15

Halibur an hamutuk iha Jerusalem

                ¹ Ema balun tun mai housi Judeia hodi hanorin maun alin sira iha Antiokia, “Imi la simu karik sirkunsisaun tuir lisan Moises nian, imi sei la hetan maksoin.” ² Tan sira haksesuk malu maka’as ho Paulo no Barnabe hasouru sira, sira haruka Paulo ho Barnabe no sira seluk tan atu sa’e ba Jerusalem hodi koalia ho apostolu sira no katuas sira kona ba buat ne’e. ³ Kreda haruka sira la’o, no sira la’o liu housi Fenisia no Samaria, iha nebe sira haktuir kona ba ema gentiu nebe fiar, no lori ksolok boot ba maun alin sira. ⁴ To’o tiha iha Jerusalem, kreda, hamutuk  ho apostolu sira  no katuas sira, simu sira, no sira haktuir buat hotu nebe Maromak halo ho sira. ⁵ Maibe fiarna’in balun housi grupu fariseu sira nian hamriik hodi dehan, “Ten ke fo sirkunsisaun ba sira no haruka sira atu tuir Moises nia ukunfuan.”

                ⁶ Apostolu sira ho katuas sira halibur an atu hare di-diak buat ne’e. ⁷ Haksesuk malu maka’as tiha ona, Pedro hamriik hodi dehan ba sira, “Ha’u nia maun alin sira, imi hotu hatene katak houri uluk kedas Maromak hili iha ita leet balun atu housi ha’u nia ibun gentiu sira rona liafuan evangeliu nian hodi fiar. ⁸ No Maromak nebe hatene ema nia laran fo sasin hodi haraik Espiritu Santu ba sira nudar Nia haraik mai ita. ⁹ Nia la fihir ema housi ita no sira, basa tan fiar Nia hamos sira nia fuan. ¹⁰ Ne’e duni, tansa imi koko Maromak hodi tau ba eskolante ida nia kabas buat todan nebe ita nia bei-ala sira ka ita rasik la bele lori? ¹¹ Maibe ita fiar katak ita hetan maksoin housi Na’i Jesus nia grasa, hanesan mos sira.” ¹² Eskolante sira hotu nonok, no sira rona wainhira Paulo no Barnabe haktuir sinal no buat kmanek nebe Maromak hala’o iha gentiu sira leet.

Tiago nia liafuan

                ¹³ Wainhira ema hotu nonok deit ona, Tiago hatan, “Maun alin sira, rona ha’u ba. ¹⁴ Simao haktuir tiha oin sa Maromak hanoin uluk knanain atu halibur housi gentiu sira povu ida ba Nia naran. ¹⁵ Profeta nia liafuan la’o mos nune’e, nudar hakerek nanis: ¹⁶ ‘Ne’e hotu tiha, Ha’u sei fila fali mai no harii fali David nia uma nebe monu tiha; housi nia rahun sira Ha’u sei harii nia no foti nia fali, ¹⁷ atu ema sira nebe sei hela sei buka Na’i, no mos gentiu sira nebe tan sira ema bolu Ha’u naran. Na’i, nebe halo lo-los buat hot-hotu dehan nune’e, ¹⁸ nebe ema hatene houri uluk kedas.’ ¹⁹ Ne’e duni, ha’u hanoin katak ita la bele fo todan tan ba gentiu sira nebe fila fali ba Maromak, ²⁰ maibe ita sei hakerek ba sira atu la bele hafoer an ho lulik sira, ho sala foer, ho naan housi balada nebe mate tan buti nia kakorok, no housi ran. ²¹ Basa houri otas wa’in, iha ema sira nebe haklaken Moises iha fatin hot-hotu nudar ema lee nia surat iha sinagoga sira iha loron Sabadu.”

Surat housi apostolu sira

                ²² Tuir mai apostolu sira no katuas sira, hamutuk ho kreda hotu, hanoin atu hili ema balun no haruka sira ba Antiokia hamutuk ho Paulo no Barnabe. Sira hili Judas, nebe ema hanaran Barsabas, no Silas, ema naran boot liu iha maun alin sira leet. ²³ Surat nebe sira haruka housi sira ne’e mak ida ne’e: “Apostolu ho katuas sira, imi nia maun alin sira, ba maun alin nebe uluk gentiu iha Antiokia, Siria no Silisia: kumprimentu! ²⁴ Tan ami rona katak ita nia maun alin balun nebe, maski ami la haruka, book imi ho sira nia hanorin hodi halo imi nia laran susar, ²⁵ ami hanoin ho laran ida deit atu hili ema balun no haruka sira ba imi hamutuk ho doben Paulo ho Barnabe; ²⁶ sira ne’e saran ona sira moris ba Na’i Jesus Kristu nia naran. ²⁷ Nune’e ami haruka Judas no Silas nebe sei hato’o mos ho ibun lia menon ida deit. ²⁸ Ne’e Espiritu Santu no ami nia hakarak atu la bele fo todan tan ba imi liu fali buat nebe presisa, ²⁹ katak la bele han naan housi balada nebe hasa’e ona ba lulik, housi ran, housi naan nebe mai housi balada nebe ema buti mate, no housi sala foer. Imi halo tuir ida ne’e karik, imi sei halo buat nebe los. Adeus!”

Ema sira iha Antiokia

                ³⁰ Ne’e duni, sira haruka sira ne’e ba Antiokia. To’o tiha neba, sira halibur hamutuk sarani sira hodi hato’o surat ba sira. ³¹ Wainhira povu sira lee tiha nia, sira haksolok ho lia menon ne’e. ³² Judas no Silas, tan sira ne’e mos profeta, hamanas no hametin maun alin sira ho liafuan barak. ³³ Hela tiha tempu ruma iha neba, sira ne’e, nebe sarani lori to’o odamatan hodi haruka kumprimentu dame nian housi maun alin sira, fila fali ba sira nebe haruka sira ba. ³⁴ Maibe Silas hanoin atu hela tan iha neba. ³⁵ Maibe Paulo no Barnabe hela iha Antiokia, hodi hanorin no haklaken hamutuk ho ema barak seluk Na’i nia liafuan.

                ³⁶ Liu tiha tempu ruma, Paulo dehan ba Barnabe, “Ita ba fali atu hare ita nia maun alin sira moris oin sa iha sidade sira hotu nebe ita haklaken tiha Na’i nia liafuan.” ³⁷ Barnabe hakarak lori mos Joao, nebe ema bolu mos Marcos, hamutuk ho nia, ³⁸ maibe Paulo dehan hodi kbiit katak sira la bele lori ema nebe husik tiha sira iha Pamfilia no la tuir sira ona iha sira nia serbisu. ³⁹ Sira haksesuk malu maka’as teb-tebes, nune’e sira haketak malu. Barnabe lori Marcos no sa’e ro ba Chipre. ⁴⁰ Maibe Paulo hili Silas no wainhira maun alin saran tiha ona sira ba Na’i nia grasa, sira la’o ba. ⁴¹ Sira la’o rai iha Siria no Silisia tomak hodi hametin liu tan kreda sira.