3

Imi rasik mak ami nia surat

                ¹ Ami hahu foti an dala ida tan? Ka ami presisa, nudar balun presisa duni, surat atu fo hatene ami se ba imi ka housi imi? ² Imi rasik mak ami nia surat, nebe hakerek tiha iha ami nia fuan, nebe ema hotu hatene no lee; ³ imi hatudu an nudar surat nebe mai housi Kristu rasik housi ami nia liman, nebe hakerek tiha. la’os ho tinta, maibe hodi Maromak moris nia Espiritu, hakerek la’os iha fatuk belar ruma nia leten maibe iha fuan isin lolon nian.

                ⁴ Ami fiar ne’e housi Kristu ba Maromak. ⁵ La’os katak ami rasik soi atu foti an kona ba buat ruma nebe mai housi ami; maibe lo-los buat nebe halo ami soi mai housi Maromak, ⁶ nebe halo duni ami soi atu sai aliansa foun nia emar, la’os housi surat maibe housi espiritu; basa surat lori mate, maibe espiritu lori moris.

Aliansa foun no aliansa tuan

                ⁷ Oras ne’e, knaar atu oho nian, nebe hakerek tiha iha fatuk belar, mosu nudar buat nebe kmanek liu, nune’e ema Israel sira la bele hateke ba Moises nia oin tan nia gloria, nebe atu mohu lakon; ⁸ knaar Espiritu nian sei mosukmanek liu tan! ⁹ Basa knaar atu fo kastigu kmanek karik, knaar halo ema laran los nian sei sai kmanek liu tan. ¹⁰ Tebes duni, ohin ne’e buat nebe hafutar an ho gloria sai fali gloria laek, tan gloria seluk nebe boot liu nia. ¹¹ Basa buat nebe atu mohu lakon kmanek karik, kmanek oin sa liu tan mak buat nebe sei hela ba nafatin.

                ¹² Ne’e duni, tan ita iha esperansa boot nune’e, ita book an ho aten berani no ¹³ la’os hanesan Moises, nebe taka nia oin ho hena ida atu ema Israel sira la bele hateke ba buat nebe atu mohu lakon. ¹⁴ Sira nia hanoin sai nakukun, basa to’o ohin loron hena taka metin sira wainhira sira lee aliansa tuan, basa housi Kristu deit mak Maromak sei hasai hena ne’e. ¹⁵ Tebes duni, to’o loron ne’e, wainhira ema lee Moises, hena ida taka sira nia hanoin, ¹⁶ maibe wainhira ema fila ba Na’i, hena ne’e hasai tiha. ¹⁷ Na’i mak Espiritu, no iha nebe Na’i nia Espiritu hela, iha neba mos ema la’os tan atan. ¹⁸ Ita hotu, oin la taka ona, hateke ba Na’i nia gloria; ita nakfila an ba Nia ilas housi gloria ba gloria, nudar housi Na’i rasik, nebe Espiritu.