3

Ukunfuan ka fiar?

                ¹ Ema Galasia sira, imi beikten! Se mak tau ai-fekit ba imi? Imi hatene lo-los Kristu nia mate iha krus! ² Dehan took buat ida ne’e: imi simu Maromak nia espiritu tamba halo hahalok nebe ukunfuan haruka eh hodi rona evangeliu no ho fiar nia? ³ Oin sa imi bele sai beikten liu! Imi hahu ona ho Maromak nia espiritu, maibe ohin imi hakarak ba oin ho imi rasik nia kbiit? ⁴ Buat nebe imi koko ona folin la iha? Los duni, iha folin! ⁵ Maromak fo espiritu ba imi, hodi halo milagre iha imi nia leet tamba imi halo buat nebe ukunfuan haruka halo ka tamba imi rona tiha evangeliu hodi fiar nia?

                ⁶ Hanoin ba Abraao nia moris nudar Eskritura dehan: “Nia fiar Maromak, no tamba nia fiar mak Maromak simu nia nudar ema los.” ⁷ Ne’e duni, imi sei hare katak Abraao nia bei-oan lo-los mak sira nebe fiar. ⁸ Eskritura fo sai nanis katak Maromak sei halo gentiu sira sai ema los iha nia futar oin housi fiar. Tan ne’e Eskritura fo sai liafuan diak ba Abraao: “Housi o, Maromak sei fo bensa ba ema hotu.” ⁹ Abraao fiar, no nia hetan bensa; ema hotu nebe fiar sei hetan mos bensa hanesan nia.

                ¹⁰ Sira nebe buka tuir ukunfuan, sira ne’e moris ho malisan, basa Eskritura dehan: “Ema nebe la halo tuir buat hotu nebe hakerek iha livru ukunfuan nian hetan Maromak nia malisan.” ¹¹ Ohin, ema bele hare mo-mos katak la iha ema nebe sai los iha Maromak futar oin housi ukunfuan, basa Eskritura dehan: “Ema nebe sai los iha Maromak futar oin housi fiar, ema ne’e deit mak sei moris.” ¹² Maibe ukunfuan nia hun la’os iha fiar. Eskritura dehan katak ema nebe halo hotu nebe ukunfuan haruka sei moris tuir ukunfuan.”

                ¹³ Maibe, wainhira Nia sai ema nebe simu malisan tamba ita, Kristu hasai ita housi malisan nebe ukunfuan lori mai; basa Eskritura dehan: “Ida nebe ema hedi ona iha ai-moris, ema ne’e simu Maromak nia malisan ba nia an.” ¹⁴ Nia halo ida ne’e atu gentiu sira mos bele simu bensa nebe Maromak hakotu ba Abraao housi Kristu Jesus; atu housi fiar, ita bele simu espiritu nebe Maromak hakotu lia atu fo.    

Ukunfuan no liafuan nebe Na’i hakotu

                ¹⁵ Maun alin sira, ha’u sei usa aiknanoik moris loron-loron nian ida: wainhira ema ida hakerek lia kona ba liman rohan nebe nia sei husik hodi asina surat ida, ema ida la bele muda nia eh tau tan buat ruma ba nia. ¹⁶ Maromak hakotu lia ba Abraao no ba nia bei-oan. Eskritura la dehan “bei-oan sira”, katak ema barak; maibe “bei-oan”, katak ida deit, Kristu. ¹⁷ Ne’e katak Maromak hakotu lia ba Abraao, hodi hakarak halo tuir nia liafuan. Liu tiha tinan atus hat no tolu nulu mak Maromak fo ukunfuan. Ukunfuan ne’e la bele halakon liafuan nebe Maromak hakotu nanis ona. ¹⁸ Buat nebe Maromak fo iha nia hun iha ukunfuan karik, ne’e katak buat ne’e la iha hun iha Maromak nia liafuan, nebe Nia hakotu ba Abraao. Maibe lo-los, tamba liafuan ida ne’e nebe Nia hakotu nanis ona mak Maromak fo nia bensa ba Abraao.

                ¹⁹ Ne’e duni, ukunfuan nia folin sa los? Maromak tau nia atu hatudu sala katak sa. Maromak tau ukunfuan to’o deit tempu nebe Abraao nia bei-oan mosu mai; basa Nia mak Maromak promessa nian. Anju sira lori ukunfuan mai, ²⁰ ho ema ida nudar manu-ain. Maibe manu-ain katak la’os ema ida deit. Maibe, Maromak ida deit.

Tansa iha ukunfuan

                ²¹ Ne’e katak ukunfuan ba hasouru Maromak nia lia hakotu? La iha! Basa ita ema simu karik ukunfuan nebe lori moris mai, ne’e katak ema hotu bele sai los iha Maromak futar oin wainhira nia halo tuir ukunfuan. ²² Maibe Eskritura dehan katak mundu tomak iha sala nia ukun; nune’e presente nebe hakotu tiha ona tamba fiar iha Jesus Kristu sei fo deit ba sira nebe fiar.

                ²³ Maibe molok fiar mosu mai, ita dadur hela iha ukunfuan nia ukun, hodi hein wainhira fiar ne’e sei hatudu an mai ita. ²⁴ Ukunfuan tau matan mai ita to’o tempu nebe Kristu mosu mai, atu ita bele sai los iha Maromak futar oin tamba fiar. ²⁵ Ohin, tempu fiar nian mai ona; ukunfuan la tau matan tan mai ita.

                ²⁶ Housi fiar mak imi hotu sai Maromak nia oan, hamutuk ho Kristu Jesus. ²⁷ Imi simu ona baptismu atu moris ho Kristu; ohin imi hatais ona (bele dehan nune’e) ho Kristu nia moris rasik. ²⁸ Ne’e duni, la iha tan ema Judeu ka gentiu; atan ka la’os atan; mane ka feto: imi hotu ida deit tamba Kristu Jesus. ²⁹ Imi Kristu nian karik, ne’e katak imi Abraao nia bei-oan, liman rohan na’in tuir Maromak nia promessa.