14

Paulo no Barnabe iha Ikonio

                ¹ Iha Ikonio, sira tama iha ema Judeu sira nia sinagoga ida no koalia maka’as iha neba, nune’e ema Judeu no gregu barak hahu fiar, ² maski ema Judeu sira nebe la fiar lori lia no hamanas gentiu sira hasouru maun alin. ³ Sira hela kleur iha neba hodi koalia ho aten berani tan Na’i. No Na’i hametin sira nia liafuan kona ba nia grasa hodi halo sinal no buat kmanek housi sira nia liman. ⁴ Ema sidade nian fahe malu: balun hamutuk ho ema Judeu sira; balun ho apostolu sira. ⁵ Wainhira ema gentiu no ema Judeu, hamutuk ho sira nia na’i ulun buka atu ba hasouru no tuda sira, ⁶ sira hatene buat ne’e no sira halai ba sidade sira Likaonia, Listra no Derbe nian, no ba fatin seluk nebe besik neba; ⁷ iha neba sira haklaken liafuan diak.

Paulo no Barnabe iha Listra

                ⁸ Iha Listra, iha ema ida ho ain tos, ain aat houri kiik kedas, nebe la’o la bele. ⁹ Nia rona Paulo koalia; Paulo nebe fihir nia, hare katak ema ne’e fiar maka’as atu hetan isin diak, ¹⁰ no nia dehan ho lia maka’as:  “O hamriik los ba ho o nia ain!” Ema ne’e haksoit no hahu la’o mai la’o ba. ¹¹ Hare tiha buat nebe Paulo halo, ema lubun boot ne’e hakilar ho lia Likaonia nian: “Maromak sira halo an ba ema hodi tun to’o mai ita”. ¹² Sira hanaran Barnabe “Zeus” no Paulo “Hermes”, basa Paolo mak koalia ba sira. ¹³ Iha odamatan sidade nianiha templu ba Zeus. Am’lulik Zeus nian lori karau vaka no ai-funan sira, basa, nia hakarak hasa’e sakrifisiu ba sira na’in rua hamutuk ho ema lubun boot.

                ¹⁴ Wainhira apostolu Barnabe no Paulo rona buat ne’e, sira les sira nia unuk, halai ba ema lubun boot nia laran hodi hateten ho lia maka’as: ¹⁵ “Maluk sira,  imi halo sa ida? Ami mos ema hanesan imi, ami mai haklaken liafuan diak ba imi atu imi husik maromak bosok sira hodi fila ba Maromak moris, nebe ‘halo lalehan  no rai, tasi no buat tomak nebe iha sira.’ ¹⁶ Iha otas uluk, Nia husik nasaun sira hotu la’o tuir ida-ida nia dalan, ¹⁷ maibe Nia iha sasin nafatin basa wainhira Nia haraik Nia laran luak no Nia fo ba imi udan housi lalehan no tempu diak atu imi hetan ai-fuan barak, no fo han no halo imi haksolok iha imi nia moris.” ¹⁸ Maski ho liafuan hirak ne’e, susar teb-tebes atu sira bele para ema lubun ne’e housi sakrifisiu nebe sira hakarak hasa’e ba sira na’in rua.

                ¹⁹ Maibe ema Judeu balun housi Antiokia no Ikonio to’o mai hodi manan ba sira an rasik ema lubun boot ne’e. Sira tuda Paulo no dada nia housi sidade, hodi hanoin katak nia mate ona. ²⁰ Maibe wainhira eskolante sira mai halibur an hale’u nia, nia hamriik hodi tama ba sidade laran. Iha loron nebe tuir mai, nia liu ba Derbe ho Barnabe.

Misaun uluk nian hotu ona

                ²¹ Haklaken tiha lia foun diak iha sidade ne’e no sarani tiha ema barak, Paulo ho Barnabe fila fali ba Listra no ba Ikonio no ba Antiokia. ²² Sira hametin eskolante sira nia laran no husu sira atu laran metin to’o rohan iha fiar, hodi dehan, “Ita ten ke hetan susar barak atu tama iha Maromak nia reinu.” ²³ Ba sarani sira iha kreda ida-ida sira foti katuas sira; no ho harohan no jejum, sira saran sira ba Na’i, nebe sira fiar. ²⁴ Tuir mai, sira la’o liu rai Pisidia no to’o ba rai Pamfilia. ²⁵ Haklaken tiha Maromak nia liafuan iha Perga, sira tun ba Atalia. ²⁶ Housi neba, sira sa’e ro ba Antiokia, iha nebe sira saran an ba Na’i nia grasa tan serbisu nebe sira halo tiha ona. ²⁷ To’o tiha neba, sira halibur kreda tomak hodi haktuir buat hotu neba Maromak halo ho sira no oin sa Na’i loke odamatan fiar nian ba gentiu sira. ²⁸ Sira hela kleur iha neba ho eskolante sira.