13

Hadomi malu nafatin

                ¹ Kontinua hadomi malu nafatin nudar maun alin, ² no hanoin atu simu ema la’o rai sira ho laran diak, basa hodi halo nune’e ema balun simu tiha anju sira hodi la hatene. ³ Hanoin sira nebe iha dadur laran, hanesan imi rasik iha dadur laran hamutuk ho sira; no mos sira nebe ema trata aat, basa imi mos iha isin ida. ⁴ Imi hot-hotu respeita kaben na’in sira nia moris hamutuk; keta hafoer nia, basa Maromak sei tesi lia ba sira nebe halo sala foer ho foinsa’e ka kaben na’in sira. ⁵ Hadook imi housi nia moris domin ba osan, no haksolok ba ho buat nebe imi iha; basa Maromak rasik dehan: “Ha’u sei la husik ka hadook an housi imi,” ⁶ Ne’e duni, ita bele dehan ho laran metin, “Ho Maromak nia tulun, ha’u la tauk buat ida: ema bele halo sa ida mai ha’u?”

Laran metin

                ⁷ Hanoin imi nia na’in ulun sira, nebe haklaken Maromak nia liafuan ba imi; hanoin oin sa sira moris, no halo tuir sira nia fiar. ⁸ Jesus Kristu nune’e nafatin ohin hanesan hourse’ik no ba nafatin. ⁹ Keta husik hanorin oi-oin halo imi la’o tuir dalan sala oi-oin: diak liu halo grasa fo kbiit ba imi nia fuan, la’os ho aihan, nebe la halo diak ba sira nebe fiar sira. ¹⁰ Ita iha altar housi nebe sira nebe serbi iha tabernakulu la bele han. ¹¹ Basa ema sunu iha sidade nia liur balada sira nia naan nebe am’lulik boot sira hatama sira nia ran iha santuariu atu selu ema nia sala. ¹² Nune’e Jesus terus iha odamatan boot nia liur atu halo santu povu ho Nia rasik nia ran. ¹³ Ne’e duni, ita hakbesik ba Nia, iha liur terus ho Nia wainhira ema hasara Nia. ¹⁴ Basa iha moris ne’e, ita la iha sidade rohan laek, maibe ita hein ida iha moris nebe atu mai. ¹⁵ Housi Nia, ita hasa’e nafatin sakrifisiu hahi rohan laek nian ba Maromak; katak liafuan sira housi ibun nebe simu  Nia naran. ¹⁶ Keta haluha halo hahalok diak nafatin no fahe imi nia rikusoi ba malu, basa sakrifisiu sira ne’e mak sakrifisiu nebe monu los ba Maromak nia laran.

Halo tuir Na’i ulun sira

                ¹⁷ Rona imi nia na’i ulun sira no halo tuir buat nebe sira dehan ba imi, basa sa sira tau matan ba imi no sei hatan ba Maromak. Halo sira haksolok iha knaar ida ne’e, la’os ho laran todan,  lae karik, imi rasik sei lakon. ¹⁸ Ami hatene lo-los katak ami rasik nia laran mos, no ami hakarak duni atu moris ho laran mos iha buat hotu nebe ami halo. ¹⁹ Ha’u husu imi nia orasaun ho laran manas liu tan atu ha’u bele fila fali ba imi lalais.

                ²⁰ Maromak dame nian nebe halo ita Na’i Jesus Kristu moris hi’as fali housi mate, Bibi Atan Boot bibi sira nian housi ran aliansa rohan laek nian, ²¹ halo imi, hodi serbisu iha imi nia laran, atu sai prontu atu halo tuir Nia hakarak iha hahalok diak naran deit nebe monu los ba Nia laran housi Jesus Kristu; ba Nia, gloria nafatin ba nafatin, amen.

                ²² Maun alin sira, ha’u husu imi atu simu ho laran diak lia menon sira ne’e nebe ha’u hakerek surat badak ne’e ba imi.

                ²³ Ha’u hakarak fo hatene ba imi katak ita nia alin Timoteo sai tiha ona. Nia to’o mai lalais karik, ami sei la’o hamutuk atu hare imi. ²⁴ Kumprimentu ba imi nia na’i ulun no ba santu sira hotu. Santu sira housi Italia haruka sira nia kumprimentu ba imi. ²⁵ Grasa ba imi hotu. Amen.