20

Paulo iha Masedonia no Gresia

                ¹ Wainhira buat hotu hakmatek ona, Paulo haruka bolu eskolante sira, no hamanas tiha sira nia laran, nia fo adeus no la’o ba Masedonia. ² La’o dau-daun housi rai sira iha neba, ho liafuan barak, nia fo aten berani ba sira iha neba. Tuir mai nia to’o Gresia, ³ iha nebe nia hela fulan tolu. Maibe wainhira ema Judeu sira hakarak halo aat nia wainhira nia atu sa’e ro atu la’o ba Siria, nia hanoin atu fila fali liu housi Masedonia.

Fila fali ba Troade

                ⁴ Soprato, Pirro nia oan, housi Bereia, la’o hamutuk ho nia; nune’e mos Aristarco no Segundo housi Tesalonika, Gaio housi Derbe, Timoteo, no Tiquico no Trofimo housi Asia, ⁵ nebe la’o uluk hodi hein ami iha Troade. ⁶ Ami sa’e ro housi Filipe wainhira festa paun fermentu laek nian hotu tiha, no la’o hamutuk fali ho sira iha Troade liu tiha loron lima. Iha neba ami hela semana ida.

Eutico moris hi’as fali

                ⁷ Iha loron uluk semana nian, wainhira ami halibur malu atu silu paun, Paulo koalia ba sira basa nia atu sai iha loron nebe tuir mai, no nia koalia nafatin to’o kalan fahe rua. ⁸ Iha ahi-oan barak iha kuartu andar nian iha nebe ami halibur hela, ⁹ no Paulo koalia dau-daun, foinsa’e ida naran Eutico, nebe tur hela iha janela matan dukur liu. Ikus mai nia dukur teb-tebes no monu housi andar tolu. Wainhira sira foti nia, nia mate ona. ¹⁰ Paulo tun ba, toba iha nia leten hodi hakoak nia dehan, “Keta tauk, nia sei moris.” ¹¹ Hafoin nia fila fali ba andar leten, silu paun hodi han; nia koalia tan to’o dader, hafoin nia la’o ba. ¹² Sira lori foinsa’e ne’e; nia moris ona no sira haksolok teb-tebes.

Paulo ba Mileto

                ¹³ Ami la’o ba ro no sa’e ro to’o Asso iha nebe Paulo mos atu sa’e nudar ami hakotu lia ona, basa nia la’o tuir rai deit. ¹⁴ Wainhira ami hasouru malu iha Asso, nia sa’e ro no ba to’o Mitilene. ¹⁵ Iha loron nebe tuir mai, ami sa’e ro fali no to’o fatin ida besik Kio, no loron ida tan, ami to’o Samos, no iha loron nebe tuir mai, ami to’o ona Mileto. ¹⁶ Uluk Paulo hanoin atu ba oin tan, liu Efeso atu la bele lakon tempu iha provinsia Asia nian, basa nia hakarak ba lalais atu to’o Jerusalem, bele karik, iha festa Pentekostes nian.

Paulo fo adeus iha Mileto

                ¹⁷ Housi Mileto, Paulo haruka bolu katuas sira housi kreda Efeso nian. Wainhira sira to’o mai, nia dehan ba sira: “Imi hatene oin sa ha’u moris iha imi nia leet houri loron uluk nebe ha’u sama rai Asia. Ha’u serbi Na’i ho haraik an no ho mataben no terus nebe ha’u simu tan ema Judeu sira nia laran aat, ²⁰ no ha’u la tauk dehan ba imi buat nebe ba imi nia diak, ka hanorin imi iha ema hotu nia oin ka iha imi nia uma. ²¹ Ho laran manas, ha’u fo sasin ba ema Judeu no ema gregu atu hakribi sala iha Maromak futar oin no atu fiar Na’i Jesus. ²² Maibe oras ne’e, tan Espiritu haruka ha’u, ha’u ba Jerusalem. Ha’u la hatene sei mosu sa ida mai ha’u iha neba, ²³ ha’u hatene deit katak housi sidade ba sidade, Espiritu fo hatene katak dadur no terus hein ha’u. ²⁴ Maibe ha’u hare ha’u nia moris nudar folin laek mai ha’u, ha’u buka deit atu remata ha’u nia dalan no knaar nebe ha’u simu housi Na’i Jesus, atu fo sasin ba evangeliu Maromak nia grasa nian. ²⁵ Maibe oras ne’e ha’u hatene katak imi hotu nebe rona ha’u haklaken reinu, sei la hare tan ha’u nia oin. ²⁶ Tan ne’e, ha’u dehan lo-los ba imi ohin ne’e katak ha’u fase liman kona ba imi nia ran, ²⁷ basa ha’u la tauk atu haklaken ba imi Maromak nia hakarak tomak. ²⁸ Tau matan ba imi nia an no ba luhan tomak nebe Espiritu Santu saran ba imi atu tau matan; tau matan ba Maromak nia kreda nebe Nia manan ho Nia rasik nia ran. ²⁹ Ha’u hatene katak wainhira ha’u ba tiha ona, asu fuik sira sei mosu iha imi leet, no sira sei la sadia luhan ne’e. ³⁰ No housi imi rasik, ema balun sei hamriik hodi hateten buat aat oi-oin atu dada sai eskolante sira ba sira nia sorin. ³¹ Ne’e duni, matan moris ba no hanoin di-diak katak ba tinan tolu, ha’u la para hanorin imi ho mataben. ³² Ohin ne’e, ha’u saran imi ba Maromak no ba nia liafuan kmanek nebe bele harii imi no fo ba imi liman rohan iha sira hotu nebe sai santu tiha ona sira nia leet. ³³ Houri uluk kedas ha’u la buka ema nia osan mutin ka osan mean ka hatais. ³⁴ Imi rasik hatene lo-los katak liman sira ne’e buka buat nebe ha’u no ha’u nia maluk sira kuran. ³⁵ Iha buat hot-hotu, ha’u hatudu ba imi katak housi serbisu maka’as hanesan ne’e, ita bele fo tulun ba ema kbiit laek sira, hodi hanoin Na’i Jesus rasik nia liafuan nebe dehan, ‘Diak liu fo liu fali simu.’” ³⁶ Koalia hotu tiha, nia hakneak no harohan hamutuk ho sira hotu. ³⁷ Sira tanis maka’as hodi hakoak Paulo no rei nia, ³⁸ basa sira laran susar teb-tebes wainhira nia dehan katak sira sei la hare tan nia oin. Tuir mai sira la’o hamutuk ho nia ba ro.