21

Paulo iha Tiro

                ¹ Fo tiha adeus ba sira, ami sa’e ro hodi la’o los ba Kos, no iha loron nebe tuir mai, ba Rodes, no housi neba ba Patara. ² Hetan tiha ro ida nebe hakur ba Fenisia, ami sa’e nia no la’o ba. ³ Ami hare Chipre maibe liu deit iha ami nia karuk no la’o ba Siria hodi tun iha Tiro iha nebe ro atu hatun sasan tomak. ⁴ Iha neba ami buka eskolante sira hodi hela semana ida. Sira dehan fila-fila ba Paulo, housi Espiritu, atu la bele sa’e ro ba Jerusalem. ⁵ Ne’e liu tiha, ami ba oin. Sira hotu hamutuk ho feto no labarik la’o hamutuk ho ami hodi sai housi sidade, no hakneak tiha iha tasi ibun atu harohan, ⁶ ami fo adeus ba malu. Tuir mai, ami sa’e ro no sira fila ba uma.

Iha Tolemaida no Sesareia

                ⁷ Ami ba oin hodi la’o housi Tiro ba Tolome iha nebe ami kumprimenta maun alin sira no hela loron ida ho sira. ⁸ Iha loron nebe tuir mai, ami ba oin hodi to’o Sesareia, iha nebe ami tama ba Filipe evangelista nia uma; nia ne’e sira na’in hitu ida, no ami hela ho nia. ⁹ Nia iha oan feto haat, mesa fetoran, nebe iha kmanek atu hato’o Na’i nia liafuan. ¹⁰ Ami hela iha neba loron ruma ona wainhira profeta ida naran Agabo mai housi Judeia. ¹¹ Nia mosu mai ami, kaer Paulo nia futukabun, kesi nia ain no liman ho nia hodi dehan, “Espiritu Santu dehan nune’e, ‘Nune’e mak ema Judeu sira sei kesi futukabun ne’e nia na’in iha Jerusalem hodi saran nia ba gentiu sira.’” ¹² Rona tiha ne’e, ami no mos ema rai na’in sira husu nia atu la bele ba Jerusalem. ¹³ Paulo hatan, “Imi halo sa ida, hodi tanis no fo laran susar mai ha’u? Ha’u pronto la’os deit atu ema kesi ha’u maibe mos atu mate iha Jerusalem tan Na’i Jesus nia naran.” ¹⁴ Tan nia lakohi rona ami, ami husik ba hodi dehan, “Halo tuir ba Na’i nia hakarak.”

Paulo ho Tiago iha Jerusalem

                ¹⁵ Liu tiha loron hirak ne’e, ami hadia an atu la’o ba oin, hafoin ami ba Jerusalem, ¹⁶ Eskolante balun housi Sesareia mai hamutuk atu la’o ho ami to’o Mnasao nia uma, ema Chipre ida, nebe sai eskolante houri uluk kedas. Ami atu hela iha nia uma.

¹⁷ To’o tiha Jerusalem, maun alin sira simu ami ho laran manas. ¹⁸ Loron tuir mai, Paulo la’o hamutuk ho ami atu hare Tiago, no katuas sira hotu iha neba. ¹⁹ Nia kumprimenta sira, hafoin haktuir ba sira buat hotu nebe Maromak halo tiha iha gentiu sira leet housi nia serbisu. ²⁰ Sira hahi Maromak wainhira sira rona nia, maibe sira dehan ba nia, “Maun, o hare fiarna’in rihun hira iha ema Judeu sira leet no sira halo tuir ukunfuan ho laran badinas. ²¹ Sira rona katak o hanorin ema Judeu sira hotu nebe horik iha gentiu sira leet atu husik Moises no katak o hateten ba sira atu la bele fo sirkunsisaun ba sira nia oan sira ka halo tuir sira nia lisan. ²² Ita sei halo sa? Tebes, sira sei rona katak o to’o mai ona. ²³ Ne’e duni, halo ba buat nebe ami hateten ba o. Ami iha ema na’in haat nebe halo tiha promessa. ²⁴ Lori ema na’in haat ne’e ba hodi hamos o nia laran hamutuk ho sira, no selu buat hotu nebe sira kuran atu sira bele koi sira nia fuuk. Nune’e ema hotu sei hatene katak liafuan nebe sira rona kona ba o la los maibe katak o rasik moris hodi tuir ukunfuan. ²⁵ Kona ba gentiu sira nebe fiar ona, ami haruka ona ami nia hanoin katak sira la bele han naan nebe saran tiha ona ba lulik sira, la bele han ran, no mos naan nebe mai housi balada nebe mate tamba buti nia kakorok, no la bele halo sala foer.” ²⁶ Nune’e, Paulo simu ema sira ne’e, no loron tuir mai, nia hamos tiha nia laran hamutuk ho sira; nia tama iha templu atu fo hatene loron wainhira tempu hamos an nian hotu ona hodi hasa’e buat karan ba sira ida-ida.

Ema kaer  Paulo

                ²⁷ Wainhira loron hitu besik hotu ona, ema Judeu sira housi provinsia Asian nian hare nia iha templu; sira book ema lubun boot no kaer nia, ²⁸ hodi hakilar, “Maluk Israel nia oan sira, tulun ami. Ema ne’e hanorin ema hot-hotu iha fatin hot-hotu hasouru ita nia povu no ita nia ukunfuan no hasouru fatin ne’e. Aat liu tan, nia lori ema gregu sira tama iha templu hodi hafoer fatin santu ne’e. ²⁹ Basa sira hare nanis Trofimo housi Efeso iha sidade hamutuk ho nia no hanoin katak Paulo lori nia tama iha templu laran. ³⁰ Sidade tomak la hakmatek ho ema neba halai hamutuk. Sira kaer Paulo no dada sai nia housi templu, no taka kedas odamatan. ³¹ Wainhira sira buka atu oho nia, ema lori lia ba komandante bataliaun nian katak Jerusalem tomak rungu-ranga. ³² Nia lori kedas soldadu sira hamutuk ho kapitaun sira no asalta ema lubun ne’e. Hare tiha komandante no soldadu sira, sira para baku Paulo. ³³ Komandante bataliaun nian la’o ba oin, kaer nia, no haruka kesi nia ho korente rua; nia buka hatene nia se no nia halo sa ida. ³⁴ Balun dehan buat ida, seluk dehan buat seluk, no tan nia la bele hatene lo-los lialos tan tarutu boot, nia haruka lori Paulo ba sira nia kampu. ³⁵ To’o tiha eskada, soldadu sira lori nia tamba ema lubun dudu maka’as; ³⁶ basa ema lubun tuir nafatin hodi hakilar, “Oho nia!” ³⁷ Wainhira Paulo atu tama iha kampu laran, nia dehan ba komandante, “Ha’u bele dehan buat ida ba o?” Nia hatan, “O koalia lia gregu nian? ³⁸ Ne’e duni o la’os ema Egiptu nebe hahu funu fo-foun ne’e hodi lori ema rihun haat ba rai fuik maran pronto atu oho?” ³⁹ Paulo hatan, “Ha’u ema Judeu ida, housi Tarso iha Silisia, rai na’in sidade boot nian; ha’u husu o atu husik ha’u koalia ba povu sira.” ⁴⁰ Husik tiha nia, Paulo hamriik iha eskada leten no foti nia liman ba povu; wainhira sira nonok ona, nia koalia ba sira ho lia Ebreu.