11

Haklaken hodi la husu ema atu selu

                ¹ Imi bele deit tahan ha’u nia laran beik uitoan! Favor, tahan ha’u ba! ² Basa ha’u iha laran moras santu kona ba imi, basa ha’u saran tiha imi ba Kristu nudar fetoran mo-mos ida ba nia laen. ³ Maibe ha’u tauk katak, nudar samea lohi Eva ho nia laran makerek, imi sei la hanoin tan atu saran imi an ba Kristu ho laran mos no laran los. ⁴ Basa ema ruma karik mosu ba imi no haklaken Jesus nebe oin seluk housi Ida nebe ami haklaken tiha, ka imi simu karik espiritu nebe oin seluk housi ida nebe imi simu tiha, ka evangeliu nebe oin seluk housi ida nebe imi simu tiha ona, imi halo tuir nia lalais deit. ⁵ Ha’u hanoin katak ha’u la kiik liu “apostolu boot sira” iha buat hotu. ⁶ Maski ha’u la matenek atu koalia, ne’e la dehan katak ha’u kuran matenek; iha buat hotu ami hatudu mo-mos tiha buat ne’e ba imi. ⁷ Ha’u sala wainhira ha’u haraik an atu imi bele foti an, basa ha’u haklaken evangeliu hodi la husu imi atu selu osan? ⁸ Ha’u book kreda sira seluk hodi simu tulun housi sira atu ha’u bele serbi imi. ⁹ No wainhira ha’u iha imi leet no kuran sasan sira, ha’u la hatodan imi, basa maun alin sira housi Masedonia fo buat nebe ha’u kuran. Nune’e ha’u la hatodan no sei la hatodan imi iha buat hotu. ¹⁰ Hodi Kristu nia lialos nebe ha’u iha, ema Akaia sira sei la bele halo ha’u nonok, maibe ha’u sei foti an. ¹¹ No tan sa? tan ha’u la hadomi imi? Maromak hatene katak ha’u hadomi imi!

                ¹² No buat nebe ha’u halo, ha’u sei halo nafatin, atu halakon liafuan housi sira nebe buka atu halo imi hare sira hanesan ha’u iha knaar nebe sira hahi an. ¹³ Basa ema sira ne’e apostolu bosok, serbisu na’in nebe laran makerek, hodi hatudu an nudar Kristu nia apostolu tebes. ¹⁴ Ema la hakfodak, basa Satanas mos hatudu an hanesan anju naroman nian ida. ¹⁵ Ne’e duni, ema la hakfodak katak nia emar sira mos hatudu an nudar ema laran los. Ikus mai, sira sei sai hanesan sira nia hahalok.

Paulo nia hahalok sira

                ¹⁶ Ha’u dehan dala ida tan: keta hanoin katak ha’u bulak; maibe imi hanoin karik nune’e, hare ha’u hanesan bulak ida ba, atu ha’u bele foti an uitoan. ¹⁷ Buat nebe ha’u dehan dau-daun, ha’u dehan la’os tuir Na’i, maibe hanesan ema bulak ida nebe foti an. ¹⁸ Tan ema barak foti an tuir isin, ha’u mos sei foti an. ¹⁹ Tamba imi simu ho ksolok ema bulak sira, imi rasik nebe matenek. ²⁰ Tamba imi simu wainhira ema halo imi sai nia atan, ka halo imi fo han ba nia, ka lohi imi, ka buka oin, ka basa imi nia hasan. ²¹ Ha’u moe hodi dehan katak ha’u kbiit laek liu kona ba ida ne’e!

                Maibe kona ba buat nebe ema ruma berani atu foti an, ha’u koalia ona hanesan bulak ida, ha’u mos berani. ²² Sira ema Ebreu? Ha’u mos. Sira ema Israel nian? Ha’u mos. Sira Abraao nia bei-oan? Ha’u mos. ²³ Sira Kristu nia emar? Ha’u diak liu sira, ha’u koalia duni hanesan ema bulak ida: ho hahalok boot liu tan, ha’u hela iha dadur laran liu tan, ema baku ha’u dala la bele sura, ha’u besik atu mate dala barak liu tan. ²⁴ Ba dala lima iha ema Judeu sira nia liman, ema baku ha’u dala haat nulu kuran ida. ²⁵ Ba dala tolu ema baku ha’u ho fafulu; dala ida ema tuda ha’u; ba dala tolu ro nebe ha’u sa’e baku rahun iha tasi ibun; ha’u iha tasi laran kalan ida loron ida; ²⁶ dala barakha’u la’o rai, ha’u hetan perigu iha mota laran; perigu housi na’okten sira, perigu housi ha’u nia povu rasik, perigu housi ema gentiu sira, perigu iha sidade laran, perigu iha ai-laran, perigu iha tasi laran, perigu housi maun alin bosok ten sira; ²⁷ iha serbisu todan no terus laran, iha kalan barak nebe ha’u la bele toba, iha hamlaha no hamrook, iha jejum dala barak, iha rai malirin no rai manas. ²⁸ No liu fali buat hirak ne’e mak ha’u nia laran taridu hodi hanoin kreda sira hotu. ²⁹ Se mak kbiit laek, no ha’u la kbiit laek? Se mak atu la’o ba sala, no ha’u la laran nakali?

                ³⁰ Ha’u ten ke foti an karik, ha’u sei foti an iha buat sira nebe hatudu katak ha’u kbiit laek. ³¹ Maromak no Na’i Jesus Kristu nia Aman, Nia nebe diak liu nafatin, hatene katak ha’u la bosok. ³² Iha Damasko, gubernador iha Liurai Aretas nia ukun tau matan di-diak ba sidade Damasko nian atu kaer ha’u, ³³ maibe ema hatun ha’u iha raga laran housi janela ida iha muru no nune’e ha’u halai housi nia liman.