II  TIMOTEO

1

Kumprimentu no agradese

                ¹ Housi Paulo, Kristu Jesus nia apostolu tan Maromak nia hakarak, tuir promessa kona ba moris iha Kristu Jesus, ² ba Timoteo, ha’u nia oan doben: grasa, laran luak no dame housi Aman Maromak no housi Kristu Jesus, ita Na’i.

                ³ Kalan loron ha’u fo agradese ba Maromak, nebe ha’u serbi ho laran mos nudar ita nia bei-ala sira halo, wainhira ha’u hanoin o iha ha’u nia orasaun. Ha’u hanoin o nia mataben, ⁴ no ha’u hakarak teb-tebes atu hare o dala ida tan. Ha’u hanoin o nia fiar nebe los: ⁵ fiar nebe hetan uluk iha o nia avo feto Luisa, no iha o nia inan Eunice, no ha’u hatene lo-los katak fiar ne’e mos iha o.

Presente nebe Timoteo simu tiha ona

                ⁶ Tan ne’e, ha’u dehan fali ba o atu halo moris hanesan ahi lakan presente nebe Maromak haraik ona ba o iha tempu nebe ha’u tau liman ba o. ⁷ Maromak nia presente ne’e la’os ema taukten nia neon, maibe espiritu kbiit, domin no ukun an nian. ⁸ Ne’e duni, o la bele moe wainhira o fo sasin kona ba ita Na’i, eh moe kona ba ha’u, Jesus nia dadur na’in; maibe hamutuk ho ha’u, o bele tahan terus no susar tamba evangeliu, hodi fiar deit kbiit Maromak nian, ⁹nebe soi ita no bolu ita atu sai santu; la’os tamba buat nebe ita rasik halo, maibe tamba Nia hakarak rasik no tamba nia grasa. Grasa ida ne’e fo tiha ona mai ita, iha Kristu Jesus, molok tempu hahu, ¹⁰ maibe foin mak fo hatene sai housi ita Maksoin, Kristu Jesus, nia hiit an mai. ¹¹ Nia sobu rahun mate, hodi haklaken moris rohan laek housi Evangeliu; no Maromak foti ha’u atu sai nia manu ain, nia apostolu no mestre.

                ¹² Tamba buat sira ne’e mak ha’u hetan susar; maibe ha’u la moe, basa ha’u hatene Ida nebe ha’u fiar, no ha’u hatene lo-los katak Nia bele tau matan ba buat hotu nebe Nia saran mai ha’u to’o loron neba.

                ¹³ Hare nudar doutrina los liafuan sira nebe o rona housi ha’u, iha fiar no domin nebe iha Kristu Jesus. ¹⁴ Tau matan di-diak ba lialos nebe Espiritu Santu saran ba o; Espiritu nebe horik iha ita.

                ¹⁵ O hatene ona katak Figelo no Hermogene no sira hotu seluk housi Asia husik tiha ha’u. ¹⁶ Ha’u hein katak Na’i sei hatudu nia laran diak ba Onesiforo nia familia tomak, basa nia fo ksolok nafatin mai ha’u no la moe kona ba ha’u nia korente sira. ¹⁷ La’os deit ida ne’e: wainhira nia to’o Roma, nia buka ha’u teb-tebes hodi hetan ha’u. ¹⁸ Na’i hatudu nia laran luak ba nia iha loron neba. O hatene lo-los oin sa nia fo tulun mai ha’u iha Efeso.