11

Israel nia rahun

              ¹ Ne’e duni, ha’u husu: Maromak hewai ona nia povu? Lae! Basa ha’u mos ema Israel ida, Abraao nia bei-oan, housi suku Benjamin nian. ² Maromak la hewai Nia povu nebe Nia hatene nanis ona. Imi la hatene buat nebe Eskritura dehan kona ba Elias, oin sa nia harohan ho laran ba Maromak hasouru Israel?  ³ “Na’i, sira oho tiha ita nia profeta sira, sira sobu tiha Ita nia altar sira, no ha’u mesak mak hela, no sira buka halakon ha’u nia moris.” ⁴ Maibe Maromak hatan sa ida ba nia? “Ha’u haketak ba Ha’u nia an ema rihun hitu nebe la tuku tur ba Baal.” ⁵ Nune’e mos ohin ne’e iha ema balun nebe sei hela, nebe Maromak fihir tan grasa. ⁶ Maibe tan grasa karik, ne’e katak la’os tan hahalok ona; lae karik, grasa la’os grasa ona. ⁷ Ne’e duni?  Israel la hetan buat nebe nia buka; maibe sira nebe Na’i fihir hetan nia; sira seluk sai ema laran tos, ⁸ nudar hakerek nanis: “Maromak halo sira matan dukur liu, fo ba sira matan nebe la bele hare no tilun nebe la bele rona, to’o loron ne’e.” ⁹ David dehan tan, “Husik sira nia meja sai lasu atu kaer, fatuk atu sidi no buat todan ba sira; ¹⁰ sira nia matan sei sai nakukun atu nune’e sira la bele hare, no sira nia kotuk sei hakru’uk ba nafatin.”

Maksoin ba ema gentiu sira

                ¹¹ Ne’e duni ha’u husu, sira ne’e sidi atu monu, ka? Lae! Maibe housi sira nia sala, maksoin to’o  ba ema gentiu sira, nune’e halo sira laran moras. ¹² Sira nia sala haburas mundu karik, no tan sira sai uitoan deit mak hawain gentiu sira nia kmanek liu tan, ne’e sei sai oin sa liu tan wainhira sira tama hotu? ¹³ Ohin, ha’u koalia ba imi, ema gentiu sira. Nudar ha’u mak apostolu ba gentiu sira, ha’u hahi an iha ha’u nia serbisu ¹⁴ atu halo ha’u nia povu laran moras no nune’e bele soi sira balun. ¹⁵ Basa tan Na’i hewai sira karik mak lori perdaun ba mundu, wainhira Na’i simu sira sei la sai moris  housi mate? ¹⁶ Fuan uluk nian santu karik, ne’e katak fuan seluk mos santu; no abut santu karik, ne’e katak sanak sira mos.

                ¹⁷ Maibe sanak balun tohar karik, no imi, ai oliveira fuik nia sanak, hatama fali iha nia fatin hodi halo parte iha abut buras ai oliveira ne’e, ¹⁸ keta gaba an hasouru sanak seluk; imi gaba an karik, hanoin katak la’os imi mak haburas abut maibe abut  mak haburas imi. ¹⁹ Tebes duni, imi sei dehan, “Sanak hatohar tiha atu bele hatama ha’u.” ²⁰ Nune’e duni. sanak sira ne’e hatohar tiha tan sira la fiar, maibe imi hamriik metin iha neba tan fiar deit. Ne’e duni, keta foti an, maibe hamriik ba hodi tauk. ²¹ Basa, Maromak la hanoin sanak lo-los karik, Nia sei la hanoin mos imi. ²² Ne’e duni, hare ba Maromak nia laran luak no nia laran nakali: laran nakali ba sira nebe monu; maibe laran luak ba imi, naran  imi hela nafatin iha Nia laran luak; lae karik, imi mos sei hatohar tiha. ²³ Sira mos, sira la hela nafatin iha sira nia fiar laek karik, Na’i sei hatama sira, basa Maromak iha kbiit hatama sira fali. ²⁴ Basa imi nebe mai housi ai oliveira fuik karik, no, la hanesan bai-bain, hatama tiha ba ai oliveira diak ida; liu tan mak sira bele tama fali iha ai oliveira diak nebe lo-los sira nian ona.

Maromak mak bolu

                ²⁵ Ha’u hakarak katak imi hatene di-diak misteriu ne’e, maun alin sira, atu imi la bele sai matenek hodi foti an. Ema Israel balun sai ona laran tos to’o tempu nebe gentiu sira tama to’o  wa’in  lo-los, ²⁶ no nune’e mak Israel tomak sei hetan maksoin, nudar hakerek nanis: “Na’i Maksoin sei sai  housi Siao, Nia sei halakon fiar laek housi Jacob;” ²⁷ no “ne’e mak moruk nebe Ha’u sei halo ho sira wainhira Ha’u sei kasu sira nia sala.”

                ²⁸ Tuir evangeliu, sira Maromak nia funubalun ba imi nia diak; maibe tuir buat nebe Maromak fihir, sira Maromak nia doben tan sira nia bei-ala sira. ²⁹ Basa wainhira Maromak fo no bolu, la bele hasai fali.

Maromak nia laran luak sei manan

                ³⁰ Nudar uluk imi la halo tuir Maromak nia hakarak, maibe ohin imi simu ona laran luak tan sira nia ulun tos, ³¹ nune’e mos sira la tuir ohin ne’e atu, tan laran luak nebe Na’i hatudu ba imi, sira mos sei hetan laran luak. ³² Basa Maromak saran ema hot-hotu atu sai ulun tos, atu Nia bele hatudu nia laran luak ba sira hotu.

                ³³ Ah, riku soi no hatene no matenek wa’in Maromak nian klean teb-tebes! Ita nia hanoin la to’o wainhira Nia tesi lia; Nia dalan ita la bele hatene! ³⁴ “Basa ema se mak bele hatene Na’i nia hanoin; ka ema se mak hanorin Nia?” ³⁵ “Ka se mak fo ba Nia buat ruma hodi hein atu simu fali?” ³⁶ Basa, housi Nia no tan Nia no ba Nia mak buat hotu. Ba Nia gloria ba nafatin. Amen.