3

Na’i sei halo tuir nia promessa

                ¹ Doben sira, ho ida ne’e mak ha’u hakerek ba imi dala rua ona. Iha surat sira ne’e, ha’u haka’as an atu halo moris liu tan imi nia matenek nebe la bosok ho ha’u nia liafuan, ² atu imi hanoin nafatin liafuan sira nebe profeta santu sira hateten nanis ona no mos ita Na’i no Maksoin nia ukunfuan nebe apostolu sira hato’o ona ba imi. ³ Imi ten ke hatene katak iha loron ikus ema sira nebe moris deit tuir sira nia isin nia laran aat sei mosu. ⁴ Sira ne’e sei dehan: “Na’i nebe hakotu lia atu hiit an mai fali iha nebe? Houri tempu nebe ita nia bei-ala sira mate ona, buat hotu hanesan deit wainhira mundu ne’e hahu.” ⁵ Maibe sira ne’e hakarak haluha, katak hodi Maromak nia liafuan, kleur ona mak lalehan sira mosu, no rai sai housi be; no tan be ida ne’e, ⁶  mundu iha tempu neba lakon mout. ⁷ Hodi Maromak nia liafuan ne’e, lalehan no rai ohin ne’e nian marka tiha ba ahi, to’o loron justisa nian no tempu nebe Na’i sei halo lakon ema aat sira.

                ⁸ Keta haluha buat ida ne’e: iha Na’i futar oin, loron ida hanesan tinan rihun ida no tinan rihun ida hanesan loron ida. ⁹ Na’i la hein kleur atu halo tuir buat nebe Nia hakotu, nudar ema balun hanoin; maibe Nia laran diak liu ba imi, hodi lakohi katak ema ida lakon, maibe atu ema hotu bele hakribi nia sala. ¹⁰ Na’i nia loron sei to’o mai hanesan ahu-na’in ida; iha loron neba lalehan sira sei lakon ho tarutu maka’as, no ahi sei han lakon rai no buat hotu nebe iha nia.

Hadera an ba

                ¹¹ Ne’e duni, tan buat hotu ne’e sei lakon, imi nia moris no imi nia hamtauk Maromak sei sai oin sa los, ¹² hodi hein no halo mosu lalais mai Maromak nia loron nia hiit an mai, wainhira lalehan sira nebe ahi han lakon tiha no ahi han tiha fitun fulan sira no sei naben?   ¹³ Maibe tuir Na’i nia promessa, ita hein lalehan foun no rai foun, iha nebe justisa sei hela ba nafatin.

¹⁴ Ne’e duni, doben sira, hodi hein buat sira ne’e, haka’as an atu moris la foer no sala laek iha Na’i futar oin, iha dame laran. ¹⁵ Imi hare ita Na’i nia laran luak nudar maksoin ba imi. Ita nia maluk doben, Paulo hakerek ona ba imi tuir matenek nebe Na’i fo ba nia, ¹⁶ hodi hakerek kona ba ida ne’e nudar nia halo iha surat seluk hotu. Iha surat sira ne’e iha buat sira nebe susar atu hatene lo-los; nebe ema beik sira no sira nebe fiar namlele hanorin la los nudar mos sira halo ho eskritura seluk. Sira halakon deit sira an. ¹⁷ Ne’e duni, imi nebe hatene ona buat ida ne’e, matan moris ba atu imi nia laran metin la bele namlele, hafoin husik ema aat nia hanorin la los ne’e lori lakon imi; ¹⁸ maibe sai boot ba iha grasa no matenek Jesus, ita Na’i no Maksoin; ba Nia gloria ohin no iha loron rohan laek nian. Amen.