3

Joao Baptista, manu ain

                ¹ Iha loron hirak neba Joao Baptista mosu hodi hanorin iha rai fuik maran Judeia nian. ² Nia dehan: “Imi hakribi sala ba; reinu lalehan nian besik dau-daun ona.” ³ Kona ba ema ne’e mak profeta Isaias dehan: “Lia ida hakilar iha rai fuik maran: Imi hadia Na’i nia luron, halos nia dalan sira!” ⁴ Joao hatais kamelu fulun, kesi knotak ho futukabun kulit ida; nia han lalaek ho baniben fuik. ⁵ Ema sira housi Jerusalem, housi Judeia tomak no housi Jordaun ba hotu buka nia, ⁶ hodi hakribi sira sala no simu baptismu housi nia iha Jordaun.⁷ Saduseu no Fariseu barak mai atu simu nia baptismu. Hare tiha sira, nia dehan ba sira: “Samea nia oan sira, se mak hanorin imi halai housi kastigu nebe atu mai dau-daun?  ⁸ Imi halo buat nebe hatudu katak imi hakribi sala. ⁹ Keta bosok imi nia an rasik hodi dehan: ‘Ami nia aman mak Abraao.’ Basa ha’u dehan ba imi katak Maromak bele halo fatuk sira ne’e sai Abraao nia oan sira. ¹⁰ Ema tau ona baliun ba ai sira nia abut; ai sira nebe la fo fuan diak sei tesi tiha hodi soe ba ahi. ¹¹ Ha’u sarani imi ho be, nudar sinal hakribi sala nian. Maibe Ida nebe mai tuir ha’u, maka’as liu ha’u, ha’u la soi atu kore nia sandalis tali. Nia sei sarani imi ho Espiritu Santu no ahi. ¹² Lafatik iha ona nia liman; Nia sei hamos nia biti hodi halot trigu iha hoka; maibe Nia sei sunu trigu kain iha ahi nebe sei la mate.”

Jesus simu baptismu

¹³ La kleur Jesus mai housi Galileia to'o Joao atu simu baptismu housi nia. ¹⁴ Maibe Joao lakohi hodi dehan: “Ha'u mak atu simu baptismu housi Ita, nusa mak Ita mai buka fali ha'u?” ¹⁵ Jesus hatan ba nia: “Husik lai ba, diak liu ita halo tuir nune'e buat hotu nebe los.” Ho ida ne'e, Joao halo tuir ona. ¹⁶ Simu tiha baptismu, Jesus sai housi be; lalehan nakloke, Nia hare Maromak nia Espiritu hanesan manu falur ida tun mai iha nia leten. ¹⁷ Housi lalehan lia ida dehan: “Ida ne'e mak ha'u nia Oan doben, nebe fo ksolok mai ha'u.”