28

Tempu rai malirin nian iha Malta

                ¹ Wainhira ami hotu iha tasi ibun ona, ami foin hatene katak rai ne’e nia naran Malta. ² Rai na’in sira simu ami ho laran diak tebes; sira sunu ahi no simu ami hotu basa udan hahu tau no rai malirin tebes. ³ Paulo halibur ai sunu hodi tau sira iha ahi, no samodok ida nebe halai housi ahi nia manas bubar iha Paulo nia liman. ⁴ Wainhira rai na’in sira hare samodok ne’e, sira dehan ba malu, “Ema ne’e oho ema duni; maski nia soi an housi tasi, justisa la husik nia moris. ⁵ Maibe nia doko nia liman no soe samodok fali ba ahi no la hetan buat aat ida. ⁶ Sira hein katak nia isin sei bubu ka monu mate kedas, maibe wainhira sira hein kleur ona no hare katak la iha buat ruma nebe mosu ba nia, sira hanoin oin seluk fali hodi hahu dehan katak nia maromak ruma. ⁷ Besik neba iha rai nebe ema ida nian, naran Publio, rai ne’e nia liurai. Nia simu ami no tau matan mai ami  nudar nia bainaka ba loron tolu. ⁸ Publio nia aman moras isin manas no kabun dulas. Paulo ba hare nia, no harohan tiha, nia tau liman ba nia no halo nia isin diak fali. ⁹ Ne’e hotu tiha, ema moras sira hotu iha rai ne’e hakbesik Paulo no hetan isin diak. ¹⁰ Sira fo naran boot mai ami no wainhira ami atu sa’e ro fali, sira lori mai ami sasan hotu nebe ami kuran.

Paulo iha Roma

                ¹¹ Liu tiha fulan tolu, ami sa’e ro nebe hela mos iha nebe iha tempu rai malirin tomak nia laran. Ro ne’e housi Alexandria. Iha nia oin mak Dioscoro nia ilas. ¹² Ami to’o Sirakusa no hela neba loron tolu, ¹³ no housi neba, ami ba tuir tasi ibun to’o Regio. Liu tiha loron ida, anin housi tasi mane hu’u mai no iha loron rua nia laran ami to’o Puteolos. ¹⁴ Iha neba ami hetan maun alin balun no sira husu ami atu hela ho sira ba loron hitu. Nune’e ami to’o Roma. ¹⁵ Maun alin sira housi Roma rona kona ba ami no sira mai hasouru ami to’o Apio nia foru no Taverna Tolu.  Wainhira nia hare sira, Paulo fo agradese ba Maromak no sai aten berani fali. ¹⁶ Wainhira nia tama iha Roma, soldadu husik Paulo moris mesak, ho soldadu ida deit atu tau matan ba nia.

Sasin ba ema Judeu sira iha Roma

                ¹⁷ Liu tiha loron tolu, nia bolu hamutuk ema Judeu sira nia na’i ulun. Halibur an hamutuk ona, nia dehan ba sira, “Maun alin sira, maski ha’u la halo buat aat ida hasouru ita nia povu ka ita bei-ala sira nia lisan, ema saran ha’u ba Romanu sira nia liman nudar ema dadur ida housi Jerusalem. ¹⁸ Wainhira Romanu sira hare di-diak ha’u nia kasu, sira hakarak husik ha’u basa sira la hetan buat ruma nebe soi mate. ¹⁹ Maibe wainhira ema Judeu sira lakohi, ha’u ten ke husu atu hare Cesar, maski ha’u la iha lia atu foti hasouru ha’u nia nasaun rasik. ²⁰ Tan ne’e mak ha’u husu atu hare imi no koalia ba imi, basa tan esperansa Israel nian mak ha’u lori korente sira ne’e. ²¹ Sira hatan, “Ami la simu surat ruma housi Judeia kona ba o; la iha maun eh alin ida nebe to’o mai ho lia menon aat ruma ka buat aat ruma kona ba o. ²² Maibe ami hakarak rona o hato’o o nia hanoin, basa ami hatene katak iha fatin hotu ema hateten aat  kona ba religiaun foun ne’e.”

                ²³ Nune’e sira marka loron ho nia no ema barak halibur an iha nia uma. Housi dadersan to’o kalan boot, nia hato’o nia hanorin ba sira, hodi fo sasin ba Maromak nia reinu no housi Moises no profeta sira, nia buka atu halo sira fiar duni kona ba Jesus. ²⁴ Balun fiar duni buat nebe nia hateten, maibe balun lae. ²⁵ Hodi la hetan neon ida deit, sira hahu fila ba uma; ikus mai, Paulo dehan, “Lo-los mak Espiritu Santu koalia ba imi nia bei-ala sira housi profeta Isaias hodi dehan: ²⁶ ‘La’o ba povu ne’e no dehan: Imi sei rona duni maibe la komprende; imi sei hare duni maibe la hatene. ²⁷ Basa povu ne’e nia fuan tos liu; sira nia tilun sei la rona mos; sira taka tiha sira nia matan atu sira la bele hare ho sira nia matan no rona ho sira nia tilun no komprende ho sira nia fuan hodi fila fali ba Ha’u atu fo isin diak ba sira.’ ²⁸ Imi hatene ba katak Maromak haruka tiha ona ba gentiu sira nia maksoin ne’e; sira sei rona.” ²⁹ Wainhira nia dehan tiha liafuan sira ne’e, ema Judeu sira husik nia hodi haksesuk malu maka’as iha sira leet.

                        ³⁰ Paulo hela iha nia uma ba tinan rua iha nia uma rasik. Nia simu sira hotu nebe hakbesik nia, ³¹ ho laran metin no la hetan susar ruma, nia haklaken Maromak nia reinu no hanorin kona ba Na’i Jesus Kristu.