27

Paulo hahu la’o ba Roma

                ¹ Wainhira sira deside ona katak ami sei sa’e ro ba Italia, sira saran Paulo no ema dadur seluk tan ba senturiaun ida naran Julio housi bataliaun Augusto nian. ² Ami sa’e ro ida housi Adramitio nebe atu ba fatin sira iha provinsia Asia nian. Aristarco, ema Masedonia ida housi Tesalonika, la’o hamutuk ho ami. ³ Iha loron tuir mai, ami tama iha Sidonia. Iha neba Julio, ho laran luak, husik Paulo hare nia belun sira nebe simu nia no tau matan ba nia. ⁴ Housi neba, ami sa’e ro no la’o hale’u sorin hakmatek rai kiik Chipre nian tan anin maka’as, ⁵ no hakur tiha tasi luan besik Silisia no Pamfilia, ami to’o Mira iha Lisia.

Anin boot halo aat ro

                ⁶ Iha neba, senturiaun hetan ro ida housi Alexandria nebe atu ba Italia. Nia hatama ami iha ro laran. ⁷ Ba loron barak, ami la’o nei-neik deit, hodi to’o Knido ho susar boot, no tan anin la husik ami atu ba fatin nebe ami hakarak, ami ba rai kiik Kreta nia sorin hakmatek besik Salmona. ⁸ Ami ba nei-neik nafatin ho susar boot no to’o ba fatin ida naran Porto Diak, besik sidade Laseia nian.

                ⁹ Ami lakon tempu barak ona no sa’e ro sai perigosu liu basa tempu jejum liu tiha ona. Ne’e duni, Paulo dehan ba sira, ¹⁰ “Maluk sira, ha’u hare katak ita sei hetan susar barak no lakon la’os deit sasan barak maibe mos ita nia moris.” ¹¹ Maibe senturiaun se tilun ba kapitaun no ba ro nia na’in liu fali ba buat nebe Paulo dehan. ¹² Tamba fatin atu para la diak atu husik tempu malirin nian liu ba, ema barak hanoin atu la’o ba oin housi neba hodi hein atu to’o Fenix, portu ida iha Kreta, fila ba tasi mane no loromonu, no husik tempu malirin nian liu ba iha neba.

                ¹³ Anin housi tasi feto hu’u dau-daun, no hodi hanoin katak ne’e diak, sira foti ankor no ba hodi tuir tasi ibun Kreta nian. ¹⁴ La kleur, anin maka’as liu nebe ema hanaran “Tasi mane - lorosa’e nian” hu’u mai. ¹⁵ Tan ro iha nia laran ona no la bele fila oin ba anin, ami husik deit ba no anin mak lori ami. ¹⁶ Ami liu iha sorin hakmatek rai kiik ida naran Claudia no ami hetan susar atu ukun ro kiik. ¹⁷ Sira hasa’e nia ba ro boot laran, no ho tali boot sira hametin tan ro. Tan sira tauk katak ro kona rai iha fatin besik Sire, sira hatun ankor no ro ba oin hanesan ne’e. ¹⁸ Anin no tasi baku ami maka’as, tan ne’e liu tiha loron rua sira soi sasan balun ba tasi, ¹⁹ no iha loron nebe tuir mai tan, sira soe ho sira liman rasik ro nia katrol. ²⁰ Ami la hare loron ka fitun ba loron barak, basa anin ne’e boot tebes. Ikus mai, ami lakon ona esperansa atu soi ami an.

                ²¹ Wainhira ema barak lakohi han ona, Paulo hamriik iha sira leet hodi dehan, “Maluk sira, imi rona ha’u karik hodi la sai housi Kreta, imi la hetan susar boot ne’e. ²² Maibe oras ne’e ha’u husu imi aten berani ba; basa imi ida mos sei la lakon, ro deit mak sei lakon. ²³ Basa hodi kalan, anju ida housi Maromak nebe ha’u serbi mosu mai, hodi dehan: ²⁴ ‘Keta tauk, Paulo. O sei hamriik iha Cesar nia oin; no hare ba, tamba o, Maromak haraik mos isin diak ba sira hotu nebe la’o hamutuk ho o.’ ²⁵ Ne’e duni, aten berani ba; ha’u fiar iha Maromak katak buat hotu sei mosu hanesan anju hato’o mai ha’u. ²⁶ Ita nia ro sei kona rai besik rai kiik ida.

                ²⁷ Liu tiha loron sanulu resin haat, iha kalan, anin lori ami dau-daun iha tasi Adriatika nian; besik kalan fahe rua, ro na’in sira hahu hanoin katak ami besik rai. ²⁸ Sira sukat no hetan sukat rua nulu; ba uitoan tan ba oin, sira sukat fali hodi hetan sanulu resin lima. ²⁹ Tauk katak ro okos sei kona fatuk iha tasi laran, sira hatun ankor haat housi kotuk hodi harohan atu loron mai lalais. ³⁰ Ro nia emar sira buka atu husik ro; sira hatun ro kiik housi oin. ³¹ Maibe Paulo dehan ba senturiaun no soldadu sira, “Sira ne’e la hela ho ita karik, imi sei lakon hotu.” ³² Ne’e duni, soldadu sira tesi ro kiik nia tali no husik nia monu ba tasi.

                ³³ Paulo fo aten berani nafatin ba ema hotu to’o dader hodi husu sira atu han buat ruma. Nia dehan, “Loron sanulu resin haat ona mak imi hein hodi hamlaha no la han buat ida; ³⁴ ha’u husu imi: han buat ruma ba; ne’e sei tulun imi soi imi an. Imi nia fuuk ida mos sei la lakon.” ³⁵ Dehan tiha ne’e, nia kaer paun, fo agradese ba Maromak iha sira hotu nia oin no hahu han. ³⁶ Sira hotu sai berani hodi han mos buat ruma. ³⁷ Ami hotu iha ro laran ema atus rua hitu nulu resin neen. ³⁸ Wainhira sira han naton ona, sira soe tan trigu ba tasi laran atu halo ro kmaan liu tan.

                ³⁹ Wainhira loron mosu ona, sira la hatene rai ne’e ida nebe, sira buka atu ba fatin diak ida ho tasi ibun raihenek nian. Sira hakarak atu, bele karik, sira sei kona rai iha neba. ⁴⁰ Tan ne’e sira soe ankor sira no husik sira ba tasi, no mos kore tali kamudi nian, no dada laan atu anin kona nia. Nune’e sira ba tasi ibun. ⁴¹ Maibe sira kona rai henek no kona rai kedas. Ro nia oin tama metin no la bele book tan, maibe kotuk hahu tohar tan tasi si’ak maka’as. ⁴² Soldadu sira hanoin atu oho ema dadur hotu atu sira la bele nani no halai lakon, ⁴³ maibe senturiaun hakarak soi Paulo; tan ne’e nia halo buat hotu atu sira la bele oho ema dadur sira. Nia haruka sira nebe bele nani atu haksoit uluk ba tasi laran hodi nani ba tasi ibun, ⁴⁴ tuir mai, sira seluk, balun ho ai-kabelak, balun ho ro nia rahun ruma. Nune’e, ema hotu to’o ba tasi ibun ho isin diak.