3

Lia menon seluk tan

                ¹ Halo sira hanoin katak sira iha knaar atu hamtauk liurai no Na’i ulun sira; sarani sira halo tuir sira nia haruka; sira sei hadia an nafatin atu halo hahalok diak; ² sira la bele halo aat ema nia naran, la buka istori malu, maibe laran diak no hatudu laran kmaus ba ema hotu. ³ Basa  uluk ita mos beik, ulun tos, la’o dalan sala; hakarak aat oi-oin ukun ita, ita moris ho laran aat no laran hirus; odi malu no mos hirus ita an rasik. ⁴ Maibe wainhira Maromak, ita Maksoin nia laran diak no domin mosu ona mai, ⁵ la’os tamba Nia hare buat diak ruma iha ita, maibe tamba deit Nia laran luak, mak Nia soi ita hodi be moris hi’as nian nebe hamos ita no hafoun ita ho Espiritu Santu, ⁶ nebe Nia fakar ho laran luak housi Jesus Kristu, ita Maksoin. ⁷ Nia halo ne’e atu ita bele sai los iha Maromak futar oin tan Nia grasa, atu sai liman rohan na’in nebe hein atu simu moris rohan laek. ⁸ O bele fiar ho laran metin doutrina ida ne’e, no ha’u hakarak katak o maka’as wainhira o hanorin buat hirak ne’e atu sira hotu nebe fiar Maromak haka’as an atu halo deit hahalok diak sira. Buat sira ne’e hotu mesa diak, no sei halo diak deit ba ema tomak.

Liafuan ba Tito rasik

                ⁹ Hado’ok an housi doutrina mamuk sira no liafuan sira kona ba bei-ala sira, no haksesuk malu kona ba ukunfuan, basa sira ne’e hotu mesa folin laek. ¹⁰ Kona ba ema nebe la’o la los, wainhira o halos tiha nia dala ida eh dala rua, hado’ok an ona housi nia. ¹¹ Hatene ba katak ema hanesan ne’e lakon ona no tesi lia ona hasouru nia an rasik nudar ema maksalak ida.

                ¹² Wainhira ha’u haruka tiha ona ba o Artemas ka Tiquico, o mai lalais atu hela ho ha’u iha Nikopoli. Ha’u hanoin atu hela neba iha tempu rai malirin nian. ¹³ Hare ba kona ba buat hotu nebe advogadu Zenas no ba Apolo sei kuran wainhira sira la’o dalan, keta sira hetan susar. ¹⁴ Ema hotu sei hanorin an atu serbisu mos ba sira nia moris loron loron nian; sira la bele halimar deit.

                ¹⁵ Sira hotu nebe hela ho ha’u haruka sira nia kumprimentu. Kumprimentu mos ba sira hotu nebe hadomi ami iha fiar.

Grasa ba imi hotu.

FILEMON

Introdusaun

                ¹ Housi Paulo, dadur na’in ida tamba Jesus Kristu, no housi ita nia alin Timoteo, ba ami nia maluk doben iha serbisu, Filemon, ² no ba Kreda nebe halibur iha o nia uma, no ba ami nia feto Apia, no mos ba ami nia maluk funu na’in Arquipo: ³ Maromak, ita Aman, no Na’i Jesus Kristu haraik ba imi grasa no dame.

Filemon nia domin no fiar

                ⁴ Maluk doben Filemon, ha’u fo agradese nafatin ba Maromak wainhira ha’u hanoin o iha ha’u nia orasaun, ⁵ basa ha’u rona kona ba o nia domin ba Maromak nia povu no kona ba o nia fiar iha Na’i Jesus. ⁶ Ha’u resa katak ita nia domin ba malu bele halo o hatene liu tan kona ba bensa hotu nebe ita hetan iha moris hamutuk ho Kristu. ⁷ O nia domin, alin doben, lori ksolok boot no laran moris mai ha’u! O halo Maromak nia povu haksolok teb-tebes.

Favor kona ba Onesimo

                ⁸ Tan ne’e maski ha’u aten berani nudar o nia maun iha Kristu atu haruka o atu halo buat ruma nebe kuran atu halo, ⁹ maibe tamba ha’u hadomi o mak ha’u husu de’it. Ha’u halo ne’e maski ha’u mak Paulo, Kristu Jesus nia saseluk, no ohin dadur na’in tamba Nia. ¹⁰ Ha’u husu o favor ida ne’e kona ba Onesimo, ha’u nia oan iha Kristu; iha dadur laran ha’u sai tiha nia klamar nia aman. ¹¹ Uluk, nia folin la iha ba o, maibe ohin, nia folin boot ona ba o no mai ha’u. ¹² Ohin, ha’u haruka nia fila fali ba o no ha’u nia fuan la’o hamutuk ho nia. ¹³ Bele karik, ha’u hakarak katak nia hela hamutuk ho ha’u iha ne’e, nebe dadur hela tamba evangeliu, atu nia tulun ha’u iha o nia fatin. ¹⁴ Maibe ha’u lakohi obriga o atu tulun ha’u; ha’u hakarak katak o tulun ha’u ho o rasik nia hakarak. Ha’u sei book de’it ho o nia laran luak.

                ¹⁵ Ba tempu uitoan, Onesimo haketak an housi o, maibe ne’e atu o bele simu nia ba nafatin karik, ¹⁶ la’os tan nudar atan ida maibe nudar o nia alin doben ona iha Kristu. Nia folin boot duni mai ha’u no nia sei sai folin boot mos ba o,  iha isin no mos iha Na’i!

                ¹⁷ Ne’e duni, o hanoin ha’u nudar o nia maluk ida karik, simu nia ba nudar o simu ha’u rasik. ¹⁸ Nia halo aat ruma eh iha tusan ba o karik, sisi nia tusan mai ha’u. ¹⁹ Ha’u, Paulo, hakerek surat ne’e ho ha’u nia liman rasik: ha’u sei selu fali o. Tebes duni, ha’u la kuran atu fo hatene fali ba o katak o mos iha tusan boot mai ha’u, o nia moris rasik. ²⁰ Ne’e duni, ha’u nia alin, halo favor ida ne’e mai ha’u tamba Na’i; fo ksolok mai ha’u iha Kristu!

                ²¹ Ha’u hatene lolos katak, nudar ha’u hakerek, o sei halo buat nebe ha’u husu--lolos, o sei halo liu tan. ²² Ohin mos, hadia fatin ida mai ha’u, basa ha’u hein katak Maromak sei rona imi nia hamulak no sei haraik ha’u fali ba imi.

Liafuan ikus nian

                ²³ Epafras, nebe hela iha dadur laran hamutuk ho ha’u tamba Kristu, haruka nia kumprimento ba o; ²⁴ nune’e mos ha’u nia maluk iha serbisu: Marcos, Aristarco, Demas, no Lucas. ²⁵ Na’i Jesus Kristu nia grasa hela ho imi hotu.