GALASIA

1

Kumprimentu

                ¹ Housi Paulo nebe sai apostolu, la’os tan ema ka housi ema, maibe tan Jesus Kristu no Aman Maromak, nebe halo Nia moris hi’as. ² Maun alin sira hotu iha ne’e hamutuk ho ha’u fo kumprimentu ba Kreda sira iha Galasia. ³ Maromak, ita Aman, no Na’i Jesus Kristu fo grasa no dame ba imi. ⁴ Atu hasai ita housi otas aat ida ne’e, Kristu saran nia An tamba ita nia sala sira, hodi halo tuir ita nia Maromak no Aman nia hakarak. ⁵ Gloria ba Maromak tinan ba tinan. Amen.

Evangeliu ida deit

                ⁶ Ha’u hakfodak kona ba imi! Lalais deit mak imi husik ida nebe bolu imi housi Kristu nia grasa; imi simu fali evangeliu seluk. ⁷ Lo-los, la iha evangeliu seluk, maibe ha’u dehan ne’e basa iha ema balun nebe book imi, hodi buka muda Kristu nia evangeliu. ⁸ Maibe, maski ami eh anju ida housi lalehan haklaken ba imi evangeliu ida nebe oin seluk housi buat nebe ami haklaken ona ba imi, malisan ba nia! ⁹ Ami dehan nanis ona, no ami sei dehan dala ida tan: ema ruma haklaken evangeliu ruma karik nebe oin seluk housi ida nebe imi simu tiha ona, malisan ba nia!

                ¹⁰ Ha’u buka ema nia laran diak, ka Maromak nian? Ha’u buka fo ksolok ba ema ruma? Ha’u buka duni karik, ha’u sei la sai Kristu nia atan.

Paulo sai apostolu oin sa

                 ¹¹ Husik ha’u fo hatene ba imi, maun alin sira, katak evangeliu nebe ha’u haklaken la mai housi ema ida. ¹² Ha’u la simu nia housi ema ruma, eh ema ruma hanorin ha’u. Jesus Kristu rasik mak fo hatene nia mai ha’u. ¹³ Imi rona tiha ona ha’u nia moris uluk nian, wainhira ha’u  hadomi Judeu sira nia religiaun: oin sa ha’u, ho laran tos, fo susar ba Maromak nia Kreda, hodi buka ho laran tomak atu halo aat sira. ¹⁴ Ha’u maka’as liu maluk Judeu sira barak iha Judeu sira nia religiaun ne’e; ha’u nia devosaun ba ita nia bei-ala sira nia lisan maka’as liu. ¹⁵ Maibe, tan Nia grasa, Maromak hili ha’u molok ha’u moris, hodi bolu ha’u atu serbi Nia. ¹⁶ Wainhira nia hanoin atu fo hatene nia Oan Mane mai ha’u, atu ha’u bele haklaken liafuan diak kona ba Nia ba gentiu sira, ha’u la hakbesik ema ruma atu simu konseliu, ¹⁷ ha’u la ba Jerusalem atu hare sira nebe sai apostolu uluk liu ha’u. Ha’u ba kedas Arabia; tuir mai ha’u fila fali ba Damasko. ¹⁸ Liu tiha tinan tolu deit mak ha’u ba Jerusalem, atu simu liafuan ruma housi Pedro, no ha’u hela ho nia semana rua deit. ¹⁹ Ha’u la hare tan apostolu seluk; maibe ha’u hare Tiago, Na’i nia alin.

                ²⁰ Buat nebe ha’u hakerek ba imi mak los. Maromak hatene katak ha’u la bosok.

                ²¹ Tuir mai, ha’u ba rai oi-oin iha Siria no Silisia. ²² Iha tempu neba, sarani sira iha Judeia la hare ha’u ho sira nia matan rasik; ²³ sira hatene deit buat nebe ema dehan: “Ema nebe uluk fo susar mai ita, ohin nia haklaken fiar nebe uluk nia haka’as an atu halo aat.” ²⁴ Nune’e, sira hahi Maromak tamba ha’u.