FILIPE

1

Kumprimentu

                ¹ Housi Paulo ho Timoteo, Kristu Jesus nia atan, ba sarani sira iha rai Filipe, hamutuk ho sira nia bispu no diakonu sira: ba imi hot-hotu iha Kristu Jesus.

                ² Grasa no dame ba imi housi Maromak, ita Aman, no housi Kristu Jesus, ita Na’i.

                ³ Ha’u fo agradese ba ha’u nia Maromak wainhira ha’u hanoin imi; ⁴ no wainhira ha’u resa tamba imi, ha’u resa ho ksolok; ⁵ ha’u la bele haluha buat hotu nebe imi halo no fahe hamutuk ho ha’u wainhira ita serbisu atu haklaken Evangeliu; hori loron uluk to’o ohin. ⁶ Tamba Maromak mak hahu buat diak ida ne’e iha imi, ha’u hatene lo-los katak Nia sei halo nia lo-los to’o Kristu Jesus nia loron.

                ⁷ Ne’e mak ha’u nia esperansa kona ba imi, basa ha’u lori imi iha ha’u nia fuan; wainhira ha’u iha dadur laran ka buka atu tahan no hametin Evangeliu, imi hamutuk ho ha’u no halo parte iha grasa nebe ha’u simu.

                ⁸ Maromak hatene katak ha’u hadomi imi teb-tebes ho Kristu Jesus rasik nia domin. ⁹ Iha ha’u nia hamulak, ha’u husu atu imi nia domin lori imi loron loron ba matenek boot liu, hodi hatene diak liu tan, ¹⁰ atu nune’e, imi bele hare momos buat hot-hotu nebe diak liu. Nune’e imi bele sai laran mos liu, hodi to’o ba Kristu nia loron, nudar ema sala laek, ¹¹ nakonu ho santidade imi fuan, nebe mosu mai housi Kristu Jesus, atu ema hahi no fo gloria ba Maromak.

Kristu mak ha’u nia moris

                ¹² Ha’u hakarak katak imi hatene ne’e, maun alin sira, katak buat nebe mosu mai ha’u tulun duni atu habelar Evangeliu. ¹³ Lo-los, funu na’in sira nebe iha pretoriu laran no mos sira nebe iha uma boot nia liur hatene katak ha’u iha dadur laran tamba Kristu. ¹⁴ Liu ida ne’e, ha’u nia situasaun nudar ema dadur ida fo aten berani  ba maun alin sira barak atu haklaken Maromak futar lia iha ema sira nia oin, la ta’uk.

                ¹⁵ Los duni, balun haklaken Kristu ho laran moras, maibe balun haklaken Kristu ho laran los. ¹⁶ Sira ne’e haklaken tamba domin; sira hatene katak ha’u iha ne’e atu tahan Evangeliu. ¹⁷ Maibe, sira seluk haklaken Evangeliu atu ba hasouru ha’u. Sira haklaken Evangeliu ho laran foer; sira hanoin katak sira halo ha’u hetan todan liu tan iha dadur laran. ¹⁸ Maibe mai ha’u, sira haklaken ho laran mos ka laran foer, ne’e la halo buat ida: sira haklaken Kristu, no tan ne’e ha’u haksolok; ha’u laran la susar ida.

                ¹⁹ Ha’u hatene katak buat sira ne’e hotu sei sai grasa mai ha’u, tamba imi nia hamulak no tamba tulun nebe Kristu nia espiritu fo. ²⁰ Ha’u hein, hodi hatene lo-los katak ha’u sei la mo’e. Ha’u hatene nafatin hanesan iha tempu uluk nian  katak, ha’u moris ka ha’u mate, Kristu sei hetan naran boot housi ha’u.

                ²¹ Mai ha’u, moris katak Kristu; mate mos folin boot mai ha’u. ²² Maibe ha’u moris nafatin karik, ha’u sei bele serbisu ho fuan barak liu tan^{. 23} Ne’e duni, ha’u hanoin rua: ha’u hakarak mana-manas atu husik ona moris ne’e hodi ba ona hamutuk ho Kristu; ida ne’e diak liu tan; ²⁴ maibe diak liu ba imi katak ha’u hela lai iha moris ne’e. ²⁵ Tamba ha’u hatene mos katak ha’u sei hela hamutuk ho imi, atu imi bele ba oin hodi hetan ksolok iha fiar. ²⁶ Ha’u sei fila fali duni ba imi dala ida tan; ha’u sei halo imi gaba an tamba imi Kristu ninian.

Laran metin iha fiar

                ²⁷ Ne’e duni, halos imi nia moris tan Kristu nia Evangeliu, atu ha’u iha imi leet ka la iha imi leet, ha’u sei rona katak imi laran metin iha espiritu ida deit, hodi buka tahan imi nia fiar iha Evangeliu ho laran ida deit. ²⁸ Keta ta’uk sira nebe hasouru imi; imi nia laran ida deit hatudu ona katak sira sei lakon, no imi sei manan. Buat hotu ne’e mai housi Maromak, ²⁹ basa housi Kristu, imi simu grasa, la’os deit atu fiar iha Kristu, maibe mos atu terus tamba Nia. ³⁰ Ohin, imi halo parte iha funu ida deit, funu nebe imi hare ha’u halo ona no sei halo dau-daun.