10

Keta fiar an resin

                ¹ Ha’u lakohi imi beik, maun alin sira, katak ita nia bei-ala sira hotu iha kalohan okos no sira hotu hakur liu housi tasi, ² no sira hotu simu baptismu iha Moises iha kalohan no iha tasi laran. ³ Sira hotu han aihan espiritu nian ida deit, ⁴ no hemu be espiritu nian ida deit, basa sira hemu housi fatuk espiritu nian nebe la’o tuir sira, no fatuk ne’e mak Kristu. ⁵ Maibe sira barak la monu los ba Maromak nia laran, basa sira mate iha rai fuik maran.

                ⁶ Buat sira ne’e mosu nudar esemplu ida mai ita atu ita la bele buka buat aat sira, hanesan sira buka. ⁷ No keta sai ema nebe adora lulik hanesan sira balun halo, nudar hakerek tiha, “Ema sira tur atu han no hemu, no hamriik atu haksolok resin.” ⁸ Ita keta halo sala foer hanesan sira balun halo, no ema rihun rua nulu resin tolu mate iha loron ida deit nia laran. ⁹ Ita keta koko Kristu hanesan sira balun halo, nune’e samodok tata mate sira. ¹⁰ Keta mura-mura hanesan sira balun halo, no Na’i nia anju oho sira. ¹¹ Buat sira ne’e mosu ba sira nudar esemplu, no buat sira ne’e hakerek tiha atu halo ita sai matan moris, ita nebe tempu nia rohan to’o ona mai. ¹² Ne’e duni, ema nebe hanoin katak nia hamriik metin, matan moris ba atu nia la bele monu. ¹³ Imi sei la hetan babeur nebe la’os ema nian. Maromak nia laran la bosok, no Nia sei la husik imi hetan babeur nebe boot liu fali imi nia kbiit; maibe wainhira Nia koko imi, Nia sei fo mos dalan atu imi bele lori nia.

Kona ba adora lulik

                ¹⁴ Ne’e duni, maun alin sira, hadook an housi adora lulik sira. ¹⁵ Ha’u koalia hanesan ba ema sira nebe matan mos; imi rasik hare ba buat nebe ha’u dehan. ¹⁶ Kalis kmanek nebe ita fo bensa, la’os ita halo parte iha Kristu futar ran? Paun nebe ita fahe, la’os ita halo parte iha Kristu nia isin? ¹⁷ Tan paun baluk mak ida deit, ita, maski barak, isin ida deit, basa ita hotu halo parte iha paun ida deit.

                ¹⁸ Hare ba Israel tuir isin: sira nebe han sakrifisiu sira, sira la halo parte iha altar? ¹⁹ Ne’e duni, ha’u dehan sa ida? Katak naan nebe saran ona ba lulik sira iha folin ruma? Ka katak lulik sira iha folin ruma? ²⁰ Lae, ha’u dehan katak buat nebe ema hasa’e, sira hasa’e ba diabu sira, la’os ba Maromak, no ha’u lakohi katak imi halo parte iha diabu. ²¹ Imi la bele hemu Na’i nia kopu no mos hemu diabu sira nia kopu. Imi la bele halo parte housi Na’i nia meja no mos housi diabu sira nia meja.²² Ka imi hakarak koko Na’i atu Nia sai laran moras no hirus? Ita maka’as liu fali Nia?

Imi buka ema seluk nia diak

                ²³ “Buat hotu tuir ukunfuan,” maibe la’os buat hotu halo diak. “Buat hotu tuir ukunfuan,” maibe la’os buat hotu harii. ²⁴ Ema keta buka nia rasik nia diak, maibe nia maluk nian. ²⁵ Han buat hotu nebe fa’an iha pasar hodi la husu hodi hanoin o nia konsiensia, ²⁶ basa “rai no buat hotu iha nia Na’i nian.” ²⁷ Ema nebe la’os fiarna’in konvida o no o hakarak ba, han buat naran deit nebe nia fo ba o, hodi la husu hodi hanoin o nia konsiensia. ²⁸ Maibe ema ida dehan karik ba o, “Buat ne’e hasa’e tiha ona nudar sakrifisiu ida,” keta han nia, tan ema nebe dehan ba o nia diak no mos tan konsiensia; ²⁹ ha’u la koalia kona ba o nia konsiensia, maibe ida seluk nian. Basa, tansa ema seluk nia konsiensia mak ukun ha’u nia liberdade? ³⁰ Ha’u han hodi fo agradese karik, tansa ema hasara ha’u, tan buat nebe tan nia ha’u fo agradese?

                ³¹ Ne’e duni, imi han ka hemu, ka buat naran deit nebe imi halo, halo buat hot-hotu ba Maromak nia gloria. ³² Hadook an housi fo laran susar ba ema, ba ema Judeu ka ema gregu, ka ba Maromak nia kreda, ³³ nudar ha’u buka atu fo ksolok ba ema hot-hotu iha buat hotu, la hodi buka ha’u rasik nia diak maibe ema barak nian, atu sira bele hetan maksoin.