9

Maromak nia presente boot

                ¹ La presisa katak ha’u hakerek ba imi kona ba serbisu ba ema santu sira, ² basa ha’u hatene imi nia hakarak, tan ne’e ha’u gaba an kona ba imi ba ema Masedonia sira, katak Akaia hadia an ona houri tinan liu ba kedas; no imi nia laran badinas hamanas sira barak. ³ Maski nune’e, ha’u haruka maun alin sira atu ami nia gaba an kona ba imi oras ne’e la bele sai leet deit, atu imi bele hadia an, nudar ha’u dehan, ⁴ tamba ha’u tauk katak ema Masedonia ruma mai hamutuk ho ha’u karik no toman imi la hadia an, ami bele moe (la koalia kona ba imi) kona ba buat ida ne’e. ⁵ Ne’e duni, ha’u hanoin katak diak liu hameno maka’as ba maun alin sira atu la’o uluk ba imi no hare ba oin kona ba presente nebe imi hakotu tiha, nune’e bele hadia ona nudar presente boot nebe fo ho laran, la’os nudar buat nebe ami husu hodi obriga.

                ⁶ Hanoin ida ne’e ba: ema nebe kari uitoan sei ko’a mos uitoan, no ema nebe kari barak sei ko’a mos barak. ⁷ Ida-ida sei halo nudar nia deside ona, la hodi laran susar ka obriga an, basa Maromak hadomi ema nebe fo ho laran haksolok. ⁸ No mos, Maromak bele halo presente ida-ida sai barak liu tan ba imi, nune’e iha buat hotu, buat nebe imi presisa iha nafatin; no imi iha buat barak ba hahalok diak hotu. ⁹ Nudar hakerek tiha, “Nia kari sai, nia fo ba ema kiak sira; nia laran los tahan ba nafatin.”

¹⁰ Ida nebe fo fini ba to’os na’in no paun atu han sei fo no hawain imi nia fini no halo barak imi laran los nia fuan. ¹¹ Imi sei sai riku iha buat hotu tan imi nia laran luak, nebe housi ami ema sei fo obrigadu ba Maromak, ¹² basa hodi hala’o knaar ida ne’e, imi la hare deit kona ba buat nebe ema santu sira presisa maibe mos lori ema atu agradese Maromak. ¹³ Hodi serbisu ne’e, imi sei fo gloria ba Maromak tan imi simu hodi halo tuir Kristu nia evangeliu no tan imi nia laran luak ba sira no ba sira seluk hotu, ¹⁴ no sira fali hanoin hodi hein imi iha sira nia orasaun ba imi nia diak, tan Maromak nia grasa boot liu iha imi. ¹⁵ Agradese Maromak tan presente boot liu ne’e!