10

Sakrifisiu uluk nia kbiit laek

                ¹ Ne’e duni, tan ukunfuan mak buat sira nebe atu mai nia ilas deit, no la’os hanesan buat los sira, ho sakrifisiu sira nebe halo tinan tinan ukunfuan ne’e la bele halo fiarna’in sira sai ema los. ² Lae karik, la halo ona sakrifisiu sira ne’e, basa wainhira fiarna’in sira hamos tiha an, sei la hatene tan kona ba sala. ³ Maibe lae; ho sakrifisiu sira ema hanoin sira nia sala tinan tinan. ⁴ Basa karau aman no bibi timor nia ran la bele kasu sala

⁵ Nune’e wainhira Kristu mai iha mundu, Nia dehan nia: “Ita nebe lakohi sakrifisiu ka buat karan sira; maibe Ita prepara isin mai Ha’u. ⁶ Ita la haksolok ho buat karan sunu nian ka sakrifisiu ba sala sira; ⁷ no Ha’u dehan, 'Maromak, Ha’u mak ne’e! Ha’u mai atu halo tuir Ita nia hakarak,' nudar hakerek nanis kona ba Ha'u iha livru.” ⁸ Wainhira Nia dehan: “Ita lakohi no la haksolok ho sakrifisiu no buat karan sira , no buat sunu no sakrifisiu ba sala sira nian” nebe ukunfuan haruka hasa’e, ⁹ tuir mai Nia dehan tan: “Ha’u mak ne’e! Ha’u mai atu halo tuir Ita nia hakarak,”  Nia halakon ida uluk nian atu harii fali ida ikus nian. ¹⁰ Ho Nia hakarak ne’e mak ita sai santu housi nia isin nebe Jesus Kristu  hasa’e tamba ita dala ida deit ba nafatin.

Kristu nia sakrifisiu nia folin

                ¹¹ Am’lulik sira hotu kaer sira nia knaar loron loron, hodi hasa’e fila fila sakrifisiu sira nebe la bele kasu sala. ¹² Maibe wainhira Kristu hasa’e tiha ba nafatin sakrifisiu ida deit atu kasu sala, tur iha Maromak nia kuana, ¹³ iha nebe Nia hein dau-daun to’o tempu nebe nia funubalun sira sai nia ain fatin. ¹⁴ Basa ho sakrifisiu ida deit, Nia halo los ba nafatin sira hotu nebe Nia halo santu. ¹⁵ No Espiritu Santu fo sasin ba ida ne’e mai ita; basa dehan tiha: ¹⁶ “Ne’e mak aliansa nebe Ha’u halo ho sira wainhira loron hirak ne’e mosu mai, Na’i dehan: Ha’u sei tau Ha’u nia ukunfuan iha sira nia fuan no hakerek nia iha sira nia hanoin;” ¹⁷ Nia dehan tan: “Ha’u sei la hanoin tan sira nia sala, ka sira nia hahalok aat.” ¹⁸ Wainhira sala hotu kasu tiha ona, sei la iha tan buat karan ba sala.

Sarani sira nia sorte boot

                ¹⁹ Ne’e duni, maun alin sira, ita laran metin katak ita sei tama iha santuariu tan Jesus nia ran, ²⁰ liu housi dalan foun nebe Nia loke mai ita liu housi kurtina ida, katak nia isin rasik. ²¹ No tan ita iha am’lulik boot liu nebe tau matan ba Maromak nia uma-kain tomak, ²² ita haka’as an atu hakbesik  ho laran los no nakonu ho fiar, ho ita nia fuan hisik mos ona no housi laran aat no ita nia isin fase tiha ona ho be mos. ²³ Ita laran metin ba esperansa nebe ita iha hodi la namlele tan, basa ida nebe halo promessa ne’e la bosok. ²⁴ Ita hanoin oin sa ita bele haka’as malu atu hadomi no halo hahalok diak, ²⁵ hodi la haluha atu halibur an, nudar balun halo dau-daun ona, maibe fo laran manas ba malu; liu-liu tan imi hare katak Loron ne’e besik ona mai.

Perigu atu fila ba kotuk

                ²⁶ Ita halo sala karik hodi hakarak, wainhira ita simu ona matenek kona ba lialos, la iha ona sakrifisiu ba sala, ²⁷ maibe iha deit lia kastigu nian nebe halo ema tauk no ahi maka’as nebe sei sunu mohu funubalun sira hotu. ²⁸ Ema nebe halo sala hasouru Moises nia ukunfuan ten ke mate tamba deit ema na’in rua ka tolu nia lia sasin. ²⁹ Kastigu boot liu oin sa, tuir imi nia hanoin, sei hato’o ba ema nebe trata aat Mane Maksoin, no hare ran aliansa nian hanesan buat nebe la santu, no hasara Espiritu grasa nian. ³⁰ Ita hotu hatene se mak dehan: “Ha’u iha laran nakali. Ha’u sei selu fali.” No mos, “Na’i sei tesi lia ba nia povu.” ³¹ Monu ba Maromak moris nia liman halo ita tauk teb-tebes.

Metin to’o rohan

                ³² Hanoin fali loron sira nebe, wainhira imi simu ona naroman, imi tahan terus hotu nebe imi hetan; ³³ dala ruma ema hasara no hanehan imi iha ema hotu nia oin, no dala ruma imi hare ema trata aat imi nia maluk sira hanesan ne’e. ³⁴ Basa imi la hatudu deit laran luak ba ema nebe iha kadeia laran nia terus, maibe imi simu ho ksolok wainhira ema hadau imi nia rikusoi, tamba imi hatene katak imi iha rikusoi nebe folin liu no rohan laek. ³⁵ Ne’e duni, ohin mos, keta lakon imi nia laran metin, basa imi nia kolen boot duni. ³⁶ Imi presisa laran metin to’o rohan, atu hala’o Maromak nia hakarak hodi manan Nia promessa. ³⁷ “Sei uitoan tan, no sei uitoan liu tan duni, no ida nebe atu mai sei mai; Nia sei la tarda; ³⁸ maibe Ha’u nia ema nebe laran los sei moris tuir fiar, maibe nia dada an karik, Ha’u nia klamar sei la haksolok iha nia.” ³⁹ Ita la’os ema sira nebe dada an no tan ne’e mak lakon tiha; ita mak ema nebe laran metin to’o tempu nebe ita klamar hetan ona maksoin.