4

Haksolok ba

                ¹ Ne’e duni, maun alin sira nebe ha’u hanoin no hadomi, imi mak ha’u nia gloria no ksolok; laran metin ba Na’i ba. ² Ha’u husu Evodia no Sintike atu  hadame malu iha Na’i. ³ O mos, ha’u nia maluk lo-los, ha’u husu o atu tulun sira. Keta haluha katak uluk, sira na’in rua serbisu ho ha’u atu haklaken evangeliu, hamutuk ho Clemente no ha’u nia maluk sira seluk. Sira ne’e nia naran hakerek tiha iha livru moris nian.

                ⁴ Haksolok iha Na’i nafatin, dala ida tan ha’u dehan: haksolok ba^{! 5} Halo ema hotu koko imi nia laran diak. Maromak besik hela. ⁶ Imi keta laran taridu kona ba buat ruma. Iha buat hotu, harohan no hamulak ba hodi fo agradese; hato’o imi nia harohan ba Maromak.⁷ Nune’e, Maromak dame nian sei rai hela imi nia fuan no laran iha Kristu Jesus.

                ⁸ Ikus mai, maun alin sira, halo nakonu imi nia neon ho buat nebe los, santu, diak, mos, furak no aas. ⁹ Banati tuir buat hotu nebe imi hatene ona housi ha’u eh buat nebe imi hare ha’u halo, no Maromak dame nian sei hela ho imi.

Paulo fo agradese

                ¹⁰ Ha’u haksolok iha Na’i, tamba imi hanoin ha’u. Tebes duni, uluk kedas imi hanoin ha’u; maibe imi la hetan fatin no tempu atu hatudu buat nebe iha imi nia laran. ¹¹ Ha’u la dehan ne’e tamba ha’u kuran buat ruma: ha’u hatene moris ho sasan nebe ha’u iha. ¹² Ha’u hatene moris iha susar laran no mos wainhira iha sasan wa’in. Ha’u hanorin tiha ha’u nia an atu moris ho rua ne’e: hamlaha eh bosu; iha sasan wa’in eh iha sasan uitoan deit. ¹³ Ha’u bele halo buat hotu iha Nia nebe fo kbiit mai ha’u.

                ¹⁴ Maibe, imi halo diak wainhira imi halo parte iha ha’u susar. ¹⁵ Imi, ema Filipe sira, hanoin ba katak wainhira ami hahu, wainhira  ba dala uluk ami haklaken Evangeliu ba imi, wainhira ami husik tiha Masedonia, imi deit mak lolo liman mai ha’u, ¹⁶ no wainhira ha’u iha Tesalonika, dala rua imi haruka mai ha’u sasan nebe ha’u kuran.

                ¹⁷ Ha’u la buka rikusoi nebe imi fo, maibe imi nia laran nebe fo fuan ba imi nia rikusoi. ¹⁸ Ohin rikusoi to’o ona mai ha’u, no resin tan ho buat hotu nebe Epafrodito lori mai iha imi nia naran. Ha’u simu sira ne’e nudar buat karan morin nebe monu los ba Maromak nia laran. ¹⁹ Maromak rasik sei haraik ba imi buat hotu nebe imi sei kuran, tuir nia rikusoi, no Nia sei hatudu nia laran luak iha Kristu Jesus. ²⁰ Gloria ba Maromak, ita Aman, tinan ba tinan. Amen.

                ²¹ Fo ha’u nia kumprimentu ba sira hotu nebe fiar iha Kristu Jesus. ²² Maun alin sira iha ne’e hamutuk ho ha’u fo sira nia kumprimentu ba imi, liu-liu sira nebe housi Cesar nia uma laran. ²³ Ita Na’i, Kristu Jesus, nia grasa hela ho imi.