4

Abraao sai ema los tan fiar

                ¹ Ita bele dehan sa kona ba Abraao, ita bei-ala tuir isin? ² Abraao sai ema los tan nia hahalok karik, nia bele gaba an; maibe Maromak la hare hanesan ne’e. ³ Eskritura dehan sa? “Abraao fiar Maromak, no Maromak sura ne’e nudar justisa.” ⁴ Ema la sura serbisu na’in nia kolen nudar presente ida, maibe nudar buat nebe nia soi atu simu. ⁵ Maibe wainhira ema la serbisu, maibe fiar iha Ida nebe halo los ema nebe la hatene Maromak, nia fiar sei sura nudar justisa. ⁶ Nune’e mak David fo sai katak ema rahun diak wainhira Maromak sura nia justisa ketak housi nia hahalok: ⁷ “Rahun diak ba sira nebe hetan perdua ba sira nia hahalok aat no sira nia sala taka tiha, ⁸ rahun diak ba ema nebe Maromak la hakerek nia sala.”

                ⁹ Justisa ne’e ba ema nebe simu tiha sirkunsisaun deit ka ba mos ema nebe la simu sirkunsisaun? Ita dehan katak Abraao nia fiar sura tiha nudar justisa. ¹⁰ Iha situasaun sa mak sura nia? Nia simu tiha sirkunsisaun ka lae? Nia la simu sirkunsisaun, nia isin sei tomak. ¹¹ Maibe nia simu tiha sinal sirkunsisaun nian nudar prenda ba nia justisa  housi fiar, wainhira nia seidauk simu sirkunsisaun. Nune’e nia sai aman ba sira hotu nebe la simu sirkunsisaun nebe fiar atu ba sira hotu mos bele sura justisa, ¹² nune’e mos aman ba sira nebe simu sirkunsisaun nebe la simu deit sirkunsisaun maibe mos halo tuir dalan fiar nian nebe ita aman Abraao la’o tuir wainhira nia seidauk simu sirkunsisaun.

Liman rohan  housi fiar

                ¹³ La’os  housi  ukunfuan mak Maromak hakotu lia ba Abraao no nia bei-oan sira katak nia sei simu mundu, maibe housi justisa nebe mai housi fiar. ¹⁴ Basa sira nebe fiar metin ukunfuan karik mak liman rohan na’in, fiar folin la iha no promessa mos folin laek. ¹⁵ Basa ukunfuan lori laran nakali; maibe iha nebe  ukunfuan la iha, la bele la halo tuir nia. ¹⁶ Tan ne’e, buat ne’e mosu  housi fiar, atu nia bele sai presente ida, no promessa bele mosu duni ba nia bei-oan hotu, la’os deit ba sira nebe laran metin ba  ukunfuan, maibe sira nebe la’o tuir fiar Abraao nian, ita hotu nia aman, ¹⁷ nudar hakerek nanis: “Ha’u halo tiha o sai aman ba nasaun barak.” Nia mak ita nia aman iha Maromak futar oin; iha Nia mak Abraao fiar; Nia mak ida nebe fo moris ba ema mate sira no bolu atu mosu buat nebe la iha. ¹⁸ Abraham fiar, hodi hein maski la iha ona esperansa, katak nia sei sai “aman ba nasaun barak” tuir buat nebe hateten nanis: “Nune’e o nia bei-oan sira sei mosu mai.” ¹⁹ Nia fiar la namlele maski nia hare nia isin rasik kbiit la iha ona, (basa nia besik tinan atus ida ona) no Sarah nia knotak mate ona. ²⁰ Nia fiar nafatin Maromak nia promessa; hodi fiar, nia hetan kbiit no fo gloria ba Maromak, ²¹ no laran metin teb-tebes katak buat nebe Maromak hakotu tiha, Nia bele halo tuir duni. ²² Tan ne’e mak buat ne’e sura ba nia nudar justisa. ²³ Maibe la’os ba nia deit mak hakerek katak “buat ne’e sura ba nia”, ²⁴ sei sura mos mai ita, nebe fiar iha Ida nebe foti Jesus, ita Na’i housi mate, ²⁵ nebe saran tiha tan ita nia sala sira no moris  hi’as fali atu ita sai ema los.