6

Tulun malu atu lori ema maluk nia todan

                ¹ Maun alin sira, imi toman ema ruma halo sala karik, imi sira nebe iha espiritu los sei lori nia ho laran kmaus ba dalan los. Tau matan ba imi nia an rasik, atu imi mos sei la monu ba babeur laran. ² Tulun malu lori maluk nia todan, nune’e mak imi halo tuir Kristu nia ukunfuan. ³ Ema ida hanoin karik katak nia ema boot, wainhira lo-los nia folin la iha, nia bosok deit nia an. ⁴ Ema ida-ida hare nia hahalok ba. Nia hahalok diak karik, nia bele gaba an kona ba buat nebe nia halo, maibe nia la bele tanesan sira ho buat nebe ema seluk halo. ⁵ Basa ida-ida sei lori nia todan rasik.

                ⁶ Ema nebe simu matenek kona ba Kristu nia hanorin sei fahe buat diak nebe nia iha ho ida nebe hanorin nia.

                ⁷ Keta bosok imi an. Ema ida la bele lohi Maromak. Ema ida sei ko’a buat nebe nia kari. ⁸ Nia kari iha to’os hakarak aat sira nian karik, nia sei ko’a mate housi nia; nia kari karik iha to’os espiritu nian, housi to’os ne’e mak nia sei ko’a moris rohan laek. ⁹ Ne’e duni, ita keta kole halo hahalok diak sira; ita la baruk karik hodi ba oin nafatin, loron sei to’o mai wainhira ita sei halibur fuan sira. ¹⁰ Ne’e duni, wainhira ita bele, ita sei halo diak ba ema hotu, no liu-liu ba sira nebe ita nian iha fiar.

                ¹¹ Hare ba katak ha’u hakerek ho letra bo-boot deit ho ha’u nia liman rasik. ¹² Sira nebe buka atu halo imi simu sirkunsisaun hakarak foti an kona ba buat nebe ema matan hare, maibe sira halo nune’e atu sira la bele hetan todan tamba Kristu nia knaar. ¹³ Maski mos sira nebe halo sirkunsisaun la halo tuir ukunfuan; sira hakarak  katak imi simu sirkunsisaun atu sira bele gaba an katak imi mos simu ida ne’e nebe kona ba isin deit. ¹⁴ Maibe ha’u fali, ha’u gaba an deit iha Na’i Jesus Kristu nia krus. Housi Na’i nia krus, mundu mate ona mai ha’u, no ha’u  mate ona ba  mundu. ¹⁵ Buat nebe folin liu mak ema ida sai buat foun ida; sirkunsisaun ka lae, ne’e la halo buat ida. ¹⁶ Dame no laran luak ba sira nebe moris tuir ukunfuan ne’e; ba Maromak nia povu tomak.       

                ¹⁷ Houri ohin ba oin, ema ida keta fo susar tan mai ha’u, basa ha’u lori iha ha’u nia isin Jesus nia marka.

                ¹⁸ Ita Na’i Jesus Kristu nia grasa, hela ho imi hotu, maun alin sira. Amen.