22

                ¹ Maun alin no aman sira, rona ba buat nebe ha’u atu hato’o ba imi atu defende ha’u.” ² Wainhira sira rona nia koalia ho lia Ebreu sira nonok hotu. ³ “Ha’u ema Judeu, moris iha Tarso iha Silisia no sai boot iha sidade ne’e. Iha Gamaliel nia ain mak ha’u estuda tuir lo-los ita nia bei-ala sira nia ukunfuan no laran badinas ba Maromak, nudar imi hotu ohin ne’e. ⁴ Ha’u fo todan ba Dalan to’o mate, hodi kaer mane ho feto no lori sira ba dadur laran. ⁵ Am’lulik boot sira no Sinedriu tomak bele fo sasin mai ha’u. Basa housi sira mak ha’u simu surat ba maun alin sira no ha’u la’o ba Damasko atu lori fali ba Jerusalem sira hotu nebe iha neba kesi ho korente atu fo kastigu ba sira. ⁶ Tuir dalan, la’o besik ona Damasko, besik meio-dia, teki-teki naroman boot housi lalehan nabilan hale’u ha’u. ⁷ Ha’u monu ba rai no rona lia ida nebe dehan mai ha’u, ‘Saul, Saul, tansa o fo todan mai ha’u?’ ⁸ Ha’u hatan, ‘Na’i, ita se?’ Nia hatan mai ha’u, ‘Ha’u mak Jesus Nazare nebe o fo todan.’ ⁹ Ha’u nia maluk sira hare naroman ne’e maibe sira la rona lia nebe koalia mai ha’u. ¹⁰ Ha’u husu, ‘Ha’u sei halo sa ida, Na’i?’ Na’i hatan mai ha’u, ‘Hamriik ba no la’o ba Damasko, no iha neba ema sei hateten ba o buat hotu nebe fo ona ba o atu halo.’ ¹¹ Tan ha’u la hare tamba naroman nabilan teb-tebes, ha’u nia maluk sira kaer ha’u nia liman to’o tama iha Damasko. ¹² Ema ida naran Ananias, ema nebe halo tuir ukunfuan no ema naran boot iha ema Judeu sira leet iha neba, ¹³ mai hasouru ha’u no hamriik iha neba hodi dehan, ‘Saul, ha’u alin, hare fali ba.’ Iha oras neba kedas, ha’u hare fali hodi hare nia. ¹⁴ Tuir mai nia dehan, ‘Ita bei-ala sira nia Maromak fihir o atu hatene nia hakarak, atu hare Ida nebe Los, no rona nia lia, ¹⁵ basa o sei sai nia sasin ba ema hot-hotu kona ba buat sira nebe o hare no rona. ¹⁶ Oras ne’e, tan sa hein tan? Hamriik ba, simu baptismu no perdua ba o nia sala hodi bolu Nia naran.’ ¹⁷ Wainhira ha’u fila fali ona ba Jerusalem, no ha’u sei resa dau-daun iha templu laran, ha’u sai housi ha’u nia isin no hare Na’i dehan mai ha’u, ‘Lalais, husik kedas Jerusalem basa sira sei la simu o nia sasin kona ba ha’u.’ ¹⁹ Maibe ha’u hatan, ‘Na’i sira rasik hatene katak housi sinagoga ba sinagoga ha’u kaer no hatama ba dadur laran hodi baku sira hotu nebe fiar Ita Boot. ²⁰ No wainhira sira fakar Estevao nia ran, ha’u rasik hamriik iha neba hodi fo ha’u nia laran no tau matan ba ema sira nebe oho nia sira nia hatais.’ ²¹ Tuir mai, Nia dehan mai ha’u, ‘Ba, Ha’u sei haruka o ba dook iha gentiu sira leet.’”

Paulo iha dadur laran

                ²² Sira rona nia to’o nia hateten buat hirak ne’e, hafoin sira hakilar, “Hasai ema ne’e housi rai. Nia la bele moris” ²³ Tan sira hakilar no tuda sira nia unuk no tuda rai ba leten, komandante bataliaun nian haruka lori nia ba kampu laran hodi hameno katak sira sei baku nia atu hatene lo-los tan sa ema sira halo tarutu maka’as hasouru nia. ²⁵ Maibe wainhira sira kesi tiha nia atu baku, Paulo dehan ba senturiaun nebe hamriik besik neba, “Imi bele baku sidadaun Roma nian maski imi seidauk tesi lia ba nia?” ²⁶ Wainhira senturiaun rona ida ne’e, nia ba komandante bataliaun nian hodi dehan, “Ita sei halo sa? Ema ne’e sidadaun Roma nian.” ²⁷ Komandante ba hare nia, hodi dehan, “Dehan took, o sidadaun Roma nian?” “Los,” nia hatan. Komandante hatan fali, “Ha’u sai sidadaun tamba selu osan barak liu.” Paulo dehan, “Ha’u moris nudar sidadaun ida.” ²⁹ Iha oras ne’e kedas, sira nebe atu husu pergunta ba nia dada an housi nia, no komandante mos tauk teb-tebes wainhira nia hatene katak nia sidadaun Roma nian no nia haruka kesi nia.

Paulo iha Sinedriu nia oin

                ³⁰ Iha loron neba tuir mai, tamba nia hakarak hatene lialos kona ba tansa ema Judeu sira lori lia hasouru nia, nia kore nia korente no haruka am’lulik boot no Sinedriu tomak atu halibur malu. Tuir mai, nia lori Paulo no haruka nia hamriik iha sira oin.