8

Isin no espiritu

                ¹ Ne’e duni, la iha lia kastigu nian ba sira nebe iha Kristu Jesus. ² Basa  ukunfuan espiritu moris nian iha Kristu Jesus hasai ona imi housi ukunfuan sala no mate nian. ³ Basa buat nebe ukunfuan la bele halo tamba kuran kbiit tan isin, Maromak halo tiha hodi haruka nia Oan Mane iha isin nudar ilas ema maksalak nian, no tan sala, tesi lia todan ba sala iha isin, ⁴ atu nune’e buat los nebe ukunfuan haruka bele halo tuir duni iha ita nebe moris, la’os tan tuir isin, maibe tuir espiritu. ⁵ Basa sira nebe moris tuir isin hanoin deit buat nebe isin nian, maibe sira nebe moris tuir espiritu, hanoin buat nebe espiritu nian. ⁶ Isin nia hanoin mak mate, maibe espiritu nia hanoin mak moris no dame. ⁷ Basa isin nia hanoin mak atu funu malu ho Maromak; nia lakohi halo tuir Maromak nia ukunfuan; nia la bele duni; ⁸ no sira nebe horik iha isin labele monu los ba Maromak nia laran. ⁹ Maibe imi la horik iha isin; lo-los imi iha espiritu wainhira Maromak nia espiritu horik iha imi. Ema nebe la iha Kristu nia espiritu iha nia, la’os Kristu nian. ¹⁰ Maibe Kristu iha imi karik, maski isin mate ona tamba sala, espiritu moris hela tan justisa. ¹¹ Na’i, nebe halo Jesus moris  hi’as housi mate, nia espiritu horik iha imi karik, ida nebe halo Kristu moris  hi’as fali sei fo moris mos ba imi nia isin nebe bele mate,  housi espiritu nebe horik iha imi. ¹² Ne’e duni, maun alin sira, ita la iha tusan ba isin, atu moris tuir isin. ¹³ Imi moris tuir isin karik, imi sei mate; maibe tuir espiritu, imi oho karik isin nia hahalok, imi sei moris.

Maromak nia oan hakiak

                ¹⁴ Sira nebe Maromak nia espiritu mak ukun mak Maromak nia oan sira. ¹⁵ Basa imi la simu espiritu atan nian nebe halo imi tauk, maibe imi simu espiritu oan hakiak nian, tan ne’e, ita haklaken: “Abba, Aman!” ¹⁶ Espiritu rasik fo sasin ho ita nia neon katak ita Maromak nia oan; ¹⁷ no oan karik, ne’e duni liman rohan na’in, liman rohan na’in Maromak nian no liman rohan na’in hamutuk ho Kristu; naran ita terus hamutuk ho Nia atu ita mos bele hetan naran boot hamutuk ho Nia

Terus ohin ne’e nian

                ¹⁸ Ha’u hare terus ohin ne’e nian nudar kiik liu wainhira tau hamutuk ho gloria nebe atu sei hatudu mai ita. ¹⁹ Basa mundu tomak hein mana-manas tempu wainhira sei hatudu Maromak nia oan sira, ²⁰ basa mundu tomak sai tiha folin laek, la’os tan nia rasik hakarak, maibe tamba Ida nebe halo nia sai nune’e nia hakarak iha esperansa; basa mundu ne’e sei sai housi situasaun atan nian nebe sei dodok, hodi halo parte, nudar Maromak nia oan,  iha ema nebe la’os atan nia kmanek. ²² Ita hatene katak ohin ne’e mos mundu tomak hakilar tanis hanesan feto nebe atu tur ahi; ²³ no la’os mundu deit; maibe ita mos tanis hakilar iha ita nia laran wainhira ita, nebe iha ona espiritu nia fuan uluk nian, hein dau-daun tempu nebe Maromak sei hakiak ita, katak tempu nebe ita nia isin sei sai la’os atan ona. ²⁴ Basa iha esperansa mak ita hetan maksoin. Esperansa nebe hare ho matan rasik la’os esperansa. Se mak iha esperansa ba buat nebe nia hare ona?  ²⁵ Maibe ita iha esperansa kona ba buat nebe ita la hare karik, ita hein ho pasiensia.

                ²⁶ Nune’e mos, Espiritu tulun ita nebe kbiit laek, basa ita la hatene harohan lo-los, maibe Espiritu rasik harohan hodi tanis hakilar maka’as hanesan liafuan la bele hato’o. ²⁷ No Ida nebe hatene mo-mos ema nia fuan hatene buat nebe iha Espiritu nia laran, basa Espiritu harohan ba ema santu sira tuir Maromak nia hakarak.

Maromak nia domin iha Kristu

                ²⁸ Ita hatene katak buat hot-hotu lori ba diak ba sira nebe hadomi Maromak; sira nebe Maromak bolu tuir Nia hakarak. ²⁹ Basa sira nebe Nia hatene nanis ona, nia fo ona destinu atu sai nia Oan Mane nia ilas, atu Nia bele sai oan boot liu iha maun alin barak sira leet. ³⁰ No sira nebe Nia fo destinu nanis ona, Nia bolu mos; no sira nebe Nia bolu, Nia mos halo ema los; no sira nebe Nia halo ema los, Nia mos fo naran boot.

                ³¹ Ne’e duni, ita bele dehan sa kona ba ne’e? Maromak hamutuk ho ita karik, se mak bele hasouru ita? ³² Nia nebe la hanoin Nia Oan Mane, maibe saran Nia tamba ita hotu, oin sa Nia sei la fo buat seluk hotu hamutuk ho Nia? ³³ Se mak atu foti lia hasouru sira nebe Maromak fihir ona? Maromak mak ida nebe halo los. ³⁴ Se mak tesi lia todan hasouru ita? Kristu (Jesus) nebe mate, liu! Nia moris  hi’as, nebe hatodan An iha Maromak nia kuana, nebe harohan duni tan ita. ³⁵ Buat sa mak sei haketak ita  housi Kristu? Laran susar, ka laran taridu, ka ema duni todan, ka hamlaha ka hatais la iha; ka perigu, ka surik? ³⁶ Nudar hakerek nanis: “Tan imi, ema oho ami loron tomak; ema hare ami hanesan bibi nebe atu oho ona.” ³⁷ Lae, iha buat hotu ne’e ita liu fali sira nebe manan housi Nia nebe hadomi ita. ³⁸ Basa ha’u fiar lo-los katak mate ka moris, anju ka lalehan nia kbiit na’in sira; ka sasan ohin ne’e nian ka buat aban bainrua nian; ³⁹ ka kbiit na’in sira, ka fatin aas, ka fatin klean, ka buat seluk tan nebe Maromak halo bele haketak ita  housi Maromak nia domin, iha Kristu Jesus, ita Na’i.