4

Espiritu los no espiritu bosok

                ¹ Ha’u nia belun sira, keta fiar sira hotu nebe dehan katak Espiritu hela ho sira. Koko sira atu hatene lo-los espiritu nebe hela ho sira mai duni housi Maromak ka lae. Basa profeta bosok barak mosu iha fatin hot-hotu. ² Nune’e mak imi bele hatene Maromak nia Espiritu duni ka lae: ema nebe fiar katak Jesus Kristu halo an ba mane, ema ne’e iha espiritu nebe mai housi Maromak. ³ Maibe ema nebe la fiar ida ne’e kona ba Jesus, ema ne’e la iha espiritu nebe mai housi Maromak. Espiritu nebe iha nia mai housi Kristu nia funubalun; imi rona ona katak Nia ne’e sei mai; ohin kedas, Nia iha mundu ona.

                ⁴ Maibe imi Maromak nian, ha’u nia oan sira; imi halakon ona profeta bosok sira, basa Espiritu nebe iha imi maka’as liu fali espiritu nebe hela iha sira nebe mundu ne’e nian. ⁵ Profeta bosok sira ne’e koalia kona ba buat mundu ne’e nian, no mundu se tilun ba sira basa sira mos mundu ne’e nian. ⁶ Maibe ita Maromak nian. Ema nebe hatene Maromak se tilun mai ita; ema nebe la’os Maromak nian, ema ne’e la se tilun mai ita. Ne’e duni, nune’e mak ita bele hatene katak espiritu lialos nian oin seluk tebes housi espiritu bosok nian.

Maromak mak domin

                ⁷ Ha’u nia belun, ita hadomi malu basa domin mai housi Maromak. Ema nebe hadomi, ema ne’e Maromak nia oan, no nia hatene Maromak. ⁸ Ema nebe la hadomi la hatene Maromak, basa Maromak mak domin. ⁹ Maromak hatudu nia domin mai ita wainhira Nia haruka nia Oan mesak ba mundu, atu ita bele hetan moris housi Nia. ¹⁰ Ne’e mak domin: la’os katak ita hadomi Maromak, maibe katak Nia hadomi ita no Nia haruka nia Oan mesak atu housi Nia ita nia sala bele hetan perdaun.

                ¹¹ Belun doben sira: Maromak hadomi ita nune’e karik, ita mos sei hadomi malu. ¹² Ema ida seidauk hare Maromak, maibe ita hadomi malu karik, Maromak horik ho ita no nia domin sai lo-los iha ita leet.

                ¹³ Ita hatene lo-los katak ita horik ho Maromak no Maromak horik ho ita basa Nia haraik ona nia Espiritu mai ita. ¹⁴ Ami hare tiha no fo hatene ba ema seluk katak Aman Maromak haruka tiha nia Oan atu sai mundu nia maksoin. ¹⁵ Ema ruma haklaken karik katak Jesus Kristu mak Maromak nia Oan, ema ne’e horik ho Maromak no Maromak horik ho nia. ¹⁶ Ami rasik hatene hodi fiar Maromak nia domin mai ita.

                Maromak mak domin, no ema nebe moris iha domin laran horik ho Maromak no Maromak horik ho nia. ¹⁷ Domin sai lo-los ona iha ita atu ita bele hetan aten berani iha Loron Tesi-lia nian; ita sei hetan nia basa ita nia moris iha mundu ne’e hanesan Kristu nian. ¹⁸ Iha domin, ema la tauk; domin lo-los halakon tauk hotu. Ne’e duni, ema ida tauk karik, ne’e katak domin seidauk lo-los iha nia, basa tauk la’o hamutuk  ho kastigu.

                ¹⁹ Ita hadomi basa Maromak hadomi uluk ita. ²⁰ Ema ruma karik dehan katak nia hadomi Maromak, maibe hirus nia maluk, ema ne’e bosokten. Basa nia la bele hadomi Maromak nebe nia la hare wainhira nia la hadomi nia maluk nebe nia hare. ²¹ Ema nebe hadomi Maromak sei hadomi mos nia maluk.