2

Laran metin ba Na'i nia liafuan

                ¹ Ne’e duni, ita sei se tilun liu tan ba buat nebe ita rona ona, atu ita la bele la’o dook housi nia. ² Basa lia menon nebe haklaken tiha housi anju sira metin duni karik, no ema nebe la halo tuir hetan nia kastigu, ³ oin sa ita bele halai wainhira ita la tuir maksoin boot ida ne’e? Uluk, ita rona nia housi Na’i, no ikus mai, sira nebe rona nia hametin nia liu tan ba ita. ⁴ Maromak fo sasin tan ho sinal, hahalok kmanek, hahalok nebe Nia halo ho kbiit wa’in, no mos housi Espiritu Santu nia kmanek oi-oin nebe fahe tiha ona tuir Nia hakarak.

Hodi hatun Jesus mak Maromak foti Nia

                ⁵ Basa la’os ba anju sira mak Maromak saran mundu nebe atu mai, mundu nebe ita koalia dau-daun ne’e. ⁶ Maibe ema ida fo sasin iha fatin ruma: “Ema ne’e se atu Ita hanoin nia, ka ema nia oan atu Ita tau atan ba nia? ⁷ Ita halo nia hanesan anju ida, kuran uitoan deit; Ita hafutar nia ho gloria no hahi, ⁸ hodi tau buat hotu iha nia ain nia okos.” ⁸ Hodi tau buat hotu iha nia ukun, Maromak la husik buat ida nebe la tau iha nia ukun. Maibe ohin ita la hare katak “buat hotu iha nia ukun,” ⁹ maibe ita hare duni Jesus “hafutar an ho gloria no hahi” basa Nia terus to’o mate, Nia nebe “ba tempu uitoan” sai tiha “kiik liu anju sira,” atu nune’e, ho Maromak nia grasa, Nia bele koko mate tan ema hot-hotu. 

                ¹⁰ Basa los duni katak Nia, nebe tan Nia no housi Nia mundu mosu; wainhira Nia lori oan barak ba gloria, halo oan sira ne’e nia ulun iha maksoin sai diak lo-los housi terus. ¹¹ Ida nebe halo santu no sira nebe sai santu mai housi ida deit. Ne’e duni, Nia la moe atu bolu sira “alin”, ¹² hodi dehan: “Ha’u sei haklaken Ita Boot naran ba ha’u nia alin sira, Iha sira leet mak ha’u sei hahi Ita.” ¹³ No dala ida tan: “Ha’u sei tau Ha’u nia laran ba Nia.” no mos: “Ha’u mak ne’e ho oan sira nebe Maromak haraik tiha mai Ha’u.” ¹⁴ Tan oan sira halo parte iha isin no ran, Nia mos halo parte iha sira nian, atu nune’e, hodi mate, Nia bele halakon ida nebe iha kbiit atu oho, katak diabu, ¹⁵ no hasai sira nebe tan sira tauk mate sai tiha atan iha sira nia moris tomak. ¹⁶ Tebes duni, Nia la hanoin anju sira maibe Abraao nia bei-oan sira. ¹⁷ Ne’e duni, Nia ten ke sai hanesan nia alin sira iha buat hotu, atu nune’e Nia bele sai ema laran luak ida no am’lulik boot nebe laran metin iha Maromak futar oin atu selu povu sira nia sala. ¹⁸ Tan Nia rasik koko babeur housi buat nebe halo Nia terus mak Nia bele fo tulun ba sira nebe hetan babeur.