23

                ¹ Paulo hateke ba Sinedriu hodi dehan, “Maun alin sira, ho laran mo-mos ha’u moris iha Maromak futar oin to’o loron ne’e.” ² Am’lulik boot Ananias haruka atan sira atu tuku nia ibun. ³ Paulo dehan ba nia, “Maromak sei baku o, muru nebe pinta mutin deit. O tesi duni lia mai ha’u tuir ukunfuan, maibe hasouru ukunfuan mak o haruka ema atu baku ha’u?” ⁴ Atan sira dehan, “O refila Maromak nia am’lulik boot?’ ⁵ Paulo hatan, “Maun alin sira, ha’u la hatene katak nia am’lulik boot. Basa hakerek tiha, ‘O sei la hasara o nia povu nia na’i ulun.”

                ⁶ Maibe wainhira Paulo hatene katak sira balun saduseu no balun fariseu, nia dehan iha Sinedriu nia oin, “Maun alin sira, ha’u fariseu ida; fariseu ida nia oan; ohin ha’u iha ne’e tan hein moris hi’as housi mate sira leet.” ⁷ Wainhira nia dehan ne’e, fariseu no saduseu sira haksesuk malu, no Sinedriu tomak fahe ba rua. ⁸ Basa saduseu sira dehan katak la iha moris hi’as ka anju ka espiritu sira, maibe fariseu sira fiar buat tolu ne’e. ⁹ Rungu-ranga boot mosu no eskriba balun housi fariseu sira hamriik hodi hateten maka’as, “Ami la hetan buat ruma hasouru ema ne’e; keta espiritu ka anju ruma koalia ba nia karik?” ¹⁰ Sira haksesuk malu maka’as, tan ne’e komandante, tauk katak sira sei halo aat ba Paulo, haruka nia soldadu sira atu tun no hasai nia housi sira leet hodi lori nia fali ba kampu. ¹¹ Iha kalan Na’i hamriik iha nia oin hodi dehan, “Aten berani ba! Basa nudar o fo sasin mai Ha’u iha Jerusalem, nune’e mos o sei fo sasin mai Ha’u iha Roma.”

Paulo ba fali Sesareia

                ¹² Iha loron nebe tuir mai, ema Judeu sira hanoin hodi jura atu la bele han ka hemu to’o sira oho tiha Paulo. ¹³ Sira na’in haat nulu resin nebe hanoin atu hala’o ida ne’e. ¹⁴ Sira ba am’lulik boot no katuas sira hodi dehan, “Ami hakotu lia hodi jura atu la bele han to’o tempu nebe ami oho tiha Paulo. ¹⁵ Ohin ne’e kedas, imi, hamutuk ho Sinedriu, ten ke husu komandante, hodi kbiit Sinedriu nian, atu haruka lori Paulo ba imi, hanesan imi hakarak hare nia hahalok di-diak. Ami fali pronto atu oho nia molok nia to’o mai.” ¹⁶ Maibe, Paulo nia bin nia oan mane ida rona kona ba ida ne’e; tan ne’e nia ba tama iha kampu no hateten ba Paulo. ¹⁷ Paulo bolu senturiaun ida no husu, “Lori foinsa’e ne’e ba komandante; nia iha buat ruma atu hato’o ba nia.” ¹⁸ Ne’e duni, nia lori foinsa’e ne’e ba komandante hodi hateten, “Ema nebe iha dadur laran, Paulo, bolu ha’u no husu katak ha’u lori foinsa’e ne’e ba ita; nia iha buat ruma atu hato’o ba ita.” ¹⁹ Komandante kaer nia ho liman, lori nia ketak hodi husu mesa-mesak, “O atu hato’o sa ida mai ha’u?” ²⁰ Nia hatan, “Ema Judeu sira hakarak husu ita atu lori Paulo ba Sinedriu aban, hanesan atu husu lo-los kona ba nia, ²¹ maibe keta fiar sira. Ema haat nulu resin hein nia iha dalan; sira hakotu lia hodi jura atu la bele han ka hemu to’o sira oho tiha Paulo. Sira pronto ona no hein deit ita atu husik nia.” ²² Komandante haruka nia ba hodi dehan ba nia, “Keta fo hatene ba ema ruma katak o hato’o tiha buat ne’e mai ha’u.” ²³ Tuir mai, nia bolu senturiaun na’in rua hodi dehan, “Hadia soldadu atus rua atu ba Sesareia tuku sia kalan ne’e, hamutuk ho soldadu hitu nulu nebe sa’e kuda no emar atus rua tan. ²⁴ Fo kuda ba Paulo atu sa’e no lori nia ho isin diak ba gubernador Felix.” ²⁵ Tuir mai, nia hakerek surat ida hodi dehan, ²⁶ “Claudio Lisias ba gubernador Felix nebe kmanek liu, kumprimentu! ²⁷ Ema Judeu sira kaer no besik atu oho ema ne’e; ha’u ho ha’u nia soldadu sira hasai nia housi sira nia liman wainhira ha’u hatene katak nia sidadaun Roma nian. ²⁸ Ha’u hakarak hatene tan sa sira foti lia hasouru nia tan ne’e ha’u lori nia ba Sinedriu. ²⁹ Ha’u hare katak sira foti lia hasouru nia kona ba sira nia ukunfuan no la’os kona ba buat ruma nebe soi mate ka dadur. ³⁰ Tamba ema fo hatene mai ha’u katak ema hakarak oho ema ne’e, ha’u haruka nia kedas ba ita boot, ha’u fo hatene mos ba sira nebe foti lia hasouru nia atu hato’o ba ita boot sira nia hakarak.”

                ³¹ Nune’e, soldadu sira, tuir komandante nia haruka, lori Paulo no la’o hamutuk ho nia iha kalan ba Antipatride. ³² Iha loron nebe tuir mai, sira fila fali ba kampu, hodi husik sira nebe sa’e kuda atu la’o ba oin ho Paulo. ³³ Wainhira sira to’o tiha Sesareia, sira fo surat ba gubernador no hatudu Paulo ba nia. ³⁴ Lee tiha surat no husu Paulo nia mai housi provinsia ida nebe hodi hatene katak nia housi Silisia, ³⁵ nia dehan,  “Ha’u sei rona kona ba o wainhira sira nebe foti lia hasouru o to’o mai.” Nia haruka atu tau matan ba nia iha Herodes nia pretoriu.