11

                ¹ Imi buka halo tuir ha’u nia hahalok, nudar ha’u halo tuir Kristu.

                ² Ha’u hahi imi basa imi hanoin ha’u iha buat hotu no imi laran metin ba lisan nudar ha’u saran lisan sira ne’e ba imi.

Mane no feto

                ³ Ha’u hakarak katak imi hatene katak Kristu mak ema ida-ida nia ulun; no laen mak nia fen nia ulun, no Maromak mak Kristu nia ulun. ⁴ Mane ida nebe harohan ka halo profesia hodi taka nia ulun, hamoe nia ulun. ⁵ Maibe feto ida nebe harohan ka halo profesia hodi la taka nia ulun, hamoe nia ulun basa buat ne’e hanesan deit koi fuuk housi nia ulun. ⁶ Basa feto ida la taka nia ulun karik, diak liu nia haruka tesi nia fuuk hotu ka koi nia ulun. Maibe feto ida moe karik wainhira nia tesi ka koi nia fuuk tomak, ne’e duni diak liu nia taka nia ulun.

                ⁷ Maibe mane ida la bele taka nia ulun, basa nia Maromak nia ilas no gloria; maibe feto mak mane nia gloria. ⁸ Basa mane la mai housi feto, maibe feto housi mane; ⁹ no mos Maromak la halo mane ba feto, maibe feto ba mane; ¹⁰ tan ne’e, feto ten ke iha kbiit nia sinal iha nia ulun, tan anju sira. ¹¹ Iha Na’i, feto la ketak housi mane ka mane housi feto. ¹² Basa nudar feto mai housi mane, nune’e mos, mane moris housi feto; maibe buat hotu mai housi Maromak.

                ¹³ Imi rasik hare ba: feto ida harohan ba Maromak hodi la taka nia ulun, ne’e los ka lae? ¹⁴ Mundu rasik la hanorin katak wainhira mane ida husik nia fuuk sai naruk, buat ne’e hamoe nia, ¹⁵ maibe feto ida husik nia fuuk sai naruk, buat ne’e gloria ba nia, basa Maromak fo fuuk naruk ba nia atu taka nia ulun? ¹⁶ Maibe ema ida hakarak haksesuk malu karik, ita la iha lisan hanesan ne’e, no mos Maromak nia kreda sira.

Buat la los iha Korinto

                ¹⁷ Wainhira ha’u hateten lia menon ne’e, ha’u la hahi katak imi nia halibur malu halo aat liu fali diak. ¹⁸ Uluk knanain, ha’u rona katak wainhira imi halibur malu nudar kreda iha haketak malu iha imi leet, no ha’u fiar uitoan buat ne’e . ¹⁹ Imi ten ke haketak malu iha imi leet atu ema bele hatene sira nebe diak. ²⁰ Ne’e duni, wainhira imi halibur malu iha fatin ida, la’os atu han Na’i nia han kalan nian, ²¹ basa wainhira imi han, ema ida-ida ba oin ho nia aihan rasik, no ema ida hamlaha wainhira ema seluk hemu to’o lanu. ²² Imi la iha uma iha nebe imi bele han no hemu? Ka imi hatudu imi nia laran aat ba Maromak nia Kreda hodi hamoe sira nebe aihan la iha? Ha’u sei dehan sa ida ba imi? Ha’u sei hahi imi? Iha buat ida ne’e ha’u la bele hahi imi.

Paulo simu housi Na’i

                ²³ Basa ha’u simu housi Na’i buat nebe ha’u mos saran ba imi, katak Na’i Jesus, iha kalan nebe ema saran Nia, kaer paun, ²⁴ no fo tiha agradese, Nia silu nia hodi dehan: “Ne’e ha’u nia isin nebe saran ba imi. Halo ida ne’e hodi hanoin ha’u.” ²⁵ Nune’e mos, kalis wainhira han kalan hotu tiha hodi dehan, “Kalis ne’e mak aliansa foun iha Ha’u nia ran. Halo ida ne’e, wainhira imi hemu nia, hodi hanoin Ha’u.” ²⁶ Basa wainhira imi han paun ida ne’e no hemu kalis ida ne’e, imi haklaken Na’i nia mate to’o wainhira Nia hiit an mai.

                ²⁷ Ne’e duni, ema nebe han paun ida ne’e no hemu kalis ida ne’e ho laran la los sei hatan ba Na’i nia isin no ran. ²⁸ Ema ida-ida sei buka hatene nia an, no tuir mai han paun ne’e no hemu tua ne’e. ²⁹ Basa ema nebe han no hemu hodi la hanoin isin ne’e, han no hemu todan ba nia an. ³⁰ Tan ne’e mak imi barak moras no isin la diak, no ema barak tan mate tiha ona. ³¹ Ita hatene di-diak ita nia an karik, ita sei la simu todan ne’e, ³² maibe wainhira Na’i mak tesi lia mai ita, Nia korige ita atu ita la bele hetan todan hamutuk ho mundu.

                ³³ Ne’e duni, maun alin sira, wainhira imi halibur malu atu han, hein malu lai. ³⁴ Ema ruma hamlaha karik, diak liu nia han uluk iha uma, atu imi nia halibur malu ne’e la bele hetan todan. Ha’u sei halo los buat seluk sira wainhira ha’u to’o iha neba.