17

Paulo iha Tesalonika

                ¹ Wainhira sira la’o tuir dalan nebe liu housi Amfipoli no Apolonia, sira to’o Tesalonika iha nebe iha ema Judeu sira nia sinagoga. ² Tuir nia lisan, Paulo tama iha sinagoga no ba Sabadu tolu tu-tuir malu nia haksesuk malu ho sira housi Eskritura, ³ hodi hateten no hatudu katak Messias ten ke terus no moris hi’as housi mate, no katak “Messias mak Jesus, nebe ha’u haklaken ba imi.” ⁴ Sira balun fiar no tuir Paulo no Silas; nune’e mos ema gregu barak nebe hamtauk Na’i no feto naran boot balun. ⁵ Maibe ema Judeu sira laran moras no halibur ema folin laek balun nebe halimar deit iha luron boot. Sira sai ema lubun boot ida no halo tarutu boot iha sidade laran. Sira la’o ba Jason nia uma, hodi hanoin atu lori sira ba povu nia tribunal. ⁶ Wainhira lubun ne’e la hetan sira, sira dada sai Jason no maun alin balun ba juis sidade nian, hodi hakilar, “Sira ne’e nebe book tiha mundu tomak mai fali iha ne’e ohin.⁷ No Jason simu sira. Sira la’o hasouru buat nebe Cesar haruka no dehan fali katak iha liurai seluk, katak Jesus.” ⁸ Sira hamanas ema lubun ne’e to’o sai laran nakali, no juis sidade nian, rona tiha buat hirak ne’e, ⁹ husu osan seguransa nian housi Jason no sira seluk, hafoin husik sira ba.

Paulo iha Berea

                ¹⁰ Maun alin sira haruka kedas Paulo no Silas ba Bereia iha kalan. To’o tiha neba, sira ba ema Judeu sira nia sinagoga. ¹¹ Ema Judeu sira iha neba matenek liu fali sira nebe iha Tesalonika, basa sira simu liafuan ho laran haksolok no buka hatene di-diak eskritura loron loron atu hare buat hirak ne’e los ka lae. ¹² Sira barak sai fiarna’in, hamutuk ho feto no mane gregu balun nebe naran boot iha sidade laran. ¹³ Maibe wainhira ema Judeu sira iha Tesalonika rona katak Paulo haklaken Maromak nia liafuan iha Berea, sira mos ba neba atu halo tarutu maka’as no book ema lubun boot. ¹⁴ Nune’e maun alin sira haruka kedas Paulo ba tasi ibun, maibe Silas no Timoteo hela iha sidade. ¹⁵ Wainhira Paulo nia maluk sira lori tiha nia to’o Atenas, sira fila fali ho lia menon ba Silas no Timoteo atu ba ho nia lalais wainhira sira bele.

Paulo iha Atenas

                ¹⁶ Paulo hein sira dau-daun iha Atenas, nia hirus teb-tebes  wainhira nia hare sidade nakonu ho lulik sira. ¹⁷ Ne’e duni, nia haksesuk malu iha sinagoga ho ema Judeu sira no sira nebe hamtauk Na’i, no loron loron iha luron boot ho ema naran deit nebe hela iha neba. ¹⁸ Ema epikureu balun mos no filosopu stoiku sira haksesuk malu ho nia. Balun husu, “Manu loriku ne’e hakarak hato’o sa ida?” Seluk fali dehan, “Nia hanorin kona ba lulik malae ruma,” basa nia haklaken kona ba “Jesus” no “moris hi’as.” ¹⁹ Sira lori nia ba Areopago hodi dehan, “O bele hato’o mai ami hanorin foun nebe o koalia dau-daun ne’e? ²⁰ Basa o mai ho liafuan nebe halo ami hakfodak; ami hakarak hatene buat sira ne’e katak sa.” ²¹ Ema Atenas sira no mos malae sira nebe horik iha neba la halo buat ida, maibe sira halimar deit hodi toman atu haktuir ka rona buat foun ruma.

Paulo nia liafuan

                ²² Paulo hamriik iha Areopago nia klaran, hodi dehan nune’e: “Ema Atenas sira, ha’u hare katak imi hotu hamtauk Maromak. ²³ Basa wainhira ha’u la’o iha sidade laran hodi hare di-diak imi nia fatin santu sira, ha’u hetan altar ida ho liafuan hirak ne’e: ‘Ba Maromak nebe ema la hatene’. Ne’e duni, Ida nebe imi adora hodi la hatene, ha’u haklaken ba imi. ²⁴ Maromak nebe halo mundu no buat hotu nebe iha nia, lalehan no rai nia Na’i, la horik iha kadunan nebe ema nia liman mak halo; Nia la kuran ema nia liman atu serbi Nia basa Nia la kuran buat ida. Maibe Nia mak fo moris no iis  no buat hotu. ²⁵ Housi ema ida deit, Nia halo ema tomak atu horik iha mundu tomak, no Nia mak tau tempu sira no ida-ida nia fatin, ²⁷ atu ema hotu bele buka Maromak, maski sira raba iha nakukun laran atu bele hetan Nia, maski lo-los nia la dook housi ita ida-ida. ²⁸ basa ‘iha Nia ita moris, no book no hetan ita an,’ nudar imi nia poeta balun dehan tiha, ‘Basa ita mos Nia oan sira.’ ²⁹ Ne’e duni, tan ita Maromak nia oan, ita la bele hanoin katak Maromak ne’e hanesan ilas nebe ema nia liman  no matenek halo ho osan mean  ka osan mutin ka fatuk. ³⁰ Maromak taka matan ba tempu nebe ema sei beik, maibe ohin Nia hakarak hodi kbiit katak ema hot-hotu hakribi sala ³¹  basa Nia marka tiha loron iha nebe Nia sei tesi lia ba mundu ho justisa housi ema ida nebe Nia foti no Nia hametin ba ema hot-hotu wainhira Nia halo Nia moris hi’as housi mate sira leet.” ³² Wainhira sira rona kona ba moris hi’as housi mate sira leet, balun hahu hamlaha, maibe sira seluk hateten: “Ami hakarak rona o koalia kona ba buat ne’e dala seluk tan.”  ³³ Nune’e Paulo husik sira. ³⁴ Maibe balun tuir nia, hodi sai fiarna’in:  Sira ne’e mak Dinis Areopagita no mos feto ida naran Damaris, no seluk tan hamutuk ho sira.