5

                ¹ Keta si’ak ema nebe katuas liu o, maibe koalia ba nia hanesan ba o nia aman rasik; hare mane foinsa’e sira hanesan o nia alin sira, ² no ferik sira hanesan o nia inan. Hare fetoran sira ho laran mos, hanesan o nia feton sira.

Feto faluk sira

                ³ Ho feto faluk sira, sai laran luak ba; ha’u koalia kona ba sira nebe feto faluk teb-tebes. ⁴ Feto faluk ida iha oan ka bei-oan karik, sira sei hanoin uluk knanain atu halo sira nia knaar ba sira rasik nia familia hodi selu tusan ba sira nia aman inan, basa buat ida ne’e monu los ba Maromak nia laran. ⁵ Maibe feto nebe faluk teb-tebes no la iha ema atu tau matan ba nia, nia bele saran an ba Maromak hodi hasa’e nia moris hodi harohan no hamulak kalan loron. ⁶ Ema nebe hanoin deit atu haksolok, nia mate ona maski nia sei moris. ⁷ Hanorin ne’e ba sira atu sira nia moris sei sai sala laek: ⁸ ema nebe la tau matan ba nia parenti sira, liu-liu sira nebe horik hamutuk ho nia, ema ne’e hewai tiha nia fiar no aat liu fali ema nebe fiar laek.

                ⁹ Bele husik deit feto ida tau naran nudar feto faluk wainhira nia tinan neen nulu ona, no kaben dala ida deit, ¹⁰ iha naran diak kona ba nia hahalok, tau matan tiha ba nia oan sira, simu tiha ema la’o rai no fase tiha maun alin sira nia ain, fo tulun ba ema nebe hetan susar no halo tiha hahalok diak oi-oin. ¹¹ Keta simu feto faluk nebe sei foinsa’e, basa wainhira sira nia neon nudar feto sai maka’as liu sira nia hakarak atu serbi Kristu, sira sei hakarak kaben dala ida tan, ¹² no ema seluk sei koalia aat kona ba sira tan sira la metin ba sira nia promessa uluk nian. ¹³ Mos, sira sai barukten la’o housi uma ba uma; no la’os deit barukten maibe mos sira hahu koalia barak, no hateten buat nebe sira la bele hateten. ¹⁴ Ha’u hanoin katak diak liu ba feto faluk foinsa’e sira atu kaben dala ida tan hodi hetan oan no tau matan ba sira nia uma, nune’e sira la bele fo fatin ba funubalun sira atu koalia aat kona ba sira; ¹⁵ iha ona balun nebe husik tiha ita hodi tuir Satanas. ¹⁶ Feto sarani ruma iha karik parenti nebe faluk, nia sei tau matan ba nia atu la bele fo todan ba Kreda; nune’e Kreda bele tau matan ba sira nebe feto faluk lo-los.

Katuas sira

                ¹⁷ Katuas sira nebe halo sira nia knaar di-diak wainhira sira mak tau matan sei simu sira nia kolen dala rua; liu-liu sira nebe badinas atu haklaken no atu hanorin, ¹⁸ nudar eskritura dehan: “Karau nebe sama hare, imi la bele kesi nia ibun;” no mos: “Serbisu na’in soi nia kolen.” ¹⁹ Keta simu lia hasouru katuas ida wainhira la iha sasin rua ka tolu. ²⁰ Katuas ida metin ba sala karik, si’ak nia iha ema hotu nia oin, atu hanorin sira seluk. ²¹ Iha Maromak futar oin, no iha Jesus Kristu no anju sira nebe Nia hili nia futar oin, ha’u fo knaar ida ne’e ba o atu rai di-diak ukunfuan sira ne’e hodi la fihir ema. ²² Keta lalais atu tau liman ba ema ruma, no keta halo parte iha ema seluk nia sala; tahan nafatin o nia laran mos.

                ²³ O la bele hemu be deit maibe hemu tua uitoan atu tulun o nia kabun no atu la bele moras bei-beik.

                ²⁴ Ema nia sala balun bele hare kedas, nune’e bele tesi lia lalais; maibe iha mos sala balun nebe ema la hatene kedas. ²⁵ Nune’e mos, ema hare kedas hahalok diak balun; maibe maski ema la hare kedas, hahalok sira ne’e la bele subar ba nafatin.