12

Sakrifisiu isin no klamar nian

                ¹ Ne’e duni, ha’u husu imi, maun alin sira, tan Maromak nia laran luak wa’in, atu saran imi nia isin nudar sakrifisiu moris nian, santu no buat nebe Maromak bele simu; katak buat karan espiritual nian. ² Keta halo tuir mundu ohin ne’e nian maibe nakfila an hodi hafoun imi nia hanoin, atu imi bele hatene lo-los buat nebe Maromak hakarak, buat nebe diak, bele simu no los.

Isin nia liman ain

                ³ Tan grasa nebe ha’u simu, ha’u dehan ba imi hotu keta hanoin katak imi an diak liu fali buat nebe los; maibe hanoin lo-los, ida-ida tuir sasukat fiar nian nebe Maromak haraik. ⁴ Basa, nudar iha isin lolon ida deit iha liman ain barak, no ida-ida iha nia knaar, ⁵ nune’e mos, ita, maski ita barak, isin lolon ida deit iha Kristu no liman ain ba malu.

                ⁶ Tan ita iha kmanek oi-oin, ida-ida tuir buat nebe grasa fo mai ita; ita usa sira: se mak hato’o Maromak nia liafuan karik, koalia ba tuir ita nia fiar; ⁷ se mak serbi ema seluk, serbi duni ba; se mak hanorin, hanorin duni ba; ⁸ se mak fo konseliu, fo konseliu duni ba; se mak fo tulun ba ema seluk, fo ba ho laran luak; se mak ukun ema seluk, halo ba ho badinas; se mak hatudu laran luak, halo ba ho laran ksolok.

Hadomi malu

                ⁹ Domin la bele bosok, hadook buat aat housi imi nia laran; kaer metin buat nebe diak; ¹⁰ hadomi malu ho domin los; buka atu sai uluk atu hamtauk maluk sira. ¹¹ Keta baruk atu fo tulun, maibe laran manas nafatin iha espiritu, serbi Na’i ba. ¹² Haksolok iha esperansa, tahan iha terus laran; la kole atu harohan. ¹³ Wainhira santu sira kuran buat ruma, fo ba; simu ba ema be la’o rai. ¹⁴ Dehan liafuan diak ba sira nebe halo aat imi; fo rahun diak no keta fo malisan ba sira. ¹⁵ Haksolok ho sira nebe haksolok, tanis ho sira nebe tanis. ¹⁶ Respeita malu; keta loko an, maibe habelun ema kiak no kiik sira; keta hanoin katak imi matenek liu fali ema seluk. ¹⁷ Keta selu aat ho aat ba ema; buka buat nebe los iha ema hot-hotu nia oin. ¹⁸ Bele karik, housi imi nia sorin, buka atu moris iha dame laran ho ema hot-hotu. ¹⁹ Doben sira, keta buka atu halo aat ba ema nebe halo aat ba imi, maibe saran buat hotu ba Maromak nia hirus, basa hakerek tiha, “Ha’u mak selu aat ba aat, Ha’u sei selu fali. Na’i dehan nune’e.” ²⁰ Maibe, “O nia funubalun hamlaha karik, fo han nia; nia hamrook karik, fo hemu nia; basa hodi halo nune’e, o sei tau ahi-klak lakan iha nia ulun nia leten.” ²¹ Keta husik buat aat manan imi, maibe imi manan buat aat ho buat nebe diak.