5

Tau matan ba imi nia liberdade

                ¹ Ita iha liberdade - Kristu hasai ona ita housi moris atan nian! Ne’e duni, hamriik ba nudar ema nebe la’os atan! Keta husik imi an sai atan fali! ² Rona ba; ha’u, Paulo, dehan ba imi katak imi simu karik sirkunsisaun, ne’e katak Kristu folin la iha ba imi. ³ Dala uluk ona, ha’u fo hatene katak ema nebe simu sirkunsisaun sei halo tuir ukunfuan tomak. ⁴ Imi sira nebe hakarak sai los iha Maromak futar oin hodi halo tuir ukunfuan, imi haketak tiha imi an housi Kristu. Imi la bele hetan Maromak nia grasa. ⁵ Maibe ami, ami hein katak Maromak sei halo ami sai los iha nia futar oin. Ami hein ida ne’e housi Maromak nia espiritu nia kbiit nebe book iha ami nia fuan. ⁶ Basa, wainhira ami moris hamutuk ho Kristu Jesus, iha sirkunsisaun ka la iha, la halo buat ida. Buat nebe iha folin mak fiar nebe book liu housi domin.

                ⁷ Imi moris lo-los tiha ona! Se mak halo imi la halo tuir lialos? Ema sira halo aat imi oin sa? ⁸ La’os Maromak, nebe bolu imi, mak halo ida ne’e! ⁹ “Ho fermentu uitoan deit mak farina nia masa sai boot,” ema dehan. ¹⁰ Maibe ha’u sei fiar imi. Ita nia moris hamutuk ho Na’i halo ha’u fiar katak imi sei la la’o tuir dalan seluk, no ida nebe halakon imi, nia se los la halo buat ida, sei hetan Maromak nia kastigu.

                ¹¹ Ha’u rasik fali, maun alin sira, wainhira ha’u haklaken katak sirkunsisaun ne’e folin, tansa ema sei fo susar mai ha’u? Ne’e los karik, ne’e katak wainhira ha’u haklaken Kristu nia mate, ha’u la halo lakon ema. ¹² Ha’u hein katak sira nebe halo lakon imi sei ba oin to’o rohan; husik sira tesi sira nia isin mane nian tomak ba!

                ¹³ Kona ba imi, maun alin sira, Maromak bolu imi atu la bele sai atan. Maibe keta husik moris la’os atan nian halo imi nia hakarak aat sira ukun imi. Imi nia domin sei halo imi serbi malu. ¹⁴ Ukunfuan tomak bele fo sai ho liafuan badak ida ne’e: “Hadomi imi nia maluk hanesan imi an rasik.” ¹⁵ Imi moris nudar balada fuik karik, hodi tata malu no halo aat malu, matan moris ba; keta imi halo aat malu teb-tebes karik!

                 ¹⁶ Husik ha’u dehan nune’e: espiritu mak lori imi karik, imi la monu lalais atu buka imi rasik nia ksolok, ¹⁷ basa buka imi rasik nia ksolok no espiritu la bele la’o hamutuk; espiritu la’o maka’as hasouru buat ne’e; no tamba sira rua ne’e hasouru malu maka’as mak imi la halo tuir nafatin imi nia hakarak diak. ¹⁸ Espiritu mak lori imi karik, ukunfuan ida mos la kona imi. ¹⁹ Wainhira imi buka imi rasik nia ksolok, buat nebe mosu mak sala foer, hanoin aat no arbiru deit kona ba isin; ²⁰ adora lulik no tau aimoruk aat; hirus malu no istori malu; laran moras ba malu, laran aat malu no tolok malu; lia la tuir malu, fahe malu, hare malu ho laran dodok; lanu ho tua, hahalok aat no buat sira hanesan ne’e. ²¹ Ha’u dehan ba imi ohin kedas nudar ha’u dehan tiha ona ba imi uluk; sira nebe moris hanesan ne’e sei la simu Maromak nia reinu nudar liman rohan. ²² Buat nebe espiritu lori mai oin seluk liu: domin, ksolok, dame, pasiensia, laran diak, laran luak, fiar malu, ²³ laran kmaus no ukun an. Tebes duni, la iha ukunfuan nebe bele hasouru buat sira ne’e. ²⁴ Imi la hedi karik ba krus imi nia hakarak atu buka imi rasik nia ksolok no diak, imi la bele pertense ba Kristu Jesus.

                ²⁵ Ita moris tan Espiritu karik, ita husik Espiritu lori ita. ²⁶ Ita ten ke husik ona ita nia foti an, ita nia provoka malu no laran moras ba malu.