3

Maromak nia oan sira

                ¹ Hare ba oin sa Aman hadomi ita; tan ne’e mak ita hanaran an Maromak nia oan--tebes duni, ita Maromak nia oan. Mundu la hatene ita tamba nia la hatene Maromak. ² Ha’u nia doben sira, ohin kedas, ita Maromak nia oan, maibe ita seidauk hatene lo-los ita sei sai oin sa. Maibe ita hatene katak wainhira Kristu mosu mai, ita sei sai hanesan Nia, basa ita sei hare Nia nudar Nia an rasik. ³ Ema hot-hotu nebe iha esperansa ne’e haka’as an atu sai mos, nudar Kristu mos.

                ⁴ Ema nebe halo sala la halo tuir Maromak nia ukunfuan, basa sala mak la halo tuir ukunfuan. ⁵ Imi hatene katak Kristu mosu ona atu kasu sala, no mos katak la iha sala iha Nia. ⁶ Ema nebe horik iha Kristu nia domin la halo sala; maibe ema nebe halo sala, ema ne’e seidauk hare Nia ka hatene Nia.

                ⁷ Keta husik ema ruma lohi imi, ha’u nia oan sira! Ema nebe halo buat nebe los mak ema los; nudar Kristu los. ⁸ Ema nebe halo sala mak diabu nian, basa diabu halo sala houri uluk kedas. Tan ne’e mak Mane Maksoin mosu mai: atu halakon buat nebe diabu halo tiha.

                ⁹ Ema nebe moris housi Maromak la halo sala tan, basa Maromak nia kbiit hela ona iha nia; no tamba nia moris housi Maromak, nia la bele halo sala tan. ¹⁰ Nune’e mak bele hare Maromak nia oan sira se los no diabu nia oan sira se los: ema nebe la halo buat nebe los, ka la hadomi nia maluk la’os Maromak nia oan.

Hadomi malu

                ¹¹ Lia menon nebe imi rona houri uluk kedas mak ne’e: ita sei hadomi malu. ¹² Imi la bele sai hanesan Kain; nia ida nebe aat na’in ninian; nia oho nia alin rasik, Abel. Tansa mak Kain oho nia? Tamba buat sira nebe nia rasik halo la los, maibe buat nebe nia alin halo los.

                ¹³ Ne’e duni, imi keta hakfodak, maun alin sira, wainhira mundu ne’e hirus imi. ¹⁴ Ita hatene katak ita husik tiha mate hodi hakat ona ba moris; basa ita hadomi malu. Ema nebe la hadomi sei hela iha mate nia ukun. ¹⁵ Ema nebe hirus nia maluk, ema ne’e oho ema. Imi hatene katak ema nebe oho ema seluk la iha moris rohan laek iha nia. ¹⁶  Ita hatene domin sa ida nune'e: Kristu saran nia moris tamba ita, no ita mos sei saran ita nia moris tamba ita nia maluk sira. ¹⁷ Ema riku ida hare nia maluk iha susar laran karik, maibe taka nia fuan ba nia, Maromak nia domin horik iha nia oin sa los? ¹⁸ Ha’u nia oan sira, keta hadomi ho liafuan deit; maibe ho hahalok no lialos.

¹⁹ Nune’e mak ita sei hatene katak ita lialos nian; nune’e mak ita bele sai laran metin iha Maromak futar oin: ²⁰ wainhira ita nia laran haksesuk ita, basa Maromak boot liu fali ita nia laran, no Nia hatene buat hotu. ²¹ Ha’u nia belun sira, ita nia laran la haksesuk ita karik, ita laran metin iha Maromak futar oin, ²² no ita simu housi Nia buat nebe ita husu, basa ita halo tuir nia ukunfuan no halo buat nebe monu ba nia laran. ²³ Ne'e mak Nia ukunfuan, katak ita fiar nia Oan Jesus Kristu no hadomi malu nudar Kristu haruka ita. ²⁴ Ema nebe halo tuir Maromak nia ukunfuan, ema ne’e horik iha nia domin no Maromak horik iha nia. Nune’e mak ita hatene katak Maromak horik ho ita: hodi Espiritu nebe Maromak haraik mai ita.