15

Pasiensia no laran maka’as

                ¹ Ita nebe maka’as sei iha pasiensia ba ema kbiit laek nia sala, hodi la buka ita rasik nia ksolok. ² Ita ida-ida buka atu fo ksolok ba ita nia maluk, atu hetan diak, atu harii. ³ Basa Kristu la buka fo ksolok ba Nia an, maibe, nudar hakerek nanis, “Lia hasara  housi sira nebe hasara imi sei monu ba Ha’u.” ⁴ Basa buat nebe uluk hakerek tiha ona, hakerek duni atu hanorin ita, atu ho laran maka’as iha terus no ho ksolok nebe mai  housi Eskritura, ita bele hetan esperansa. ⁵ Maromak pasiensia no ksolok nian tulun imi moris hodi buka dame ho maluk sira, tuir Kristu Jesus, ⁶ atu ho neon ho laran ida deit, imi bele hahi ho lia ida deit, Maromak no ita Na’i Jesus Kristu nia Aman.

Maromak nia laran metin no laran luak       

⁷ Ne’e duni, simu malu nudar Kristu simu imi, ba Maromak nia gloria. ⁸ Basa ha’u dehan katak Kristu sai atan ba sira nebe simu tiha sirkunsisaun atu hatudu katak Maromak la bosok, no atu hametin lia nebe Maromak hakotu ba bei-ala sira, ⁹ maibe atu gentiu sira bele hawelok Maromak tan nia laran luak. Nudar hakerek tiha, “Ne’e duni, ha’u sei hahi Ita boot iha gentiu sira leet, no hananu knananuk hahi nian ba Ita nia naran” ¹⁰ no dala ida tan, “Haksolok ba, gentiu sira, ho Nia povu.”  ¹¹ Dala ida tan,  “Hahi Na’i ba, imi, gentiu sira no povu sira hotu, hahi Nia ba.” no ¹² dala ida tan Isaias dehan:  “Jesse nia abut sei mai, nebe foti tiha atu ukun gentiu sira; iha Nia mak gentiu sira hetan esperansa.” ¹³ Maromak esperansa nian halo imi nakonu ho ksolok hotu no dame tamba imi fiar, atu imi hetan esperansa wa’in liu tan housi kbiit Espiritu Santu nian.

Apostolu ba gentiu sira

                ¹⁴ Ha’u rasik hatene lo-los kona ba imi, maun-alin sira, katak imi laran diak tebes duni, ho matenek hotu no hatene fo konseliu diak ba malu. ¹⁵ Maibe ha’u hakerek ba imi  ho lia maka’as uitoan kona buat ruma atu fo hanoin imi, tan grasa nebe Maromak fo tiha ona mai ha’u, ¹⁶ atu sai Kristu Jesus nia atan ba gentiu sira hodi hala’o knaar am’lulik nian kona ba Maromak nia evangeliu atu gentiu sira nia buat karan bele monu los ba Maromak nia laran, no Espiritu Santu halulik nia. ¹⁷ Ne’e duni, iha Kristu Jesus, ha’u bele hahi an kona ba buat nebe Maromak nian. ¹⁸ Basa ha’u la berani atu koalia kona ba buat seluk; ha’u koalia deit kona ba buat nebe Kristu halo housi ha’u atu lori gentiu sira atu halo tuir ho liafuan no hahalok, ¹⁹ tan kbiit sinal no milagre sira, tan Maromak nia Espiritu nia kbiit, atu nune’e,  housi Jerusalem to’o Iliriko ha’u haklaken tiha Kristu nia evangeliu. ²⁰ Nune’e ha’u hakarak haklaken evangeliu la’os iha fatin nebe Kristu nia naran to’o ona, atu ha’u la bele harii iha aliserse nebe ema seluk harii ona, ²¹ nudar hakerek tiha, “Sira nebe ema seidauk koalia kona ba Nia sei hare; no sira nebe seidauk rona kona ba Nia sei komprende.”

Paulo hakarak hare sira

                ²² Tan ne’e mak dala barak ha’u la bele la’o ba imi. ²³ Maibe ohin ne’e, ha’u la bele halo tan buat ida iha fatin ne’e, no tamba ba tinan barak ona ha’u hakarak ba hare imi, ²⁴ ha’u hein hare imi tuir dalan ba Espania; no wainhira ha’u haksolok ona ho imi ba tempu ruma, imi sei hare ha’u la’o tuir dalan housi neba. ²⁵ Maibe, oras ne’e, ha’u sei ba Jerusalem atu serbi santu sira iha neba. ²⁶ Basa Masedonia no Akaia halibur osan atu fo ba santu sira nebe kiak iha Jerusalem, ²⁷ sira hakarak halo, no lo-los, sira iha tusan ba sira, basa ema gentiu sira karik hetan parte iha bensa espiritual, sira ten ke serbi sira mos kona ba bensa isin nian. ²⁸ Tan ne’e, wainhira ha’u halo tiha ida ne’e no saran tiha ho isin diak osan ne’e ba sira, ha’u sei la’o housi imi ba Espania, ²⁹ no ha’u hatene katak, hodi ba hare imi, ha’u sei hetan Kristu nia bensa tomak lo-los.

                ³⁰ Ha’u husu imi ho laran, maun alin sira, tan ita Na’i Jesus Kristu no tan domin Espiritu Santu nian, atu imi ida deit ho ha’u iha ha’u nia haka’as an, housi imi nia harohan ba Maromak ba ha’u nia diak, ³¹ atu ha’u la bele monu ba ema ulun tos sira iha Judeia, no atu santu sira iha Jerusalem simu ha’u nia serbisu, ³² atu ha’u bele ba hare imi ho ksolok tan Maromak nia hakarak hodi hafoun ha’u an hamutuk ho imi. ³³ Maromak dame nian hela ho imi hotu. Amen.