3

Moris iha uma laran

                ¹ Feto sira, imi rona imi nia kaben ba; atu imi bele lori sira balun mai nebe la halo tuir liafuan, la’os tamba liafuan ruma, maibe ho sira fen nia hahalok, ² wainhira sira hare imi nia hahalok santu no mo-mos. ³ Keta hafurak imi an ho buat nebe bele hare: imi nia fuuk, osan mean eh hatais kmanek, ⁴ maibe ho murak klamar nian; imi nia laran kmaus no diak, nebe folin boot liu iha Maromak futar oin. ⁵ Nune’e mak feto santa sira nebe tau sira nia esperansa iha Maromak hafurak sira an no sira nia halo tuir sira nia laen nia hakarak; ⁶ nudar Sara rona Abraao, hodi hanaran nia na’i. Imi Sara nia oan, wainhira imi halo buat nebe los hodi la husik buat ida halo imi tauk. ⁷ Nune’e mos, imi laen sira, buka moris hodi hanoin imi nia fen, hodi hamtauk feto sira nudar ema kbiit laek, basa imi na’in rua sei simu hamutuk liman rohan grasa moris nian, atu nune’e imi nia orasaun bele la’o lo-los.

Lia menon ba ema hotu

                ⁸ Ikus mai, imi hotu, neon ida deit iha espiritu ba, hanoin malu, domin ba maluk sarani sira, laran kmaus no haraik an. ⁹ Keta selu aat ho aat, eh hirus malu ho hirus malu; maibe imi fo bensa ba, basa ba buat ida ne’e mak Maromak bolu imi, atu imi mos bele simu bensa. ¹⁰ Basa, ema nebe hadomi moris hodi hakarak hare loron diak sira, nia sei hadook nia nanal housi buat aat no nia ibun housi lia lohi nian. ¹¹ Nia sei hadook an housi buat aat hodi halo diak; nia sei buka dame hodi haka’as an atu hetan nia. ¹² Basa Maromak tau matan ba sira nebe los; Nia se tilun ba sira nia orasaun. Maibe Maromak hatos nia oin ba sira nebe halo aat. ¹³ Se mak hakarak halo aat ba imi wainhira imi buka namanas buat nebe diak? ¹⁴ Maibe imi terus duni tan justisa karik, imi sei hetan bensa. Keta tauk sira, eh sai laran taridu; ¹⁵ Iha imi nia laran, hamtauk Kristu, ita Na’i. Hadia an nafatin atu hatan ba ema nebe husu kona ba imi nia esperansa, maibe halo nia ho laran kmaus no hamtauk Maromak. ¹⁶ Halo imi nia laran mos nafatin, atu nune’e, wainhira ema hasara imi, sira nebe hasara imi nia hahalok iha Kristu sei sai moe. ¹⁷ Basa terus tamba halo buat nebe diak, wainhira Maromak hakarak nune’e, diak liu fali halo buat nebe aat. ¹⁸ Kristu mate tamba sala dala ida deit ba ema hot-hotu; ema diak ida tamba ema aat sira; atu Nia bele lori ita ba Maromak; Nia mate iha isin maibe Maromak halo nia moris iha espiritu. ¹⁹ Iha espiritu ne’e mak Nia ba hanorin klamar sira iha mate laran, ²⁰ sira nebe uluk lakohi rona, wainhira, iha Noe nia loron, wainhira Noe halo ro boot ida, Maromak hatudu pasiensia barak ba sira. Sira uitoan deit, katak ema na’in ualu, mak hetan maksoin housi be.  ²¹ Nune’e mos, ohin loron baptismu soi imi, la’os hodi hasai foer isin lolon nian, maibe nudar hahalok ida nebe husu klamar mos housi Maromak, hodi Jesus Kristu nia moris hi’as. ²² Nia sa’e ba lalehan, hatodan an iha Maromak sorin kuana, hodi ukun Anju sira, kbiit na’in sira no ukun na’in sira tomak.