I  TIMOTEO

1

                ¹ Paulo, Jesus Kristu nia apostolu tamba Maromak, ita Maksoin, no tan Jesus Kristu, ita nia esperansa; ² ba Timoteo, ha’u nia oan lo-los iha fiar: Aman Maromak no Kristu Jesus, ita Na’i, haraik grasa, laran diak no dame ba o.

Doutrina bosok

                ³ Ha’u hakarak katak o hela iha Efeso nudar ha’u husu wainhira ha’u la’o ba Masedonia. Ema balun iha neba hanorin doutrina nebe la los. O iha knaar atu la bele husik sira. ⁴ Dehan ba sira atu husik ona liafuan nar-naran deit no lista naruk kona ba bei-ala sira; sira ne’e hotu lori deit liafuan barak nebe folin la iha; sira la serbi Maromak nia hakarak nebe ita hatene housi fiar. ⁵ Ita nia hanorin sei lori domin nebe mai housi neon mos, laran mos no fiar lo-los. ⁶ Ema balun husik ona buat los sira ne’e, no lakon ona sira nia dalan tamba liafuan beik barak. ⁷ Sira hakarak sai mestre Maromak nia ukunfuan nian, maibe sira la hatene lo-los sira rasik nia liafuan, eh kona ba buat nebe sira koalia ho aten berani.

Tansa halo ukunfuan sira?

                ⁸ Ita hatene katak ukunfuan diak, wainhira  ema usa nia lo-los nudar ukunfuan; ⁹ hodi hatene katak iha ukunfuan la’os ba ema diak sira, maibe ba ema maksalak no ema aat sira, ba sira nebe la hatene Maromak, ba sira nebe la hanoin sira nia klamar, ba sira nebe oho sira rasik nia aman ka inan, ba sira nebe oho ema, ¹⁰ ba ema sira nebe laran foer kona ba feto,  sira nebe halo sala foer ho mane maluk, sira nebe kaer ema, ba bosokten sira no sira nebe fo lia sasin bosok, ka halo buat ida hasouru doutrina los  ¹¹ tuir evangeliu Maromak kmanek wa’in nia gloria nian, katak, evangeliu nebe Maromak saran mai ha’u.

Paulo nia vokasaun

                ¹² Ha’u fo agradese ba Kristu Jesus, ita Na’i, nebe haraik kbiit mai ha’u, basa Nia hare ha’u laran metin hodi bolu ha’u atu serbi Nia, ¹³ maski uluk ha’u hateten aat Maromak no halo aat no hateten liafuan aat ba Nia. Maibe, Na’i hatudu nia laran luak mai ha’u, tamba ha’u halo buat hotu hodi la hatene buat ida kona ba fiar. ¹⁴ Tebes, ita Na’i nia grasa barak liu, hodi hakonu ha’u ho fiar no domin iha Kristu Jesus. ¹⁵ Imi bele fiar ne’e no ema la bele heli lia katak: Jesus Kristu mai iha mundu ne’e atu soi ema maksalak sira. Iha ema maksalak sira ne’e, ha’u mak boot liu. Tan ne’e mak Maromak hatudu nia laran luak mai ha’u, atu  iha ha’u, ema maksalak boot liu, Jesus Kristu bele hatudu nia pasiensia rohan laek ba ema seluk hotu nebe fiar Nia atu to’o  ba moris rohan laek. ¹⁷ Ba Liurai rohan laek ne’e, ba Maromak mesak ida deit nebe sei la mate no matan la hare, ba Nia naran boot no gloria tinan ba tinan nafatin. Amen.

Timoteo nia knaar

                ¹⁸ Timoteo, ha’u nia oan, ne’e mak lia menon nebe ha’u fo ba o: ha’u husu o atu hanoin fali profeta nia liafuan sira kona ba o; rai liafuan sira ne’e di-diak iha o nia fuan no hafunu ba nudar funu na’in diak ¹⁹ ho fiar no laran mos. Ema balun la hanoin ona kona ba sira nia laran no tan ne’e sira halo rahun sira nia fiar. ²⁰ Ha’u koalia kona ba Himeneo no Alexandre, nebe ha’u saran ona ba Satanas