12

Jesus nia esemplu

¹ Ne’e duni, ho sasin lubuk nebe hale’u ita, ita mos, sei husik tiha buat hotu nebe hatodan ita, liu-liu sala nebe belit met-metin mai ita, hodi halai to’o rohan iha konkursu nebe ita tuir dau-daun, ² hodi hare ba Jesus nebe hatudu dalan mai ita iha fiar no halo ita nia fiar sai diak los: tan ksolok nebe Nia atu hetan, Nia simu krus, la hodi moe. Ohin, Nia tur ona iha Maromak nia  kadunan nia sorin kuana. ³ Hanoin ba oin sa Nia la’o ba oin maski ema maksalak sira taka nia dalan, atu nune’e imi sei la kole ka fuan namlele. ⁴ Iha funu hasouru sala, imi seidauk halo funu to’o fakar imi nia ran.

Maromak nia liafuan

                ⁵ Imi haluha tiha ona liafuan nebe hamanas imi iha nebe Maromak koalia ho imi hanesan Nia oan rasik? “Ha’u nia oan, wainhira Na’i korige o keta rona ho laran malirin deit; no keta lakon aten berani wainhira Nia si’ak o. ⁶ Basa Na’i hanorin disiplina ba sira nebe Nia hadomi no fo kastigu ba sira nebe Nia hare nudar Nia oan.” ⁷ Tan disiplina mak imi ten ke tahan terus. Maromak trata imi hanesan Nia oan sira. Oan ida nebe mak nia aman la hanorin ho disiplina? ⁸ Imi la iha disiplina karik, nudar imi hotu simu dau-daun, imi la’os oan lo-los maibe oan iha liur. ⁹ Mos, ita hotu iha aman rai ne’e nian nebe hanorin disiplina mai ita, no ita hamtauk sira tamba ne’e. Ita lakohi halo tuir liu tan ita nia Aman klamar nian, atu ita bele moris? ¹⁰ Ita nia aman sira rai ne’e nian hanorin ita tuir buat nebe sira hanoin mak diak; maibe Nia halo hotu ne’e ba ita nia diak, atu ita bele halo parte iha Nia rasik nia santidade. ¹¹ Los duni, kastigu naran deit todan liu iha nia tempu, no halo ita la haksolok; maibe kastigu liu tiha, nia fo fuan dame no justisa ba sira nebe simu tiha nia. ¹² Ne’e duni, hametin imi nia liman nebe kbiit laek no haka’as imi nia aintur nebe nakdedar hela ¹³ no halos dalan nebe imi la’o ba; atu imi nia isin kanek sei la terus liu tan maibe sei sai diak fali.

Ema nebe laran la metin sei hetan todan

                ¹⁴ Imi haka’as an atu moris nafatin iha dame laran ho ema hot-hotu, no mos atu hetan iha santidade. Santidade la iha karik, ema ida la bele hare Na’i. ¹⁵ Hare ba katak ema ida la bele lakon Maromak nia grasa no hare ba katak laran moras la bele tau abut hodi sai boot no halo rungu-ranga; ne’e bele halo aat ema barak. Keta husik sala foer mosu, no imi ida keta hatun religiaun hanesan Esau ¹⁶ nebe faan nia liman rohan ho aihan han dala ida deit nian. ¹⁷ Imi hatene ona katak wainhira nia hakarak simu fali bensa, ema la simu nia basa la fo fatin ba nia atu muda nia hanoin, maski nia husu bensaun ne’e hodi tanis.

Aliansa rua

                ¹⁸ Imi nia hanoin seidauk to’o ba buat nebe imi hetan tiha: la’os ahi lakan maka’as, ka nakukun nebe nakukun tebes, ka anin maka’as ida, ¹⁹ la’os rai tarutu hanesan trombeta ka lia maka’as nebe koalia nune’e ema nebe rona husu hodi kbiit atu la bele koalia liu tan ba sira. Sira la bele tahan buat nebe ema haruka sira halo: “Maski balada ida mos kona foho ne’e, sei tuda nia.” ²⁰ Buat hotu halo ema tauk teb-tebes, nune’e Moises dehan: “Ha’u nakdedar hodi tauk.” ²¹ Maibe to’o ba Foho Siao no Maromak moris nia sidade, Jerusalem lalehan iha nebe anju sira, rihun ba rihun, halibur an tiha ba festa, ²³ hamutuk ho kreda tomak iha nebe ema ida-ida mak “oan mane boot” no lalehan nia na’in. Imi to’o ona ba Tesi Lia Na’in nebe boot liu hot-hotu, nebe ema hot-hotu nia Maromak. Imi halibur malu ho santu sira nia espiritu nebe sai ona diak los. ²⁴ Imi hetan tiha Jesus, lia na’in nebe lori ona mai aliansa ida. Imi hetan ona ran nebe hisik tiha, nebe hakilar liu fali Abel ninian.

²⁵ Hare ba katak imi hakribi ida nebe koalia. Sira nebe lakohi rona liafuan rai ne’e nian la bele halai housi sira nia kastigu; no oin sa ita bele halai wainhira ita la se tilun ba lia nebe mai housi lalehan? ²⁶ Iha tempu neba, Nia lia halo rai nakdoko, maibe ohin Nia halo promessa ida ne’e: “Ha’u sei halo rai nakdoko dala ida tan no la’os rai deit maibe lalehan mos.” ²⁷ Liafuan “dala ida tan” hatudu katak buat sira nebe nakdoko sei hasai tiha, atu sira nebe la nakdoko sei hela. ²⁸ Ne’e duni, ita fo agradese tan ita simu ona reinu nebe la nakdoko. Ho nia, ita hasa’e adorasaun nebe monu los ba Maromak nia laran ho laran haraik an no tauk. ²⁹ Basa ita nia Maromak mak hanesan ahi maka’as nebe sunu hotu.