6

La’o ba oin iha doutrina

                ¹ Ne’e duni, ita husik tiha doutrina uluk liu kona ba Kristu no la’o ba oin hodi sai ema boot; ita la tau aliserse dala ida tan, katak: hakribi hahalok mate nian no fiar Maromak, ² hanorin kona ba baptismu, tula liman ba ema, moris hi’as housi mate no tesi lia ba moris rohan laek. ³ Ho Maromak nia tulun, ita sei halo ida ne’e. ⁴ Basa la bele lori fali atu hakribi sala sira nebe simu ona naroman no koko ona kmanek lalehan nian, no halo ona parte Espiritu Santu nia kmanek, ⁵ hodi haksolok iha Maromak nia liafuan no kbiit otas sira atu mai nian, ⁶ basa wainhira sira husik fali sira nia fiar, sira hedi fali ba krus Maromak nia Oan Mane hodi hakarak no hasara Nia iha ema hotu nia oin. ⁷ To’os nebe udan habokon bei-beik, no fo fuan tuir to’os na’in nia hakarak, simu Maromak nia bensaun; ⁸ maibe wainhira to’os fo deit ai-tarak no du’ut fuik la folin buat ida, no ema besik atu fo malisan ba nia. Ikus mai ema sunu nia.

Liafuan atu fo aten berani no esperansa

                ⁹ Maski ami koalia nune’e, ha’u nia doben sira, ami hatene katak imi diak liu no la’o tuir dalan los ba maksoin. ¹⁰ Maromak la laran aat atu haluha imi nia hahalok sira no imi domin nebe imi hatudu ba Nia wainhira imi serbi santu sira, no sei halo dau-daun. ¹¹ Ami hakarak katak imi ida-ida sei hatudu nafatin imi nia laran diak to’o rohan, hodi halo ami nia esperansa halo tuir lo-los duni to’o rohan; ¹² atu imi la baruk maibe banati tuir sira nebe tan fiar no pasiensia sei simu Maromak nia promessa.

                ¹³ Wainhira Maromak halo promessa ba Abraao, Nia jura hodi nia an rasik, basa Nia la bele jura hodi buat seluk nebe boot liu fali Nia. ¹⁴ Nia dehan: “Ha’u sei fo bensaun ba o no halo wa’in o nia bei-oan sira.” ¹⁵ Tan ne’e mak Abraao, ho nia laran metin to’o rohan. Simu duni Maromak nia promessa. ¹⁶ Los duni, ema jura hodi buat seluk nebe boot liu fali sira, no iha ema sira leet, wainhira sira hametin lia ruma ho juramentu, sira la haksesuk malu tan. ¹⁷ Nune’e, wainhira Maromak hakarak hatudu ba sira nebe sei sai liman rohan na’in ba Nia promessa katak Nia laran metin duni, Nia hatudu ne’e ho juramentu ida; ¹⁸ nune’e  housi buat rua nebe la muda iha nebe Maromak la bele bosok, ita mos nebe hetan ona maksoin bele hetan kbiit atu laran metin ba esperansa nebe fo ona mai ita. ¹⁹ Iha ne’e, ita iha ankor diak no metin ba ita nia klamar, esperansa nebe tama ba santuariu laran nian liu fali kurtina nian, ²⁰ nebe Jesus tama ba uluk liu ita ba ita nia diak, atu sai am’lulik boot tuir Melquisedec ba nafatin.