4

Hakmatek iha loron Sabadu

                ¹ Ne’e duni, promessa atu tama iha Na’i nia hakmatek sei hela nafatin, maibe ita ten ke matan moris atu imi ida la bele lakon. ² Basa ita simu duni liafuan diak hanesan sira simu, maibe liafuan nebe sira rona la lori diak ba sira, basa sira nebe rona nia la simu nia ho fiar. ³ Ita nebe fiar ona tama iha hakmatek ne’e, nudar Na’i dehan: “Nudar Ha’u jura ho laran nakali, 'Sira sei la tama iha Ha’u nia hakmatek,’” maibe Na’i nia hahalok sira hotu tiha wainhira mundu ne’e hahu. ⁴ Na’i koalia iha fatin ruma kona ba loron hitu nune’e, “No Maromak hakmatek hela iha loron hitu housi nia serbisu hotu;” ⁵ no dala ida tan, iha fatin nebe ita temi tiha, “Sira sei la tama iha Ha’u nia hakmatek.” ⁶ Ne’e duni, tan hateten lo-los katak balun sei tama iha Na’i nia hakmatek, no sira nebe simu tiha liafuan diak la tama tan sira lakohi halo tuir, ⁷ Na’i marka loron ida tan, “Ohin ne’e,” wainhira tempu kleur liu tiha Nia koalia housi David, hanesan ita dehan ona: “Ohin  imi rona karik Nia lia, keta halo tos imi nia fuan.’” ⁸ Josue fo tiha hakmatek ba sira karik, Maromak sei la koalia tan kona ba loron seluk. ⁹ Ne’e duni, hakmatek iha loron Sabadu hela nafatin ba Maromak nia povu. ¹⁰ No ema nebe tama iha Maromak nia hakmatek, hakmatek mos housi nia serbisu sira nudar Maromak halo. ¹¹ Ne’e duni, ita sei haka’as an atu tama iha hakmatek ne’e, atu ita ida la bele monu hanesan sira nebe lakohi halo tuir nia esemplu.

                ¹² Tebes duni, Maromak nia liafuan moris no book maka’as, kroat liu fali surik ida ho kroat rua, nebe bele tesi ketak klamar no espiritu, ruin no bokur, no bele hatene lo-los buat nebe ema hanoin no hakarak iha nia fuan. ¹³ La iha buat ida nebe subar housi Nia; buat hotu bele hare no nakloke deit ba nia matan. Ba Nia ita sei hatan kona ba buat hotu.

Jesus, am’lulik boot nebe laran diak

                ¹⁴ Ne’e duni, tan ita iha am’lulik boot nebe liu tiha housi lalehan, Jesus, Maromak nia Oan Mane, ita haka’as an atu laran metin ba ita nia fiar. ¹⁵ Basa ita la iha am’lulik boot nebe la hatene hanoin ita nia kbiit laek. Maibe Nia rasik hetan mos babeur iha buat hotu, maibe la sala. ¹⁶ Ne’e duni, ita hakbesik ho laran metin ba kadunan grasa nian atu simu laran luak no hetan grasa no tulun wainhira ita presisa .