4

Moris nebe monu los ba Maromak nia laran

                ¹ Ikus mai, maun alin sira, imi hatene ona housi ami oin sai imi sei moris atu monu los ba Maromak nia laran. Los duni, imi moris ona hanesan ne’e. Ohin, iha Na’i Jesus Kristu nia naran, ami husu imi atu moris diak liu tan. ² Basa imi hatene doutrina nebe ami fo ba imi hodi Na’i Jesus Kristu nia kbiit. ³ Maromak hakarak katak imi sei sai santu no mos teb-tebes housi sala foer. ⁴ Imi, mane sira, sei hatene oin sa imi sei moris ho imi nia kaben nudar ema santu no diak, ⁵ la’os ho laran foer hanesan gentiu sira nebe la hatene Maromak. ⁶ Ne’e duni, iha buat ida ne’e, ema ida la bele halo aat nia maluk sarani ida eh manan buat ruma housi nia. Ami dehan nanis ona buat ida ne’e no ami fo hatene ho lia maka’as katak Na’i sei fo todan boot iha buat hirak ne’e . ⁷ Maromak la bolu ita atu moris iha sala foer laran, maibe iha santidade laran. ⁸ Ne’e duni, ema nebe hewai doutrina ne’e, la hewai ema deit; nia hewai Maromak nebe haraik Espiritu Santu ba imi.

                ⁹ Kona ba domin ba imi nia maluk sarani sira, la presisa tan atu ha’u hakerek ba imi, basa Maromak rasik hanorin tiha imi oin sa imi sei hadomi malu. ¹⁰ No lo-los, imi hadomi tiha hanesan ne’e imi nia maun alin sira iha Masedonia tomak. Ne’e duni, ami husu imi, maun alin sira, atu halo liu tan. ¹¹ Haka’as an atu moris nonok, hodi hare kona ba imi rasik nia moris, nudar ami dehan nanis ona ba imi. ¹² Nune’e gentiu sira sei hamtauk imi, no imi sei la kuran ema seluk atu tulun imi moris.

Na’i sei hiit an mai

                ¹³ Maun alin sira, ami lakohi katak imi beik kona sira nebe mate ona, atu imi la bele laran susar hanesan ema seluk nebe esperansa la iha. ¹⁴ Ita fiar katak Jesus mate no moris hi’as, ne’e duni ita fiar mos katak, housi Jesus, Maromak sei lori hamutuk ho Nia sira nebe mate ona hodi fiar Nia.

                ¹⁵ Ohin ami hanorin imi housi Na’i nia liafuan katak ita sira nebe sei moris, nebe sei hela wainhira Na’i hiit An mai, sei la la’o uluk liu sira nebe mate ona. ¹⁶ Na’i rasik sei tun mai housi lalehan ho lia maka’as, noArkanju ida sei hakilar, Maromak nia trombeta sei lia, no. Sira nebe mate iha Kristu sei moris hi’as uluk, ¹⁷ tuir mai, ita nebe sei moris sei la’o hamutuk ho sira iha kalohan atu ba hasouru Na’i iha leten. Ne’e duni, ita sei hela nafatin ho Na’i. ¹⁸ Tan ne’e, fo aten berani ba malu, ba ho liafuan sira ne’e.