3

Kreda nia katuas sira

                ¹ O bele laran metin ba liafuan ida ne’e: Hakarak sai bispu mak hakarak halo serbisu nebe diak los. ² Tan ne’e, bispu ida ten ke moris diak, hola feto dala ida deit; nia hatene ukun an, matenek no laran kmaus no sai mestre diak ida; ³ la’os lanuten ka si’akten, maibe laran diak no dame na’in. Nia la kaan ba osan. ⁴ Nia hatene tau matan di-diak ba nia familia hodi hanorin nia oan sira atu halo tuir nia haruka no sai ema ho hahalok diak: ⁵ oin sa ema ida bele tau matan ba Maromak nia Kreda wainhira nia la hatene tau matan ba nia familia rasik?  ⁶ Sarani foun la bele sai bispu, keta nia sai loko an, no tuir mai simu naran aat nudar diabu simu naran aat. ⁷ Mos, ema nebe la halo parte iha Kreda koalia diak kona ba nia, atu nune’e nia la bele hetan naran foer hodi monu ba diabu nia lasu.

Diakonu sira

                ⁸ Nune’e mos, diakonu sira ten ke sai ema ho naran diak; la’os bosokten; lanuten, no la buka osan, ⁹ laran metin kona ba misteriu fiar nian, no ho laran mos. ¹⁰ Ten ke koko sira lai, no wainhira la iha buat aat ruma hasouru sira mak bele simu sira nudar diakonu.

¹¹ Nune’e mos, feto sira ten ke sai ema diak, la konta ema nia moris, maibe neon na’in no ema bele fiar.

¹² Diakonu sira hola feto dala ida deit, no hatene tau matan di-diak ba sira nia oan no familia. ¹³ Nune’e sira nebe kaer di-diak knaar diakonu nian bele hetan naran diak ba sira an rasik no ema sei fiar lo-los sira iha sira nia serbisu ba fiar iha Kristu Jesus.

Kreda no moris klamar nian

                ¹⁴ Ha’u hakerek dau-daun ba o kona ba buat hirak ne’e, maibe ha’u hein katak la kleur ha’u bele hare o; ¹⁵ maibe ha’u la mosu lalais karik, ha’u hakarak katak o hatene oin sa ema sei moris iha Maromak nia uma laran, katak iha Maromak moris nia Kreda, nebe tahan lialos no rai nia di-diak. ¹⁶ Los duni, ita nia religiaun nia misteriu klean duni: Nia mosu ho isin, Espiritu fo sasin ba nia; anju sira hare nia, haklaken ona ba gentiu sira; ema fiar Nia iha mundu tomak, sa’e ba lalehan iha gloria.