II  TESALONIA

1

Kumprimentu

                ¹ Housi Paulo, Silvano no Timoteo, ba Kreda iha Tesalonika nebe iha Aman Maromak no iha Na’i Jesus Kristu, ² grasa no dame ba imi housi Aman Maromak no Na’i Jesus Kristu.

                ³ Ami ten ke fo agradese nafatin, nudar diak tebes, ba Maromak tamba imi, maun alin sira; basa imi nia fiar sai boot liu ba dau-daun no domin nebe imi iha ba malu sai boot ba nafatin; ⁴ no iha Maromak nia kreda sira leet ami gaba an liu-liu kona ba imi tan imi nia laran metin no fiar iha susar no terus hot-hotu nebe imi hetan. ⁵ Ne’e hatudu katak Maromak tesi lia lo-los, no buat hotu mosu atu ema bele hetan katak imi soi Maromak nia reinu; nebe tan nia imi terus dau-daun.

                ⁶ Maromak sei selu ho susar sira hotu nebe ohin halo imi hetan susar, ⁷ no sei fo kolen ba imi nebe ohin terus ho dame nebe Nia sei haraik mai ami wainhira housi lalehan Na’i Jesus mosu mai ho kbiit wa’in hamutuk ho nia anju sira. ⁸ Nia sei mosu ho ahi nebe lakan maka’as atu fo kastigu ba sira hotu nebe la simu Maromak no lakohi simu ita Na’i Jesus Kristu nia evangeliu. ⁹ Sira nia kastigu mak sira sei lakon ba nafatin, dook housi Na’i futar oin no housi Na’i nia kbiit nia gloria ¹⁰ wainhira Nia hiit An mai atu simu gloria iha nia santu sira leet no ema hotu nebe fiar Nia sei hakfodak ho Nia gloria; basa ema sei fiar ami nia lia sasin ba imi.

                ¹¹ Tan ne’e, am hamulak bei-beik ba imi atu ita nia Maromak halo imi soi imi nia vokasaun, no ho nia kbiit, halo lo-los imi nia hakarak atu sai ema diak no buat hotu nebe imi halo dau-daun tamba fiar; ¹² basa nune’e, ita Na’i Jesus Kristu nia naran sei hetan naran boot iha imi no imi iha Nia, housi ita nia Maromak no Na’i Jesus Kristu nia grasa.