7

Lia menon ba kaben na’in sira

                ¹ Oras ne’e, kona ba buat sira nebe imi hakerek, “Buat diak ba mane ida atu la bele hola feto,” ² maibe tan babeur kona ba sala foer, diak liu mane ida-ida hola feto, no feto ida-ida hola mane. ³ Laen sei halo tuir nia knaar ba nia fen, no nune’e mos, fen sei halo tuir nia knaar ba nia laen. ⁴ Feto ida la ukun nia isin rasik, maibe nia laen mak ukun; nune’e mos, mane ida la ukun nia isin rasik, maibe nia fen mak ukun. ⁵ Keta nega malu, maibe haketak malu deit wainhira imi na’in rua mak hakarak ba tempu ruma, atu bele harohan, maibe fila fali ba malu, atu nune’e Satanas la bele babeur imi tan imi la bele ukun an. ⁶ Ha’u dehan ne’e, la’os hodi haruka, maibe deit hanesan lia menon. ⁷ Los duni, ha’u hakarak katak ema hot-hotu hanesan ha’u, maibe ema ida-ida simu nia kmanek housi Maromak, ema ida kmanek ida, ema seluk kmanek seluk.

                ⁸ Ohin ne’e, ba sira nebe la kaben no ba feto faluk sira, ha’u dehan katak diak liu ba sira atu hela mesak, hanesan ha’u; ⁹ maibe sira la bele ukun an karik, diak liu sira kaben fali atu la bele lakan hanesan ahi ho hakarak aat. ¹⁰ Maibe ba kaben na’in sira, ha’u fo liafuan ida ne’e: la’os ha’u, maibe Na’i,  fen ida la bele haketak an housi nia laen; ¹¹ maibe nia haketak an karik, nia ten ke hela mesak ka hadame malu fali ho nia laen; no laen ida la bele soe nia fen.

                ¹² Ba sira seluk ha’u, la’os Na’i, dehan: maun alin ida iha fen karik nebe la’os fiarna’in, no nia hakarak moris hamutuk ho nia nafatin, laen ne’e la bele soe nia fen; ¹³ feto ida iha laen karik nebe la’os fiarna’in, no laen ne’e hakarak moris nafatin ho nia, feto ne’e la bele soe nia laen. ¹⁴ Basa laen nebe la’os fiarna’in sai santu housi nia fen; no fen nebe la’os fiarna’in sai santu housi nia laen. La nune’e karik, imi nia oan sira sei sai foer, maibe lo-los sira santu.

                ¹⁵ Maibe ema nebe la’os fiarna’in haketak malu karik, nia bele haketak malu. Nune’e maun alin ka bin feton la kesi tiha ona; basa Maromak bolu imi ba dame. ¹⁶ Basa, na’in feto, oin sa o hatene, katak o sei soi o nia laen; ka mane, oin sa o hatene, katak o sei soi o nia fen?

Na’i nia kmanek ba ema ida-ida                      

                ¹⁷ Ema ida-ida sei moris nudar Na’i haruka, nudar Maromak bolu imi ida-ida. Ha’u fo sai ukunfuan ida ne’e iha kreda hot-hotu. ¹⁸  Ema simu ona sirkunsisaun karik wainhira Maromak bolu nia? Ema ne’e lalika halakon sinal nia sirkunsisaun nian. Ema seidauk simu karik sirkunsisaun wainhira Maromak bolu nia? Ema ne’e lalika buka sirkunsisaun. ¹⁹ Basa sirkunsisaun ka la iha sirkunsisaun la halo buat ida, buat nebe folin liu mak halo tuir Maromak nia ukunfuan. ²⁰ Ema ida-ida sei hela hanesan wainhira Maromak bolu nia.

                ²¹ O atan wainhira Maromak bolu o? La halo buat ida. Maibe o bele sai la’os atan ona karik, buka atu sai ema nebe la’os atan. ²² Basa atan nebe Na’i bolu mak ema nebe la’os atan iha Na’i, no ema nebe la’os atan nebe Maromak bolu mak Kristu nia atan. ²³ Maromak sosa ona imi ho folin boot. Keta sai atan ba ema sira. ²⁴ Ne’e duni, maun alin sira, iha Maromak futar oin, ema ida-ida sei hela hanesan wainhira Maromak bolu nia.

Lia menon ba fetoran no feto faluk

                ²⁵ Oras ne’e, kona ba sira nebe la kaben, ha’u la iha ukunfuan housi Na’i, maibe ha’u fo sai ha’u nia hanoin nudar housi ema nebe tan Na’i nia laran luak, sai ema nebe bele fiar. ²⁶ Ha’u hanoin katak iha susar laran ohin loron nian, diak duni ba ema ida atu hela hanesan ohin. ²⁷ O iha fen? Keta buka haketak an. O la iha fen? Keta buka hola feto. ²⁸ Maibe o hola feto karik, o la sala ida, nune’e mos, feto nebe la iha laen la sala wainhira nia hola mane; maibe ema sira ne’e sei hetan susar iha sira nia moris iha rai, no ha’u hakarak katak imi la hetan susar ne’e.

                ²⁹ Ha’u dehan ba imi, maun alin sira, katak tempu badak liu ona. Houri ohin ba oin, sira nebe iha fen moris hanesan sira fen la iha, ³⁰ sira nebe tanis hanesan sira la tanis, sira nebe haksolok hanesan sira la haksolok; sira nebe sosa hanesan sira sasan la iha, ³¹ sira nebe moris iha mundu ne’e hanesan la moris iha mundu ne’e. Basa mundu ne’e nudar ohin sei mohu. ³² Ha’u hakarak katak imi la bele laran taridu. Ema nebe la kaben hanoin deit kona ba Na’i nian, oin sa nia bele monu los ba Na’i nia laran. ³³ Maibe ema kaben na’in hanoin kona ba sasan mundu ne’e nian, oin sa nia bele fo ksolok ba nia fen, ³⁴ no nia fahe an. Feto ka fetoran nebe la kaben hanoin kona ba Na’i nian, atu nia bele sai santa iha isin no iha klamar. Maibe, feto kaben na’in ida hanoin kona ba sasan mundu ne’e nian, oin sa nia bele fo ksolok ba nia laen. ³⁵ Ha’u dehan ne’e ba imi ba imi rasik nia diak, la’os atu hatodan imi, maibe atu haburas diak no atu imi bele serbi Na’i hodi la fahe imi nia neon.

                ³⁶ Ema ruma hanoin karik katak nia halo hahalok nebe la los ho nia namora, no nia la bele ukun an tan ne’e mak nia ten ke kaben, husik nia halo nudar nia hakarak. Nia la sala wainhira sira hola malu. ³⁷ Maibe ida nebe laran metin, ida nebe la hetan todan maka’as maibe iha kbiit atu ukun nia hakarak, no hanoin deit atu la kaben ho nia namora, nia sei halo diak duni. ³⁸ Ne’e duni, ida nebe hola nia namora halo diak; ida nebe la hola nia halo diak liu.

                ³⁹ Fen ida metin ba nia laen wainhira nia sei moris. Maibe nia laen mate karik, nia bele hola fali ema nebe nia hakarak, naran nia halo ne’e iha Na’i. ⁴⁰ Maibe tuir ha’u nia hanoin, nia hela hanesan ne’e karik, nia rahun diak liu tan; no ha’u hanoin katak ha’u mos iha Maromak nia Espiritu.