9

Kristu tama iha santuariu lalehan nian

                ¹ Aliansa uluk mos iha ukunfuan sira kona ba oin sa atu adora Maromak, no iha nia santuariu ida nebe rai ne’e nian. ² Iha Tenda ida ho fatin rua: ida uluk naran Fatin Lulik. Iha neba ahi-oan fatin, meja no paun lulik sira hela; ³ tuir mai, liu tiha kurtina ida tan, mak fatin laran liu, naran Fatin Lulik Lulik sira nian. ⁴ Iha neba altar osan mean insensu nian, Arka aliansa nian nebe taka hotu ho osan mean. Iha fatin ne’e mos, ema tau sana osan mean nian ho mana iha nia laran; Aarao nia ai-sanak housi nebe dikin sira sai tinan tinan, no fatuk belar aliansa nian. ⁵ Iha ida ne’e nia leten mak kadunan laran luak nian, no kerubim sira. Ohin la’os tempu atu koalia barak kona ba ida ne’e.

                ⁶ Tuir ukunfuan sira ne’e, am’lulik sira ba bei-beik Tenda liur nian atu halo tuir sira nia knaar adorasaun nian, ⁷ maibe dala ida deit iha tinan ida nia laran mak am’lulik boot deit tama iha Tenda laran nian atu lori ran nebe nia hasa’e ba nia rasik nia sala no ba povu sira nia sala. ⁸ Ho ida ne’e, Espiritu Santu hatudu katak ema ida la iha direitu atu tama iha santuariu wainhira Tenda liur sei iha; ⁹ nia mak ilas tempu ohin ne’e nian. Presente no buat karan sira nebe hasa’e tuir ukunfuan sira ne’e la bele halo sira nebe adora sai santu lo-los iha nia laran; ¹⁰ ukunfuan sira ne’e kona ba moris liur nian deit, kona ba aihan no buat hemu nian no fase an iha tempu oi-oin. Ukunfuan sira ne’e la’o deit to’o tempu nebe los ona atu hafoun sira.

                ¹¹ Maibe wainhira Kristu mai ona nudar am’lulik boot buat diak hotu nian nebe atu mai, Nia tama ona ba Tenda nebe boot liu, nebe kmanek liu, diak liu fali ida nebe ema nia liman mak halo. Basa Tenda ne’e la halo ho ema nia liman. ¹² Nia tama iha santuariu ne’e dala ida deit ba nafatin, hodi lori la’os bibi no karau oan nia ran, maibe Nia ran rasik hodi manan mai ita maksoin rohan laek. ¹³ Basa wainhira am’lulik hisik bibi no karau nia ran no ahi-kdesan karau inan nian, hamos fali karik iha liur sira nebe sai foer tiha no sira ne’e; ¹⁴ oin sa liu tan mak Kristu nia ran folin liu atu hamos ita nia laran housi hahalok mate sira nian, atu nune’e ita bele halo ita nia knaar ba Maromak moris. Kristu hasa’e nian an ba Maromak  nudar buat karan diak los housi Espiritu rohan laek.

Kristu hametin aliansa foun ho nia ran

                ¹⁵ Ne’e duni, Nia mak Lia Na’in aliansa foun nian, atu nune’e sira nebe Maromak bolu bele simu duni liman rohan rohan laek nebe hakotu tiha ona: basa mate mosu atu kasu sala hasouru aliansa uluk nian. ¹⁶ Wainhira iha testamentu mate nian, ten ke hatene lo-los katak ida nebe halo nia mate ona duni; ¹⁷ testamentu mate nian ne’e bele hala’o deit wainhira ida nebe halo nia mate ona, basa nia folin la iha wainhira ida nebe halo nia sei moris. ¹⁸ Ne’e duni aliansa uluk nian ten ke hametin mos ho ran. ¹⁹  Wainhira Moises fo hatene tiha ona ba povu ukunfuan sira hotu, nia kaer karau oan sira nia ran, bibi sira nia ran ho be uitoan, no ho sira ne’e nia hisik livru no povu, hodi usa bibi fulun mean no hisopu sanak, ²⁰ hodi dehan: ‘Ne’e mak ran aliansa nian nebe Maromak hametin ba imi.’ ²¹ Ne’e hotu tiha, nia hisik mos ho ran Tenda no kopu hotu nebe usa ba liturgia. ²² Lo-los, tuir ukunfuan, buat hot-hotu ten ke hamos lai ho ran; no ran la fakar karik, la iha perdua ba sala sira.

²³ Ilas sira kona ba buat lalehan nian ten ke hamos deit ho hahalok sira hanesan ne’e; maibe sasan lalehan nian rasik ho sakrifisiu nebe boot liu sira ne’e. ²⁴ Basa Kristu tama, la’os iha santuariu nebe ema nia liman mak halo, nebe halo tuir ida nebe los; maibe Kristu tama iha lalehan rasik, nune’e Nia bele mosu iha Maromak futar oin  ba ita nia diak. ²⁵ Nia la presisa hasa’e nia an fila fila hanesan am’lulik boot tama iha Fatin Lulik tinan tinan ho ran nebe la’os ninian rasik; ²⁶ lae karik, nia ten ke terus fila fila hahu housi tempu mundu ne’e mosu. Nia mosu dala ida deit ba nafatin, iha tempu ikus nia rohan, atu halakon sala hodi hasa’e nia an nudar sakrifisiu. ²⁷ Nudar ema hotu ten ke mate dala ida deit, no mate tiha, Maromak tesi lia ba nia, ²⁸ nune’e mos, Kristu hasa’e tiha Nia an dala ida deit atu simu ema barak nia sala ba nia an rasik, sei mosu dala ida tan, la’os atu hare kona ba sala, maibe atu fo maksoin ba sira nebe hein Nia dau-daun.