³ Wainhira nia tuku odamatan nebe iha dalan, atan feto ida naran Roda, ba hare. ¹⁴ Nia haksolok teb-tebes wainhira nia rona Pedro nia lia, tan ne’e nia haluha atu loke odamatan maibe halai ba laran hodi fo hatene katak Pedro hela iha odamatan. ¹⁵ Sira dehan ba nia, “O bulak.” Maibe nia dehan nafatin katak Pedro iha duni neba. Maibe sira dehan ba nia, “Ne’e Pedro nia anju deit.” ¹⁶ Maibe Pedro tuku odamatan fila-fila, no wainhira sira loke nia, sira hare nia no sira hakfodak teb-tebes. ¹⁷ Nia fo sinal ho nia liman hodi husu sira atu nonok no nia fo hatene ba sira oin sa Na’i soi nia housi dadur laran, hodi dehan, “Fo hatene ne’e ba Tiago no nia maun alin sira.” Tuir mai, nia sai housi neba hodi la’o ba fatin seluk.

¹⁸ Iha dader, sei rai hun mutin hela, soldadu sira laran taridu teb-tebes kona ba buat nebe mosu kona ba Pedro.¹⁹ Herodes haruka buka nia, no la hetan nia, nia haruka tesi lia ba no oho guarda sira. Tuir mai, Pedro husik Judeia no hela ba tempu ruma iha Sesareia.

Herodes mate

                ²⁰ Herodes hirus ema Tiro no Sidon nian. Sira halibur an hamutuk atu ba hasouru Herodes. Hodi manan mos Blasto, liurai nia atan boot, ba sira nia sorin, sira husu dame, basa sira nia rai hetan aihan deit housi Judeia. ²¹ Iha loron nebe sira marka, Herodes, ho hatais liurai nian,  tur iha nia kadunan hodi koalia ho sira. ²² Ema lubun nebe halibur an iha neba hakilar nune’e, “Ne’e Maromak ruma nia lia, la’os ema nian!” ²³ Iha oras ne’e kedas, Na’i nia anju ida foti liman ba nia basa nia lakohi fo gloria ba Maromak; ular sira mosu mai hodi han nia isin no nia, iis kotu, mate. ²⁴ Maibe Maromak nia liafuan belar no buras ba nafatin.

Saul no Barnabe nia misaun

                ²⁵ Wainhira sira hala’o tiha sira nia knaar, Barnabe ho Saul fila fali ba Jerusalem hodi lori Joao nebe hanaran an Marcos.